20 வருட உச்சத்தில் பணவீக்கம்.. தடுமாறும் துருக்கி..!

இந்தியாவில் நுகர்வோர் பணவீக்கம் 5.59 சதவீதமாக இருக்கும் போதே விலைவாசி உச்சத்தில் இருக்கிறது, விலைவாசி உயர்வால் மக்கள் தற்போது வீட்டுக்குத் தேவையான உணவு பொருட்களைக் கூட வாங்குவதற்குத் தயங்கியும், வாங்கும் அளவுகளைக் குறைத்தும் வருகின்றனர்.

இந்நிலையில் துருக்கி நாட்டில் பணவீக்கம் யாரும் எதிர்பார்க்காத வகையில் 20 வருட உயர்வை எட்டியுள்ளது.

துருக்கி பணவீக்கம்

துருக்கி நாட்டின் வருடாந்திர பணவீக்க அளவீடுகள் வெளியாகியுள்ளது. இளம் தலைமுறையினர் தற்போது சுற்றுலா செல்ல அதிகம் விரும்பும் பகுதியாக மாறியுள்ள துருக்கியில் பணவீக்கம் 49 சதவீதமாக உயர்ந்துள்ளது. இதன் மூலம் அந்நாட்டு மக்கள் அடிப்படைத் தேவையான உணவு பொருட்களைக் கூட வாங்க முடியாத மோசமான நிலைக்குத் தள்ளப்பட்டு உள்ளனர்.

துருக்கி புள்ளியியல் அமைப்பு

துருக்கி புள்ளியியல் அமைப்பு வெளியிட்டுள்ள அறிவிப்பின் படி ஜனவரி மாதத்தில் நுகர்வோர் விலைக் குறியீடு டிசம்பர் மாதத்தை விட 11% அதிகரித்துள்ளது என்று தெரிவித்துள்ளது. இதன் மூலம் உணவுப் பொருட்களின் விலைகள் வருடாந்திர அடிப்படையில் சுமார் 55 சதவீதம் அதிகரித்துள்ளது.

49 சதவீதம்

துருக்கி நாட்டில் 2002 ஆம் ஆண்டுக்கு பின்பு இத்தகைய மோசமான வகையில் பணவீக்கம் 49 சதவீதம் வரையில் உயர்ந்துள்ளது. துருக்கி அரசு அடுத்தடுத்து அறிவிக்கப்பட்ட வட்டி குறைப்பு மூலம் ஏற்பட்ட பொருளாதார எழுச்சி மற்றும் நாணய நெருக்கடி தற்போது பணவீக்கத்தை அதிகரித்துள்ளது.

ரெசெப் தயிப் எர்டோகன்

அதிபர் ரெசெப் தயிப் எர்டோகன், அதிக வட்டி விகிதங்களின் "எதிரி" என்று தன்னை அறிவித்துக் கொண்டு உள்ளார். துருக்கியின் மத்திய வங்கி, ஜனவரியில் வட்டி குறைப்பை நிறுத்துவதற்கு முன்பு செப்டம்பர் மாதத்தில் இருந்து 5 சதவீதம் வட்டியைக் குறைத்து 14 சதவீதமாக அறிவித்துள்ளது.