இன்போசிஸ் காலாண்டு முடிவு வெளியீடு!! ஐடி ஊழியர்களே இந்த விஷயத்தை கவனிச்சீங்களா?

பெங்களூரு: இந்தியாவின் இரண்டாவது பெரிய ஐடி நிறுவனமான இன்போசிஸ் நிறுவனத்தின் ஜூன் மாத காலாண்டு நிதி முடிவுகள் வெளியிடப்பட்டிருக்கின்றன. ஐடி துறை மந்தமாக இருப்பதாக சொல்லப்படும் சூழலிலும் இன்போசிஸ் நிறுவனத்தின் நிகர லாபம் கடந்த ஆண்டுடன் ஒப்பிடும்போது இந்த ஆண்டு 8.7 சதவீதம் உயர்ந்து 6,921 கோடி ரூபாய் என உயர்ந்திருக்கிறது.

கடந்த ஆண்டு இதே காலகட்டத்துடன் ஒப்பிடும்போது இன்போசிஸ் நிறுவனத்தின் வருமானம் இந்த ஆண்டு முதல் காலாண்டில் 7.5% உயர்ந்து 42,279 கோடி ரூபாயாக இருக்கிறது. இன்போசிஸ் நிறுவனத்தின் நிகர லாபம் கடந்த ஆண்டு இதே காலகட்டத்துடன் ஒப்பிடும்போது இந்த ஆண்டு 8.7 சதவீதம் அதிகரித்து 6,921 கோடி ரூபாய் என உயர்ந்திருக்கிறது.

இன்போசிஸ் நிறுவனத்தின் செயல்பாட்டு லாபம் 6.2 சதவீதம் உயர்ந்து 8,803 கோடி ஆக இருக்கிறது. நிறுவனத்தின் பங்கின் Earnings per share 8.6 சதவீதமாக உயர்ந்து ஒரு பங்குக்கு 16.70 ரூபாய் என அதிகரித்திருக்கிறது. இன்போசிஸ் நிறுவனம் ஏப்ரல் முதல் ஜூன் வரையிலான காலாண்டில் பெரிய ஒப்பந்தங்களில் கையெழுத்திட்டு இருக்கிறது என்பது இந்த காலாண்டு முடிவுகள் மூலம் தெரிய வந்திருக்கிறது.

மொத்தம் 3.8 பில்லியன் டாலர்கள் மதிப்பிலான ஒப்பந்தங்களில் கையெழுத்திட்டு இருக்கிறதாம். இதில் 55 சதவீத ஒப்பந்தங்கள் புதிதாக இந்த நிறுவனத்திற்கு வந்தவை என இதன் தலைமை செயல் அதிகாரியான சலில் பரேக் தெரிவித்திருக்கிறார் . பல்வேறு நிறுவனங்களும் தங்களுடைய ஏஐ சார்ந்த சேவைகளுக்கு இன்போசிஸை தேடி வருகின்றன என அவர் கூறியிருக்கிறார் . தற்போது இன்போசிஸ் கைவசம் 7533 கோடியை ரொக்கமாக வைத்திருக்கிறது.

இன்போசிஸ் நிறுவனம் 45,204 கோடி ரூபாய் பணத்தை முதலீடாகவும் செய்து வைத்திருக்கிறது தெரிய வருகிறது. இந்தியாவின் இரண்டாவது பெரிய ஐடி நிறுவனமாக இருக்கக்கூடிய இன்போசிஸ் நிறுவனத்தின் ஊழியர்கள் எண்ணிக்கையும் உயர்ந்திருக்கிறது. மார்ச் மாத நிலவரப்படி இந்த நிறுவனத்தில் 3, 23, 578 பேர் ஊழியர்களாக இருந்தனர். ஆனால் இந்த காலாண்டில் அந்த எண்ணிக்கை 3, 23, 788 என உயர்ந்திருக்கிறது. அதாவது கடந்த காலாண்டில் நிறுவனம் புதிதாக 210 பேரை வேலைக்கு சேர்த்து இருக்கிறது. கடந்த ஆண்டு இதே காலகட்டத்துடன் ஒப்பிடும்போது இன்போசிஸ் நிறுவன ஊழியர்களின் எண்ணிக்கையில் கூடுதலாக 8,456 பேர் இணைந்துள்ளனர்.

2026ஆம் நிதியாண்டில் தன்னுடைய முதல் காலாண்டிலேயே மிக வலுவான தொடக்கத்தை இன்போசிஸ் நிறுவனம் காட்டியிருப்பதாக தெரிவித்து இருக்கும் தலைமை செயல் அதிகாரி சலில் பரேக், கான்ஸ்டன்ட் கரன்சி டெர்ம்ஸ் என்ற பிரிவில் தங்கள் நிறுவனத்தின் வருவாய் வளர்ச்சி 0 முதல் 3 சதவீதமாக இருக்கும் என முன்பு கூறியது, அதனை 1 முதல் 3 சதவீதமாக உயர்த்துகிறோம் என தெரிவித்து இருக்கிறார். அதே வேளையில் மேக்ரோ பொருளாதாரம் சூழல்கள் மீண்டு வருவதற்கான அறிகுறிகள் தென்பட்டாலும் இன்னும் அது முழுமையாக மீண்டு வரவில்லை எனக் கூறியிருக்கிறார்.