52 வார உயர்வை தொட்ட இன்போசிஸ்.. ஒரு வருடத்தில் 103% வளர்ச்சி..!

இன்போசிஸ் நிறுவனம் சந்தை கணிப்புகளைத் தாண்டி வருவாய் மற்றும் லாப அளவீட்டைப் பதிவு செய்த காரணத்தால் இன்று காலை வர்த்தகத்தில் மும்பை பங்குச்சந்தையில் இன்போசிஸ் பங்குகள் சுமார் 1.3 சதவீதம் வளர்ச்சி அடைந்து புதிய உச்சத்தைத் தொட்டது.

52 வார உயர்வு

இன்போசிஸ் பங்குகள் இதற்கு முன்பு அதிகப்படியாக 1,590.85 ரூபாய் அளவீட்டை அடைந்திருந்த நிலையில், இன்றைய அதிரடியான வளர்ச்சி மூலம் 1,597.25 என்ற புதிய வரலாற்று உச்சத்தைத் தொட்டுள்ளது.

இன்போசிஸ் பங்குகள் 103 சதவீத வளர்ச்சி

மும்பை பங்குச்சந்தையின் எஸ் அண்ட் பி சென்செக்ஸ் குறியீடு கடந்த ஒரு வருடத்தில் 47 சதவீதம் வளர்ச்சி அடைந்துள்ள வேளையில் இன்போசிஸ் நிறுவனப் பங்குகள் கடந்த ஒரு வருடத்தில் 103 சதவீத வளர்ச்சி அடைந்துள்ளது.

இன்போசிஸ் லாபம் மற்றும் வருவாய்

இன்போசிஸ் நிறுவனம் ஜூன் காலாண்டில் 5,195 கோடி ரூபாய் அளவிலான லாபத்தையும், 27,896 கோடி ரூபாய் அளவிலான வருவாயும் பெற்றுள்ளது. இது மட்டும் அல்லாமல் இக்காலாண்டில் அதிகளவிலான வாடிக்கையாளர்களையும் பெற்றுள்ளது குறிப்பிடத்தக்கது.

வருவாய் வளர்ச்சி அளவீடு

நேற்று வெளியான காலாண்டு முடிவுகளில் இன்போசிஸ் நிறுவனத்தின் வருவாய் வளர்ச்சி அளவீடு 14-16 சதவீத உயர்வை அடையும் என இந்நிறுவனத்தின் தலைவரான சலில் பாரிக் தெரிவித்துள்ளார். இதற்கு முன்பு இன்போசிஸ் 12 முதல் 14 சதவீதம் வரையிலான வருவாய் வளர்ச்சி மட்டுமே இருக்கும் என அறிவித்திருந்தார்.

அடுத்த 5 வருடம்

மேலும் இன்போசிஸ் அடுத்த சில காலாண்டுகளுக்கு அதிகளவிலான வர்த்தகத்தைப் பெற வாய்ப்புகள் அமெரிக்கச் சந்தையில் உருவாகியுள்ளது. இதன் மூலம் அடுத்த 5 வருடம் இன்போசிஸ் மட்டும் அல்லாமல் மொத்த இந்திய ஐடி நிறுவனங்களுக்கு மிகவும் சிறப்பான வளர்ச்சி காலமாக இருக்கும் என நம்பப்படுகிறது.