ஈஷா அம்பானி-யின் தரமான சம்பவம்.. UK பேஷன் பிராண்ட் உடன் டீல்..!

மும்பை: ரிலையன்ஸ் குழுமத்தை சேர்ந்த ரிலையன்ஸ் ரீடைல் நிறுவனம் பிரிட்டனின் முன்னணி ஃபேஷன் நிறுவனத்துடன் ஒரு புரிந்துணர்வு ஒப்பந்தத்தை மேற்கொண்டுள்ளது. இதன்படி பிரிட்டனை சேர்ந்த ஆன்லைன் ஃபேஷன் நிறுவனமான ஏசோஸின் (ASOS) பொருட்களை இந்தியாவில் ரிலையன்ஸ் ரீடைல் நிறுவனம் மூலம் விற்பனை செய்ய உள்ளது.

இருநிறுவனங்களுக்கும் இடையே போடப்பட்டுள்ள இந்த நீண்ட கால ஒப்பந்தத்தின் அடிப்படையில் ஏசோஸின் ஃபேஷன் பொருட்களை ரிலையன்ஸ் ரீடைல் நிறுவனம் இந்தியாவில் ஆன்லைன் மற்றும் ஆஃப்லைனில் விற்பனை செய்ய உள்ளது.

குறிப்பாக பிரத்யேக கடைகள் மற்றும் ரிலையன்ஸ் குழுமத்தின் கீழ் உள்ள கடைகளில் மற்றும் இ-காமர்ஸ் தளங்கள் ஆகியவற்றில் இனி ஏசோஸின் பொருட்கள் விற்பனை செய்யப்பட உள்ளன. இதன் மூலம் பிரிட்டனை சேர்ந்த ஃபேஷன் பொருட்களை நாம் இந்தியாவில் ரிலையன்ஸ் ரீடைல் வாயிலாக நேரடியாக வாங்கிக் கொள்ள இயலும்.

முதன்முறையாக ஏசோஸ் நிறுவனம் இந்திய நிறுவனத்துடன் இத்தகைய ஒரு பிரத்தியேக ஒப்பந்தத்தை போட்டுள்ளது. ரிலையன்ஸ் ரீடைல் நிறுவனம் முகேஷ் அம்பானியின் மகள் ஈஷா அம்பானியின் தலைமையில் செயல்பட்டு வருகிறது.

இவர் சர்வதேச அளவிலான நிறுவனங்களின் பொருட்களை இந்தியாவில் விற்பனை செய்ய வேண்டும், அனைவரும் எளிதில் வாங்கக்கூடிய ஒரு தளத்தில் அவை இருக்க வேண்டும் என்ற நோக்கத்தில் ஒப்பந்தங்களை மேற்கொண்டு வருவதாக கூறியுள்ளார்.

ஏசோஸ் நிறுவனத்தின் தலைமை செயல் அதிகாரியான ஜோஸ் ஆண்டோனியோ அமோஸ் உலக அளவில் தங்களது நிறுவனம் சென்று சேர வேண்டும் அந்த வகையில் இந்தியாவில் ரிலையன்ஸ் ரீடைல் நிறுவனத்துடன் இணைந்து எங்களது பேஷன் பொருட்களை விற்பனை செய்வதில் மகிழ்ச்சி அடைகிறோம் என தெரிவித்துள்ளார். ஏசோஸ் டிசைன் உலகிலேயே மிகப்பெரிய ஒரு ஃபேஷன் பிராண்ட் என்றும் அவர் கூறியுள்ளார்.

இதனிடையே ரிலையன்ஸ் ரீடைல் நிறுவனம் உலகிலேயே வேகமாக வளர்ந்து வரக்கூடிய சில்லறை வர்த்தக நிறுவனம் என டெலாய்ட் குளோபல் பவர்ஸ் நிறுவனம் தெரிவித்துள்ளது. ரிலையன்ஸ் குழுமத்தில் கடந்த 2006 ஆம் ஆண்டு தொடங்கப்பட்டது ரிலையன்ஸ் ரீடைல் நிறுவனம்.

இந்தியாவில் ரிலையன்ஸ் ரீடைல் நிறுவனம் கிட்டத்தட்ட 249 மில்லியன் பதிவு செய்யப்பட்ட வாடிக்கையாளர்களை கொண்டுள்ளது. மளிகை சாமான், எலக்ட்ரானிக்ஸ், ஆடைகள், என பல்வேறு துறைகளிலும் ரிலையன்ஸ் ரீடைல் நிறுவனம் கால் பதித்துள்ளது.

இந்நிறுவனம் 2022-23 ஆம் நிதியாண்டில் 2,60,000 கோடி ரூபாய் வருவாய் ஈட்டியது . 2023 மார்ச் 31ஆம் தேதி நிலவரப்படி ரிலையன்ஸ் ரீடைல் நிறுவனம் கிட்டத்தட்ட 7000 நகரங்களில் 18,040 கடைகளை நிறுவி இருக்கிறது.

Story Written by: Devika