மியூச்சுவல் ஃபண்டு துறையில் கலக்கப்போகும் முகேஷ் அம்பானி.. JioFin அதிரடி..!!

மும்பை: முகேஷ் அம்பானிக்கு சொந்தமான ரிலையன்ஸ் குழுமம் தொடர்ச்சியாக பல்வேறு தொழில்களிலும் கால் பதித்து வருகிறது. அந்த வகையில் அவர்கள் தற்போது மியூச்சுவல் ஃபண்டு பிஸினஸிலும் களமிறங்கியுள்ளனர். ஜியோ பைனான்சியல் சர்வீசஸ் மற்றும் பிளாக் ராக் (BlackRock ) நிறுவனங்கள் இணைந்து இந்தியாவில் மியூச்சுவல் ஃபண்ட் பிசினஸை தொடங்க இருப்பது தெரியவந்துள்ளது.

ஜியோ பைனான்சியல் சர்வீசஸ் நிறுவனமும் அமெரிக்காவை சேர்ந்த சொத்து மேலாண்மை நிறுவனமான பிளாக் ராக்கும் இணைந்து இரண்டு கூட்டு நிறுவனங்களை அறிவித்துள்ளன. இந்த கூட்டு நிறுவனங்கள் மியூச்சுவல் ஃபண்ட் தொழிலில் ஈடுபட இருப்பது தெரியவந்துள்ளது.

இந்த நிறுவனங்கள் ஜியோ ப்ளாக் ராக் ஆசெட் மேனேஜ்மென்ட் பிரைவேட் லிமிடெட் (Jio BlackRock Asset Management Private Limited) மற்றும் ஜியோ பிளாக் ராக் டிரஸ்டீ பிரைவேட் லிமிடெட் (Jio BlackRock Trustee Private Limited) என அழைக்கப்பட உள்ளன.

இது கடந்த அக்டோபர் 28ஆம் தேதி மத்திய அரசிடம் பதிவு செய்யப்பட்டு விட்டதாகவும் ஒழுங்குமுறை அமைப்புகளிடம் அனுமதிக்காக காத்திருப்பதாகவும் ஜியோ பைனான்சியல் சர்வீசஸ் நிறுவனம் ஆவணங்களை வெளியீடு செய்துள்ளது. இந்த இரண்டு நிறுவனங்களின் பிரதான தொழில் மியூச்சுவல் ஃபண்டுகள் என தெரிவிக்கப்பட்டுள்ளது.

இதில் ஜியோ பிளாக்ராக் ஆசெட் மேனேஜ்மென்ட் நிறுவனத்தில் ஜியோ பைனான்சியல் சர்வீசஸ் நிறுவனம் 82.50 கோடி ரூபாயை முதலீடு செய்துள்ளது. இதன் மூலம் 50% பங்குகள் ஜியோ பைனான்சியஸ் சர்வீசஸ் வசம் உள்ளன. அதேபோல ஜியோ ப்ளாக் ராக் டிரஸ்டி நிறுவனத்தில் ஜியோ பைனான்சியல் சர்வீசஸ் சார்பாக 40 லட்சம் ரூபாய் முதலீடு செய்யப்பட்டு 50% பங்குகளை கொண்ட நிறுவனமாக இருக்கிறது. இந்த கூட்டு நிறுவனங்கள் இணைந்து இந்தியாவில் மியூச்சுவல் ஃபண்ட் தொழிலில் களமிறங்குகின்றன.

2023 ஜூலை மாதத்தில் தான் ரிலையன்ஸுக்கு சொந்தமான ஜியோ பைனான்சியல் சர்வீசஸ் நிறுவனமும் அமெரிக்காவை சேர்ந்த பிளாக் ராக் நிறுவனமும் இணைந்து50: 50 என்ற முதலீட்டில் ஜியோ ப்ளாக் ராக் என்ற கூட்டு நிறுவனத்தை உருவாக்கின. இதனிடையே ஜியோ பைனான்சியல் சர்வீசஸ் நிறுவனம் ஆன்லைன் பேமெண்ட் அக்ரிகேட்டராக ஒரு துணை நிறுவனத்தை உருவாக்கியுள்ளது.

அதற்குப் பெயர் ஜியோ பேமெண்ட் சொல்யூஷன்ஸ் லிமிடெட். இந்த நிறுவனம் ஆன்லைன் பேமெண்ட் அக்ரிகேட்டராக செயல்படுவதற்கு ரிசர்வ் வங்கி அனுமதி அளித்துள்ளது. கடந்த 28ஆம் தேதி இந்த அனுமதி வழங்கப்பட்டு விட்டதாக ஜியோ பைனான்ஸில் சர்வீசஸ் தெரிவித்துள்ளது.

Story Written by: Devika