படுத்தே விட்ட ஜியோ நெட்வொர்க் சேவை.. குமுறும் வாடிக்கையாளர்கள்.. சைலண்ட் மோடில் ஜியோ..!!

ரிலையன்ஸ் நிறுவனத்தின் ஜியோ மொபைல் நெட்வொர்க் சேவைகள் இன்று முடங்கின. பல ஜியோ பயனர்கள் சமூக வலைதளங்களில் பிரச்சனைகளை எதிர்கொள்வதாக அதிருப்தி தெரிவித்துள்ளனர். குறிப்பாக மகாராஷ்டிரா மாநிலம் மும்பையில் ஜியோ சேவைகள் சில மணி நேரம் நிறுத்தப்பட்டதாக தெரிகிறது. ஜியோ ஏர் ஃபைபர் சேவைகளும் பாதிக்கப்பட்டுள்ளதாக பயனர்கள் தெரிவிக்கின்றனர்.

நெட்வொர்க் பிரச்சனைகளைக் கண்டறிவதற்கான தளமான டவுன்டெக்டரும் பல பகுதிகளில் ஜியோ சேவைகள் நிறுத்தப்பட்டதை உறுதிப்படுத்தியுள்ளது. இதுகுறித்து சில பயனர்கள் அளித்த விவரங்களின்படி, ஐடிசி தரவு மையத்தில் தீ விபத்து ஏற்பட்டடுள்ளதாகவும், அதனால்தான் ஜியோ நெட்வொர்க் சிக்கல்களை எதிர்கொள்வதாகவும் கூறப்படுகிறது. ஆனால், இது குறித்து ஜியோ தரப்பில் இருந்து அதிகாரப்பூர்வ அறிவிப்பு எதுவும் வெளியாகவில்லை. தீ விபத்து அல்லது நெட்வொர்க் சிக்கல்கள் குறித்து நிறுவனத்தினிடமிருந்து எந்த தகவலும் இல்லை.

ஒரு மணி நேரத்திற்குள், ஜியோ சேவைகள் நிறுத்தப்பட்டதாக டவுன் டிடெக்டரில் 10,000 பயனர்கள் புகார் அளித்துள்ளனர். அவர்களில் 67 சதவீதம் பேர் ஜியோ நெட்வொர்க் சிக்னல் இல்லை என்றும், 20 சதவீதம் பேர் மொபைல் இன்டர்நெட் பிரச்சனைகளை எதிர்கொள்வதாகவும் கூறியுள்ளனர். ஜியோ ஃபைபர் வேலை செய்யவில்லை என 14 சதவீதம் பேர் புகார் தெரிவித்துள்ளனர்.

ஜியோ சேவை நிறுத்தத்திற்கு சமூக ஊடக பயனர்கள் வெவ்வேறு வழிகளில் பதிலளித்துள்ளனர். சிலர் கடும் அதிருப்தி தெரிவித்தனர். மேலும் சிலர் ஜியோவை மீம்ஸ் மூலம் வசைபாடி வருகின்றனர்.

எனது மொபைலில் இரண்டு ஜியோ சிம்கள் வேலை செய்யவில்லை. சேவை நாளுக்கு நாள் சிறப்பாக வருகிறது' என ஒரு பயனர் X இல் பதிவிட்டுள்ளார். வீடியோவையும் பகிர்ந்துள்ளார். தானே மற்றும் மும்பையில் உள்ள முழு ஜியோ நெட்வொர்க்கும் வேலை செய்யவில்லை. முதலில் iOS 18 அப்டேட் தான் காரணம் என்று நினைத்தேன்' என மற்றொரு பயனர் பதிவிட்டுள்ளார். நாடு முழுவதும் ஜியோ வேகம் வெகுவாக குறைந்துள்ளது. மற்றொரு பயனர் மும்பையில் சேவைகள் முற்றிலுமாக நிறுத்தப்பட்டதாக குறிப்பிட்டுள்ளார்.

வேறு சில பயனர்கள் X இல் உள்ள ஜியோ கணக்கில் நேரடியாகப் புகார் செய்தனர். மும்பையில், ஜியோ சிம்கள் மற்றும் ஜியோ ஃபைபர் வேலை செய்யவில்லை, மேலும் ஒரு மணி நேரத்திற்கும் மேலாக சேவைகள் நிறுத்தப்பட்டுள்ளன. இப்பிரச்னைக்கு தீர்வு காண நிறுவனம் ஏதேனும் நடவடிக்கை எடுத்துள்ளதா என கேட்டுள்ளார். ஆனால் இதற்கு ஜியோ பதில் அளிக்கவில்லை. தற்போது ஜியோ இதனை சரிசெய்யுமா என பெரிய எதிர்பார்ப்பு எழுந்துள்ளது.