இந்தியாவின் கல்வி தலைநகரமாக மாறும் KWIN நகரம்.. கர்நாடக அரசின் மெகா திட்டம்..!!

இந்தியாவின் ஐடி நகரமாக பெங்களூரு செயல்பட்டு வரும் நிலையில் இந்தியாவின் கல்வி நகரமாக கேவின் நகரத்தை மாற்ற வேண்டும் என கர்நாடகா அரசு இலக்கு நிர்ணயம் செய்துள்ளது.

சில மாதங்களுக்கு முன்னர் கர்நாடகா அரசு knowledge well being and innovation என்ற பொருளில் Kwin நகரத்தை கட்டமைக்க அடிக்கல் நாட்டியது. இந்த கேவின் நகரத்தை சர்வதேச கல்வி மையமாக மாற்ற வேண்டும் என இலக்கு நிர்ணயம் செய்துள்ளது.

இந்த நகரத்தில் உலகின் முன்னணி கல்வி நிறுவனங்கள் நிறுவப்பட வேண்டும் என மாநில அரசு திட்டமிட்டுள்ளது. இதற்காக இந்திய அறிவியல் ஆய்வு நிறுவனத்தின் கிளையை நிறுவ கேவின் நகரத்தில் நிலத்தை வழங்குவதற்கு கர்நாடக அரசு முன்வந்துள்ளது.

டாடா நிறுவனம் இந்திய அறிவியல் ஆய்வு நிறுவனத்தோடு இணைந்து ஒரு மருத்துவ கல்வி நிறுவனத்தை அமைக்க ஒப்பந்தம் மேற்கொண்டு இருக்கிறது. 500 கோடி ரூபாய் முதலீட்டில் இந்த மருத்துவக் கல்வி நிறுவனம் அமைக்கப்பட இருக்கிறது. இதனை கேவின் நகரத்தில் அமைக்க வேண்டும் என கர்நாடக மாநில அரசுக்கு நிலத்தையும் வழங்கி உள்ளது.

கர்நாடக மாநில தொழில் மற்றும் உள் கட்டமைப்பு துறை அமைச்சர் எம் பி பாட்டில் தன்னுடைய எக்ஸ் பக்கத்தில் இதனை தெரிவித்துள்ளார். டாடா மற்றும் ஐஐஎஸ்சி இணைந்து மருத்துவ நிறுவனம் அமைக்க இருக்கின்றன. இது போன்ற பல்வேறு உயர்கல்வி நிறுவனங்களும் இந்த கேவின் நகரத்தில் அமைக்கப்பட வேண்டும் என்பதே எங்களுடைய நோக்கம் என அவர் கூறியுள்ளார்.

கல்வி, திறன் மேம்பாடு மற்றும் புதுமைகளின் நகரமாக கேவின் நகரம் இருக்க வேண்டும் எனவும் உலகின் முன்னணி கல்வி நிறுவனங்கள் செயல்படும் நகரமாக மாற வேண்டும் எனவும் தெரிவித்துள்ளார்.

இது தொடர்பாக அமெரிக்காவின் ஜான் ஹாப்கின்ஸ் பல்கலைக்கழகம், ப்ளூம்பெர்க் கல்வி நிறுவனம், லிவர்பூல் பல்கலைக்கழகம், கிழக்கு லண்டன் பல்கலைக்கழகம், யார்க் பல்கலைக்கழகம் என உலகின் முன்னணி கல்வி நிறுவனங்களோடு கர்நாடகா அரசு பேச்சுவார்த்தை நடத்தி வருவதாகவும் அவர்களின் கல்வி மையங்களை இங்கே நிறுவ தேவையான நிலத்தை வழங்க முன் வருவதாகவும் எம் பி பாட்டில் கூறியுள்ளார்.

யுஜிசி விதிமுறைகளை பயன்படுத்தி 500 சிறந்த வெளிநாட்டு கல்வி நிறுவனங்களின் வளாகங்களை கேவின் நகரத்தில் அமைக்க வேண்டும் என நாங்கள் இலக்கு நிர்ணயம் செய்துள்ளோம், இந்த திட்டம் கல்வி மற்றும் புதிய தொழில்நுட்பங்களுக்கான மையமாக கேவின் நகரத்தை மாற்றும் என அவர் நம்பிக்கை தெரிவித்துள்ளார்.

Story written by: Devika