எல்ஐசி ஊழியர்களுக்கும், ஏஜெண்ட்களுக்கும் வாரி வழங்கிய மத்திய அரசு.. செம அறிவிப்புகள்..!!

லைஃப் இன்சூரன்ஸ் கார்ப்பரேஷன் ஆஃப் இந்தியா (எல்ஐசி) முகவர்கள் மற்றும் ஊழியர்களுக்கு தொடர்ச்சியாக பல்வேறு நல திட்டங்களையும், அறிவிப்புகளையும் மத்திய அரசு வெளியிட்டு உள்ளது. இதில் மிகவும் முக்கிய நடவடிக்கையாக எல்ஐசி முகவர்கள் மற்றும் ஊழியர்களுக்கான பணிக்கொடை வரம்பு அதிகரிப்பு, மீண்டும் பணியில் நியமனம் செய்யப்பட்ட முகவர்களுக்கான கமிஷன் ரினீவல், டர்ம்ப் காப்பீடு மற்றும் குடும்ப ஓய்வூதியம் ஆகிய அறிவிப்புகள் இதில் அடங்கும்

மத்திய நிதி அமைச்சகத்தின் இந்த அறிவிப்பு மூலம் நாடு முழுவதும் இருக்கும் 13 லட்சத்துக்கும் மேற்பட்ட எல்ஐசி முகவர்களும், 1 லட்சத்துக்கும் மேற்பட்ட எல்ஐசி நிறுவன ஊழியர்களும் பயனடைவார்கள். இதன் மூலம் எல்ஐசி நிறுவனம் இந்தியாவில் தனது காப்பீட்டு வர்த்தகத்தை மிகப்பெரிய அளவிலும், ஆழமாகவும் விரிவாக்கம் செய்ய உள்ளது.

மத்திய அரசு வெளியிட்டுள்ள இந்த நல திட்டங்களில் முக்கியமாக எல்ஐசி ஏஜெண்ட்களுக்கான கிராஜூவிட்டி அளவு 3 லட்சம் ரூபாயில் இருந்து 5 லட்சம் ரூபாயாக உயர உள்ளது. இதன் மூலம் எல்ஐசி ஏஜெண்ட்களின் நலன்கள் மற்றும் பணியாற்றும் சூழல் மேம்படும் என நிதியமைச்சகம் தனது அறிக்கையில் தெரிவித்துள்ளது.

எல்ஐசி முகவர்கள் தற்போது பழைய ஏஜென்சியின் கீழ் முடிக்கப்பட்ட எந்தவொரு வணிகத்திற்கு ரினிவல் கமிஷன் பெற தகுதியற்றவர்களாக அறிவித்துள்ளது. ஆனால் புதிய நடவடிக்கையின் கீழ் மீண்டும் நியமிக்கப்படும் முகவர்கள் ரினிவல் கமிஷனுக்கு தகுதியுடையவர்களாக இருப்பார்கள். இதன் மூலம் முகவர்களுக்கு நிதி ஸ்திரத்தன்மை அதிகரிக்கும் என அரசு தெரிவித்துள்ளது.

மேலும், எல்ஐசி ஏஜெண்ட்களுக்கான டேர்ம் இன்சூரன்ஸ் தற்போதைய ரூ.3,000-10,000 அளவில் இருந்து ரூ.25,000-1,50,000 ஆக அதிகரிக்கப்பட்டு உள்ளது. இந்த டேர்ம் இன்சூரன்ஸின் உயர்வு மூலம் இறந்த முகவர்களின் குடும்பங்களுக்கு குறிப்பிடத்தக்க வகையில் பயனளிக்கும் என்றும் மத்திய நிதி அமைச்சகம் தெரிவித்துள்ளது.

எல்.ஐ.சி ஊழியர்களின் நலனுக்காக குடும்ப ஓய்வூதியம் 30 சதவீதம் என்ற சீரான விகிதத்தில் வழங்கப்படும் என்றும் மத்திய அரசு தெரிவித்துள்ளது. இப்புதிய அறிவிப்புகள் அனைத்தும் ஊழியர்களுக்கும், எல்ஐசி ஏஜெண்ட்களுக்கும் பலன் அளிக்கும் வகையில் அமைந்துள்ளதால் பங்குச்சந்தை முதலீட்டாளர்கள் ரியாக்ஷன் என்னவாக இருக்கும்.

இன்றைய வர்த்தகத்தில் எல்ஐசி பங்குகள் 0.49 சதவீதம் சரிந்து 663.45 ரூபாயாக உள்ளது.