உயர்ந்தது சிலிண்டர் விலை..!! இனி வீட்டு உபயோக, வணிக பயன்பாட்டு சிலிண்டர் விலை என்ன?

ஒவ்வொரு மாதமும் முதல் தேதியில் எண்ணெய் நிறுவனங்கள் எல்பிஜி சிலிண்டர் விலைகளை மாற்றி அமைக்கும். அந்த வகையில் செப்டம்பர் 1ஆம் தேதியான இன்று எண்ணெய் நிறுவனங்கள் சிலிண்டர் விலைகளை மாற்றி அமைத்துள்ளன. அந்த வகையில் வணிக பயன்பாட்டு சிலிண்டர் மற்றும் வீட்டு உபயோக சிலிண்டரின் விலை என்ன என்பதை தெரிந்து கொள்ளலாம்.

இண்டேன், பாரத் கேஸ், ஹெச்பி ஆகிய பொதுத்துறை எண்ணெய் நிறுவனங்கள் வீட்டு உபயோகத்திற்கு 14.20 கிலோ எடையிலும், வணிக பயன்பாட்டுக்கு 19 கிலோ எடையிலும், சமையல் கேஸ் சிலிண்டர்களை நாடு முழுவதும் வினியோகம் செய்து வருகின்றன. இந்த இரண்டின் விலைகளையும் ஒவ்வொரு மாதமும் 1ஆம் தேதி அன்று மாற்றி அமைக்கின்றன.

சர்வதேச சந்தையில் கச்சா எண்ணெயின் விலை மற்றும் அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றை கணக்கில் கொண்டு எண்ணெய் நிறுவனங்கள் பெட்ரோல், டீசல் மற்றும் சமையல் கேஸ் சிலிண்டர்களின் விலைகளை நிர்ணயித்து வருகின்றன. அந்த வகையில் இன்று கேஸ் சிலிண்டர் விலை உயர்த்தப்பட்டுள்ளது.

சென்னையில் 19 கிலோ எடை கொண்ட வணிக பயன்பாட்டிற்கான சிலிண்டர் விலை 10.50 ரூபாய் உயர்ந்து, 2,916.50 ரூபாய்க்கு விற்பனை செய்யப்படுகிறது. 14.2 கிலோ எடை கொண்ட வீட்டு உபயோக சிலிண்டர் விலையில் எந்தவித மாற்றமுமின்றி 957.50 ரூபாய்க்கு விற்பனையாகிறது.

Also Read

தங்கம் விலை குறையுதேனு சந்தோஷப்படாதீங்க..!! இனிமே தான் உண்மையான ஆட்டமே இருக்கு..!!

ஈரான் போர் க்டந்த பிப்ரவரியில் தொடங்கியது. இதனால் ஹார்மூஸ் ஜலசந்தியில் கப்பல் போக்குவரத்து தடை பட்டு எல்பிஜி விநியோகம் குறைந்துள்ளது. இந்தியா தனக்கு தேவையான 70% எல்பிஜி-ஐ வளைகுடா நாடுகளில் இருந்து தான் வாங்குகிறது. ஆனால் கடந்த 6 மாதங்களாக வளைகுடா நாடுகளில் இருந்து இந்தியாவுக்கு எல்பிஜி விநியோகம் பெருமளவில் நின்று போயுள்ளது.

Recommended For You

ஆபத்தை ஏற்படுத்தும் AI: மனிதர்களுக்கு தெரியாமல் ரகசியமாக இயங்கியதால் டெக் உலகம் அதிர்ச்சி..!!

இந்தியா தற்போது அமெரிக்கா போன்ற நாடுகளிடம் இருந்து எல்பிஜி வாங்கி வருகிறது. இதன் காரணமாக எண்ணெய் நிறுவனங்கள் ஒவ்வொரு மாதமும் வணிக பயன்பாட்டு சிலிண்டர்களின் விலையை உயர்த்திய வண்ணம் உள்ளன. இதனால் ஹோட்டல், டீக்கடை, மெஸ் போன்றவற்றை நடத்துவோர் கடும் சிரமம் அடைந்துள்ளனர். சிலிண்டர் விலை உயர்வால் டீ, ஹோட்டல் உணவு , மெஸ் உணவுகளின் விலைகள் உயர்ந்துள்ளன. இந்த மாதமும் சிலிண்டர் விலை உயர்த்தப்பட்டுள்ளதால் மீண்டும் இவற்றின் விலை உயர வாய்ப்புள்ளது.

வீட்டு உபயோக சிலிண்டர் விலையில் மாற்றமில்லை என்பது நல்ல செய்தி. ஏனெனில் இது நேரடியாக நம் வீட்டு பட்ஜெட்டிலேயே தாக்கத்தை ஏற்படுத்தும். நல்வாய்ப்பாக எண்ணெய் நிறுவனங்கள் வீட்டு உபயோக சிலிண்டர் விலையை உயர்த்தவில்லை. ஈரான் போர் முடிந்து எல்பிஜி விநியோகம் சீராகும் வரை சிலிண்டர் விலை குறைப்புக்கான வாய்ப்பு குறைவு என்பதே உண்மை.