கும்ப மேளா பற்றி 50 ஆண்டுகளுக்கு முன் ஸ்டீவ் ஜாப்ஸ் எழுதிய ஒரு கடிதம்.. ரூ.4.32 கோடிக்கு ஏலம் போனது!

உத்தர பிரதேச மாநிலம் பிரயாக்ராஜில் 12 ஆண்டுகளுக்கு ஒருமுறை நடைபெறும் மகா கும்பமேளா ஜனவரி 13 முதல் கோலாகலமாக தொடங்கியது. இதில் உலகெங்கிலும் இருந்து லட்சகணக்கிலான மக்கள் கலந்துகொண்டனர். ஜனவரி 13-ல் தொடங்கிய மகா கும்பமேளா 45 நாட்களுக்கு அதாவது பிப்ரவரி 26-ம் தேதி வரை நடைபெறவுள்ளது.லட்சகணக்கிலான பக்தர்கள் குவிந்து வருவதால், 4,000 ஹெக்டேர் பரப்பளவில் அடிப்படை வசதிகள் செய்யப்பட்டுள்ளன. 1.60 லட்சம் கூடாரங்கள் அமைக்கப்பட்டு பக்தர்கள் தங்குவதற்கு வசதி செய்யப்பட்டுள்ளது.

இதற்கிடையில், ஆப்பிள் நிறுவனர் ஸ்டீவ் ஜாப்ஸ் குறித்து இந்த கும்ப மேளாவில் அதிகம் விவாதிக்கப்படுகிறது. காரணம், அவர் எழுதிய ஒரு கடிதம் தற்போது அதிகம் பேசுபொருளாகியுள்ளது. இதற்கிடையில், 50 ஆண்டுகளுக்கு முன்பு ஸ்டீவ் ஜாப்ஸ் எழுதிய இந்தக் கடிதம் தற்போது ஏலம் விடப்பட்டுள்ளது. ஸ்டீவ் ஜாப்ஸின் இந்த கடிதம் 500,312.50 டாலர்களுக்கு அதாவது ரூ.4.32 கோடிக்கு ஏலம் விடப்பட்டது.

அந்த கடிதம் ஆனது ஸ்டீவ் ஜாப்ஸ் கும்ப மேளா குறித்து எழுதியிருந்தார். இது 1974 ஆம் ஆண்டு தனது கைப்பட எழுதிய கடிதம் ஆகும். ஸ்டீவ் ஜாப்ஸ் தனது 19வது பிறந்தநாளுக்கு முன்பு இந்தக் கடிதத்தை எழுதியுள்ளார். இந்த கடிதத்தில் அவர் இந்தியா மற்றும் ஆன்மீகத்தில் ஆர்வம் உள்ளதை வெளிக் காட்டியுள்ளார். அந்தக் கடிதத்தில் ஸ்டீவ் ஜாப்ஸ், இந்தியாவில் நடைபெறவுள்ள கும்பமேளா குறித்த தனது உணர்வுகளை வெளிப்படுத்தியதோடு, அதற்கு செல்வதற்கான தனது திட்டங்களைப் பற்றியும் கூறியுள்ளார். செய்திகளின்படி, ஸ்டீவ் ஜாப்ஸ் இந்த கடிதத்தை தனது குழந்தை பருவ நண்பர் டிம் பிரவுனுக்கு அனுப்பியுள்ளார்.

அந்தக் கடிதத்தில், ஸ்டீவ் ஜாப்ஸ், ஏப்ரலில் இந்தியாவில் தொடங்கும் கும்பமேளாவுக்கு நான் இந்தியா செல்ல விரும்புகிறேன். மார்ச் மாதத்தில் வருவேன். இருப்பினும், இது இன்னும் உறுதியாகத் தெரியவில்லை என்று எழுதியுள்ளார். ஸ்டீவ் ஜாப்ஸ் தனது கடிதத்தை அமைதி என்ற வார்த்தையுடன் முடித்துள்ளார். இது ஸ்டீவ் ஜாப்ஸுக்கு இந்து மதத்தின் மீது ஆன்மீக நாட்டம் இருப்பதைக் காட்டுகிறது.

ஜென் பௌத்தத்தை ஆராய்ந்து ஆன்மிகத் தெளிவைத் தேடிக்கொண்டிருந்த ஜாப்ஸ் இந்த கடிதம் எழுதியுள்ளார். இந்தியாவுக்கான அவரது பயணம் அதன் கலாச்சாரம் மற்றும் போதனைகளால் தூண்டப்பட்டது. முதல் முதலாக 1974 ஆம் ஆண்டில், அவர் இந்தியாவிற்குப் பயணம் செய்தார், முதலில் உத்தரகாண்டில் உள்ள நீம் கரோலி பாபாவின் ஆசிரமத்திற்குச் செல்லத் திட்டமிட்டார். ஆனால் அந்த ஆன்மீகத் தலைவர் முந்தைய ஆண்டு காலமானது தெரியவந்தது

இருந்த போதிலும், நீம் கரோலி பாபாவின் போதனைகளில் இருந்து உத்வேகம் பெற்று, ஜாப்ஸ் கைஞ்சி தாமில் தங்கினார். அவர் ஏழு மாதங்கள் இந்தியாவில் இருந்தார். அதன் கலாச்சாரத்தை தழுவி தனிப்பட்ட மாற்றத்திற்கு உட்பட்டார். அமெரிக்காவுக்குத் திரும்பியதும், அவரது ஆன்மீக பயணத்தின் தாக்கத்தால் ஒரு புதிய தோற்றத்தை உருவாக்கினார். இந்தியா வந்து சென்ற ஜாப்ஸுக்கு ஆன்மிக நாட்டம் அவருடைய வாழ்க்கைத் தத்துவம் மற்றும் ஆப்பிள் தயாரிப்புகளின் குறைந்தபட்ச வடிவமைப்பில் தாக்கத்தை ஏற்படுத்தியது.

இந்தியாவுடனான ஸ்டீவ் ஜாப்ஸின் தொடர்பு இன்று அவரது மனைவி லாரன் பவல் ஜாப்ஸ் பிரயாக்ராஜில் நடைபெறும் மகா கும்பமேளா 2025 இல் கலந்து கொண்டார். அவரது ஆன்மீக வழிகாட்டியான சுவாமி கைலாசானந்த் கிரியால் கமலா என்று அழைக்கப்படும் லாரன், தனது கணவரின் ஆன்மீகப் பயணத்தைத் தொடர்ந்துள்ளார்.

40 பேர் கொண்ட குழுவுடன், லாரன் தியானம், கிரியா யோகா மற்றும் பிராணயாமாவில் ஈடுபட்டுள்ளார். அவருக்கு சில உடல்நலப் பிரச்சினைகள் இருந்தபோதிலும், கங்கை நதியில் குளிப்பது உட்பட கும்பமேளாவின் புனித சடங்குகளில் பங்கேற்க அவர் திட்டமிட்டுள்ளார். இந்திய ஆன்மீகம் மீதான தனது மரியாதையை வெளிப்படுத்தி வருகிறார்.