97% சரிந்த மஹிந்திரா & மஹிந்திராவின் லாபம்!

இந்தியாவின் தொழிலதிபர் குடும்பங்களில் ஒன்றான மஹிந்திரா குழும கம்பெனிகளில் முக்கிய கம்பெனியாக இருப்பது மஹிந்திரா & மஹிந்திரா.

இந்த கம்பெனியின், ஜூன் 2020 காலாண்டுக்கான, கன்சாலிடேடட் நிகர லாபக் கணக்குகள் வெளியாகி இருக்கின்றன. அதில் மஹிந்திரா & மஹிந்திரா குழுமத்தின் நிகர லாபம், கடந்த ஜூன் 2019 காலாண்டை விட 97 % சரிந்து இருப்பது தெரிய வந்து இருக்கிறது.

ஜூன் 2019 காலாண்டில் மஹிந்திரா & மஹிந்திரா கம்பெனியின் நிகர லாபம் 2,259 கோடி ரூபாயாக இருந்தது. ஆனால் இந்த ஜூன் 2020 காலாண்டில் நிகர லாபம் வெறும் 67 கோடி ரூபாயாக கணக்கு காட்டி இருக்கிறார்கள். ஆக 97 சதவிகிதம் நிகர லாபம் காணாமல் போய் இருக்கிறது.

மஹிந்திரா & மஹிந்திரா கம்பெனியின் வருவாய் கடந்த ஜூன் 2019 காலாண்டில் 12,805 கோடி ரூபாயாக இருந்தது. இந்த ஜூன் 2020 காலாண்டில் 5,589 கோடி ரூபாயாக சரிந்து இருக்கிறது.

மஹிந்திரா & மஹிந்திரா கம்பெனி இந்த ஜூன் 2020 காலாண்டில் 27,565 வாகனங்களை மட்டுமே விற்று இருக்கிறார்களாம். ஆனால் ஜூன் 2019 காலாண்டில் 1.23 லட்சம் வாகனங்களை விற்று இருக்கிறார்களாம். இது 78 சதவிகித சரிவு.

அதே போல டிராக்டர் விற்பனையும், கடந்த ஜூன் 2019 காலாண்டை விட, இந்த ஜூன் 2020 காலாண்டில் 22 % குறைவாக 64,140 டிராக்டர்களை மட்டுமே விற்பனை செய்து இருக்கிறார்களாம்.

வாகனங்கள் ஏற்றுமதி (டிராக்டரையும் சேர்த்து) 72 சதவிகிதம் வீழ்ச்சி அடைந்து இருக்கிறதாம். கடந்த ஜூன் 2019 காலாண்டில் 10,923 ஆக இருந்த வாகன ஏற்றுமதி, இந்த ஜூன் 2020 காலாண்டில் 3,109 ஆக சரிந்து இருக்கிறதாம்.

ஜூன் 2020 காலாண்டு முடிவுகள் இத்தனை மோசமாக வருவதற்கு, வழக்கம் போல, கொரோனா வைரஸ் பிரச்சனையை காரணமாகச் சொல்லி இருக்கிறார்கள். ஒட்டு மொத்த இந்திய ஆட்டோமொபைல் துறையே (இரு சக்கர வாகனங்களைத் தவிர) 81.5 % வீழ்ச்சி கண்டு இருக்கிறது என்பதும் இங்கு குறிப்பிடத்தக்கது.