சீப்பான விலையில், நச்சுன்னு ஒரு SUV கார் வேணுமா..? இதுதான் பெஸ்ட் சாய்ஸ்..!

இந்தியாவில் எஸ்யூவி ரக கார்களை விரும்பி வாங்குவோரின் எண்ணிக்கை கணிசமாக அதிகரித்துள்ளது. எனவே பல்வேறு கார் தயாரிப்பு நிறுவனங்களும் போட்டி போட்டுக் கொண்டு எஸ்யூவி கார்களை அறிமுகம் செய்கின்றன.

இந்திய சந்தையில் காம்பேக்ட்டான எஸ்யூவி கார்களுக்கான போட்டி அதிகம். ஏற்கனவே மாருதி பிரஸ்ஸா (Maruti Suzuki Brezza), டாடா நெக்ஸான் (Tata Nexon), ஹூண்டாய் வென்யூ (Hyundai Venue )மற்றும் கியா சோனட் (Kia Sonet) ஆகிய கார்கள் வாடிக்கையாளர்களின் மனதை கவர்ந்தவையாக இருக்கின்றன.

இவற்றுக்கு போட்டியாக மஹிந்திரா நிறுவனம் சமீபத்தில் Mahindra XUV 3XO என்ற எஸ்யூவி காரை அறிமுகம் செய்துள்ளது. தற்போது சந்தையில் கிடைக்கும் காம்பேக்ட் எஸ்யூவி கார்களை விட இதன் விலை குறைவு.

மஹிந்திராவின் XUV 3XOவின் எக்ஸ் ஷோரூம் ஆரம்ப விலை 7.49 லட்சம் தான். இதுவே நெக்ஸான் ஆரம்ப விலை 8 லட்சமாகவும், பிரஸ்ஸாவின் விலை 8.34 லட்சமாகவும், வென்யூவின் விலை 7.94 லட்சமாகவும், சோனட்டின் விலை 7.99 லட்சமாகவும் இருக்கிறது. காம்பேக் எஸ்யூவி சந்தையை பிடிக்கும் நோக்கில் விலையை குறைத்து மஹிந்திரா இதனை அறிமுகம் செய்துள்ளது.

மஹிந்திராவின் XUV 3XO, 1.2 லிட்டர் mStallion TCMPFi பெட்ரோல் என்ஜினை பயன்படுத்துகிறது, இதில் 6-speed MT இருக்கிறது. அதுவே பிரஸ்ஸாவில் K15C 1.5 லிட்டர் பெட்ரோல் என்ஜினுடன் 5-speed MT இருக்கிறது. நெக்ஸானில் Revotron 1.2 லிட்டர் டர்போ பெட்ரோல் என்ஜினுடன் 5-speed MT செயல்படுகிறது. வென்யூ மற்றும் சோனட் இரண்டிலும், 1.2-litre Kappa பெட்ரோல் என்ஜின் உள்ளது.

கடந்த மே மாத நிலவரப்படி, இந்தியாவில் அதிகம் விற்பனை செய்யப்பட்ட காம்பேக் எஸ்யூவி கார்களின் பட்டியலில் பிரஸ்ஸா தான் முதலிடத்தில் இருக்கிறது. மே மாதம் மட்டும் 14,186 பிரஸ்ஸா கார்கள் விற்பனை செய்யப்பட்டுள்ளன.

நெக்ஸான் கார்கள் 11,457 என்ற எண்ணிக்கையிலும், ஏப்ரலில் அறிமுகம் செய்யப்பட்ட XUV 3XO கார் 10,510 என்ற எண்ணிக்கையிலும் விற்பனையாகியுள்ளது. வென்யூ கார்கள் 9,327 என்ற அளவிலும், சோனட் 7,433 என்ற அளவிலும் விற்கப்பட்டுள்ளன.

இதில் மஹிந்திராவின் XUV 3XOவின் சிறப்பம்சங்கள் என பார்க்கும் போது, bi-halogen projector headlamp உள்ளது. 16 அங்குல சக்கரங்கள், முன்பக்கம் ஸ்டோரேஜுடன் கூடிய ஆர்ம்ரெஸ்ட், 60:40 என பின்பக்க இருக்கைகள், பின்பக்கத்தில் ஏசி வசதிகள், ஆறு ஏர் பேக்குகள் ஆகியவை உள்ளன.

Story written by: Devika