புதுசா டி-ஷர்ட் நிறுவனத்தை துவங்கிட்டாரா மார்க் சக்கர்பெர்க்? திருப்பூரில் இருந்து தான் சப்ளையா?

மார்க் சக்கர்பெர்க் தற்போது புதிய ஃபேஷன் தொழிலைத் தொடங்கியுள்ளார். மெட்டா நிறுவனத்தின் 40 வயதான CEO-ஆன இவர், தனது சொந்த டி-ஷர்ட்டுகளை வடிவமைக்க உள்ளார். கடந்த மாதம் ஒரு பாட்காஸ்ட்டில், இவர் தனக்கு விருப்பமான கிரேக்க மற்றும் இலத்தின் சொற்களை கொண்ட டி-ஷர்ட்டுகளை வடிவமைக்கத் தொடங்கியுள்ளதாகக் கூறியுள்ளார்.

மார்க் சக்கர்பெர்க்கின் டி-ஷர்ட்டுகள்: மார்க் சக்கர்பெர்க் சமீபத்தில் கருப்பு நிற டி-ஷர்ட் அணிந்து காணப்பட்டார். அதில் "pathei mathos" என்ற கிரேக்க சொற்றொடர் வெள்ளை நிறத்தில் அச்சிடப்பட்டிருந்தது. இதன் பொருள் "துன்பத்தின் மூலமே கற்க முடியும்" என்பதாகும்.

அதே போல மெட்டாவின் முக்கிய அறிவிப்பு நிகழ்ச்சியில், மார்க் சக்கர்பெர்க் அணிந்த டி-ஷர்ட்டில் "aut Zuck, aut nihil" என்ற சொற்றொடர் அச்சிடப்பட்டிருந்தது. இது லத்தின் மொழியில் "aut Caesar, aut nihil" என்ற சொற்றொடரின் ஆங்கில வார்த்தையாகும். இது பெரும் லட்சியத்தை குறிக்கும் பழமொழி என்றும், ஜூலியஸ் சீசரால் உருவாக்கப்பட்டது என்றும் சில அறிஞர்கள் கூறுகின்றனர்.

லாஸ் ஏஞ்சல்ஸை தளமாகக் கொண்ட ஆடை வடிவமைப்பாளரான மைக் அமிரியுடன் இணைந்து மார்க் சக்கர்பெர்க் இந்த டி-ஷர்டை உருவாக்கி வருகிறார். மைக் அமிரி தனது ஃபேஷன் பிராண்டான AMIRI-ஐ 2014-ஆம் ஆண்டில் அறிமுகப்படுத்தினார். இது நியூயார்க்கில் உள்ள பெர்க்டார்ஃப் குட்மேன், பெவர்லி ஹில்ஸில் உள்ள நெய்மன் மார்கஸ், பாரிஸில் உள்ள கேலரிஸ் லாஃபாயெட், லண்டனில் உள்ள செல்ஃப்ரிட்ஜஸ் & ஹாரோட்ஸ், உட்பட உலகெங்கிலும் உள்ள 160-க்கும் மேற்பட்ட உயர்நிலை சில்லறை விற்பனையாளர்களால் விற்பனை செய்யப்படுகிறது.

AMIRI பிராண்ட் பெவர்லி ஹில்ஸ், நியூயார்க், லாஸ் வேகாஸ், மியாமி, சிகாகோ, ஹூஸ்டன், அட்லாண்டா, ஷாங்காய், டோக்கியோ, நான்ஜிங் மற்றும் துபாய் ஆகிய இடங்களில் தனி கடைகளையும் கொண்டுள்ளது.

ரோமானிய வரலாற்றில் மார்க் சக்கர்பெர்க்கின் ஆர்வம்: ரோமானிய பேரரசு குறித்து தெரிந்துகொள்வதில் மார்க் சக்கர்பெர்க் எப்போதும் ஆர்வமாக இருப்பார். தனது இரண்டு குழந்தைகளுக்கு அகஸ்டஸ் மற்றும் மார்கஸ் போன்ற ரோமானிய அரசர்களின் பெயரைக் கொண்டு ஆகஸ்ட் மற்றும் அரேலியா என்ற பெயரை வைத்துள்ளார்.

இதிலிருந்து மார்க் சக்கர்பெர்க் டி-ஷர்ட்களை தயாரிக்க உள்ளார் என்பது தெளிவாகிறது. இனிவரும் நாட்களில் தான் இந்த டி-ஷர்ட்டுக்கான விற்பனை விபரங்கள் குறித்து தெரிய வரும்.