கார் வாங்குற திட்டம் இருந்தா டிசம்பர் 31க்குள்ள வாங்கிடுங்க..!

சென்னை: ஹூண்டாய் நிறுவனத்தை தொடர்ந்து மாருதி சுசுகி நிறுவனமும் ஜனவரி 1ஆம் தேதி முதல் தங்கள் கார்களின் விலையை உயர்த்தப்போவதாக அறிவிப்பு வெளியிட்டுள்ளது.

இந்தியாவில் முன்னணி கார் நிறுவனமாக இருக்கும் ஹூண்டாய் மோட்டார் நிறுவனம் ஜனவரி 1ஆம் தேதி முதல் தங்கள் பிராண்டின் கீழ் விற்பனை செய்யப்படும் அனைத்து ரக கார்களின் விலையும் உயர்த்தப் போவதாக தெரிவித்திருந்தது.

அதிகபட்சமாக 25 ஆயிரம் ரூபாய் வரை காரின் விலை உயரும் என ஹூண்டாய் மோட்டார் அறிவித்தது. இந்த நிலையில் மாருதி சுசுகி நிறுவனமும் தங்கள் கார்களின் விலையை உயர்த்தப் போவதாக அறிவிப்பு வெளியிட்டுள்ளது.

மாருதி சுசுகி நிறுவனம் இது தொடர்பாக பங்குச்சந்தை ஒழுங்குமுறை அமைப்பிடம் தாக்கல் செய்துள்ள ஆவணத்தில், தங்கள் நிறுவன கார்களின் விலையை உயர்த்தப் போவதாக கூறியுள்ளது. மாடல்களை பொறுத்து கார்களின் விலை உயர்வு மாறுபடும் எனக் கூறியுள்ளது.

குறிப்பாக இந்த விலை உயர்வானது 4 சதவீதம் வரை இருக்கும் என மாருதி சுசுகி தெரிவித்துள்ளது. கார் உற்பத்தி செலவினம் அதிகரித்தது மற்றும் செயல்பாட்டு செலவினங்கள் அதிகரித்ததே விலை உயர்வுக்கு காரணம் என மாருதி சுசுகி தெரிவித்துள்ளது. ஜனவரி 1ஆம் தேதி முதல் கார் விலை உயர்வு அமலுக்கு வருகிறது.

இந்தியாவில் ஏற்கனவே 4 கார் நிறுவனங்கள் ஜனவரி 1ஆம் தேதி முதல் கார்களின் விலையை உயர்த்தப் போவதாக அறிவித்துள்ள நிலையில் மாருதி சுசுகி அதில் இணைந்துள்ளது. ஜெர்மனியை சேர்ந்த ஆடம்பர கார் தயாரிப்பு நிறுவனமான மெர்சிடிஸ் பென்ஸ் மற்றும் பிஎம்டபிள்யூ, ஆடி ஆகிய நிறுவனங்கள் தங்கள் நிறுவன கார்களின் விலையை ஜனவரி 1ஆம் தேதி முதல் உயர்த்தப் போவதாக அறிவித்திருந்தன. பின்னர் ஹூண்டாய் நிறுவனம் இதே போன்ற ஒரு அறிவிப்பை வெளியிட்டது.

மாருதி சுசுகி நிறுவனத்தை பொருத்தவரை இந்தியாவின் முன்னணி கார் தயாரிப்பு மற்றும் விற்பனை நிறுவனமாக இயங்கி வருகிறது. இந்த நிறுவனம் இந்திய கார் சந்தையில் 40 சதவீத பங்கினை கொண்டிருக்கிறது. நவம்பர் மாதத்தில் இந்தியாவில் 1.4 லட்சம் கார்களை விற்பனை செய்துள்ளது.

கடந்த ஆண்டு இதே மாதத்தில் 1.34 லட்சம் கார்களை விற்பனை செய்திருந்தது. எனவே கடந்த ஆண்டுடன் ஒப்பிடும்போது நடப்பு ஆண்டில் மாருதி சுசுகி நிறுவனத்தின் கார் விற்பனை அதிகரித்துள்ளது. தற்போது இந்த நிறுவனம் Brezza, Fronx, Grand Vitara, Ertiga, XL6 ம் Invicto ஆகிய கார்களை விற்பனை செய்து வருகிறது. குறிப்பாக எஸ்யூவி கார்கள் தான் அதிகம் விற்பனையாகிறதாம்.

Story Written by: Devika