1600 கோடி பேரின் பாஸ்வோர்ட்கள் திருட்டு.. உடனே இதை செய்யாவிட்டால் பேராபத்து.!!

இணைய வரலாற்றில் இதுவரையில் இல்லாத வகையில், ஒரு மிகப் பெரிய தரவு மீறல் (Data Breach) சம்பவம் வெளிச்சத்துக்கு வந்துள்ளது. உலகெங்கிலும் உள்ள 16 பில்லியன் (1,600 கோடி) பயனர்களின் கூகுள், ஆப்பிள், டெலிகிராம், ஜிமெயில் உள்ளிட்ட பல்வேறு முக்கியச் சேவைகளின் பாஸ்வோர்டுகள் திருடப்பட்டுள்ளதாக அதிர்ச்சித் தகவல் வெளியாகி உள்ளது. இந்த மிகப்பெரிய கசிவு, மில்லியன் கணக்கான மக்களின் தனிப்பட்ட தகவல்கள் மற்றும் ஆன்லைன் கணக்குகளுக்குப் பெரும் அச்சுறுத்தலாக மாறியுள்ளது. இதன் மூலம் மோசடி, திருட்டு, இணைய வழிக் குற்றங்கள் போன்ற பல சட்டவிரோதச் செயல்களில் மோசடி நபர்கள் ஈடுபட வாய்ப்புகள் உள்ளன.

டார்க் வெப்-பில் நடைபெறும் சட்டவிரோத வர்த்தகம்: திருடப்பட்ட இந்த பாஸ்வோர்டுகள் இணையத்தின் மறைக்கப்பட்ட பகுதியான டார்க் வெப் (Dark Web) தளங்களில் விற்கப்படுவதாகத் தகவல்கள் தெரிவிக்கின்றன. இதன் மூலம், ஹேக்கர்கள் இத்தகவல்களைப் பயன்படுத்தி, மின்னஞ்சல், கூகுள் கணக்குகள், முகநூல், டெலிகிராம் போன்ற சமூக ஊடகங்கள் முதல் அரசின் இணையதளங்கள் வரையிலான பல்வேறு ஆன்லைன் சேவைகளைத் தவறாகப் பயன்படுத்த முடியும்.

இந்தத் திருட்டு எவ்வாறு நிகழ்கிறது?: ஹேக்கர்கள் பெரும்பாலும் ஒருவரின் மொபைல் எண்ணுக்குக் குறிப்பிட்ட வலைத்தளத்தின் போலியான இணைப்பை குறுஞ்செய்தியாகவோ அல்லது மின்னஞ்சல் மூலமாகவோ அனுப்புவார்கள். அந்த தளத்துக்குள் நுழையச் சில விவரங்களை உள்ளிடுமாறு (Log-in) அந்த இணைப்புகள் கேட்கும். அவ்வாறு, பயனர்கள் தங்கள் விவரங்களை உள்ளிட்டவுடன், அவற்றை ஹேக்கர்கள் சேமித்து, டார்க் வெப் தளங்களில் சட்டவிரோதமாக விற்று விடுகின்றனர். இதுபோன்ற தனிநபர்களின் விவரங்களை சட்டவிரோதச் செயல்களுக்குப் பயன்படுத்துவதால், எதுவுமறியாமல் தங்கள் விவரங்களை உள்ளிட்ட சாதாரண சாமானியர்கள்தான் இறுதியில் பாதிக்கப்படுகிறார்கள்.

சைபர் வல்லுநர்களின் எச்சரிக்கையும் பாதுகாப்பு நடவடிக்கைகளும்: கொஞ்சம் அறிவு மற்றும் பணம் இருந்தாலே போதும், டார்க் வெப் தளங்களில் இருந்து சட்டவிரோதப் பயன்பாட்டுக்கான தனிநபர் விவரங்களைப் பெற்று விட முடியும் என்பது இதன் தீவிரத்தைக் காட்டுகிறது. இருப்பினும், இதுபோன்ற குறுஞ்செய்திகளிலோ, மின்னஞ்சல்களிலோ இருந்து பெறப்படும் தெரியாத இணைப்புகளில் (Unknown Links) உள்நுழைய வேண்டாம் என்று சைபர் காவல்துறை (Cyber Police) தொடர்ந்து அறிவுறுத்திக் கொண்டேதான் இருக்கின்றனர். இத்தகைய இணைப்புகளைத் தவிர்ப்பதன் மூலம் பெரும்பாலான சிக்கல்களைத் தீர்த்துவிட முடியும் என்று சைபர் நிபுணர்கள் கூறுகிறார்கள்.

இந்த மிகப்பாரிய தரவு மீறல் சம்பவத்தைத் தொடர்ந்து, பாதுகாப்பு நிபுணர்கள் மற்றும் சைபர் வல்லுநர்கள் உடனடியாகப் பின்வரும் பாதுகாப்பு நடவடிக்கைகளை மேற்கொள்ளுமாறு பொதுமக்களுக்கு அறிவுறுத்தியுள்ளனர்

அனைத்து ஆன்லைன் கணக்குகளிலும் பாஸ்வோர்டுகளை மாற்றுங்கள்: உங்களது ஒவ்வொரு ஆன்லைன் கணக்கிற்கும் உடனடியாக வலிமையான மற்றும் தனித்துவமான பாஸ்வோர்டுகளை உருவாக்கிக் கொள்ளுங்கள்.

மல்டி-ஃபேக்டர் அங்கீகாரம் (Multi-Factor Authentication - MFA) / டூ-ஃபேக்டர் அங்கீகாரம் (Two-Factor Authentication - 2FA) பயன்படுத்துங்கள்: இது உங்கள் பாஸ்வோர்டு திருடப்பட்டாலும், உங்கள் கணக்கைப் பாதுகாக்கும் ஒரு கூடுதல் பாதுகாப்பு அடுக்காகும். நீங்கள் உள்நுழையும்போது, உங்கள் மொபைலுக்கு ஒரு ஓடிபி (OTP) வரும் அல்லது அங்கீகரிப்பு செயலி (Authenticator App) மூலம் உறுதிப்படுத்த வேண்டும். இது ஹேக்கர்களுக்குக் கூடுதல் சவாலை அளிக்கும்.

பாஸ்வோர்டு மேலாளர்களைப் (Password Managers) பயன்படுத்துங்கள்: லாஸ்ட்பாஸ் (LastPass), 1பாஸ்வோர்ட் (1Password) போன்ற கடவுச்சொல் மேலாளர்கள் வலுவான மற்றும் தனித்துவமான கடவுச்சொற்களை உருவாக்கவும், அவற்றை பாதுகாப்பாகச் சேமிக்கவும் உதவுகின்றன. இதன் மூலம் நீங்கள் பல கடவுச்சொற்களை நினைவில் வைத்துக் கொள்ள வேண்டிய அவசியமில்லை.

ஒரே பாஸ்வோர்டை பல கணக்குகளுக்குப் பயன்படுத்தாதீர்கள்: நீங்கள் பல கணக்குகளுக்கு ஒரே பாஸ்வோர்டுகளை பயன்படுத்தினால் அல்லது நீண்ட நாட்களாக மாற்றாமல் இருந்தால், உடனடியாக உங்கள் கடவுச்சொற்களை மாற்றுங்கள். ஒரு கணக்கு ஹேக் செய்யப்பட்டால், மற்ற கணக்குகளும் பாதிக்கப்படும் அபாயம் உள்ளது.

சந்தேகத்திற்கிடமான மின்னஞ்சல்கள் / குறுஞ்செய்திகளைத் தவிர்த்தல்: தெரியாத மூலங்களிலிருந்து வரும் மின்னஞ்சல்கள் அல்லது குறுஞ்செய்திகளில் உள்ள இணைப்புகளைக் கிளிக் செய்வதைத் தவிர்க்கவும். உங்களை தனிப்பட்ட தகவல்களை உள்ளிடுமாறு கேட்கும் எந்தவொரு இணைப்பிலும் கவனமாக இருங்கள்.

இந்த நடவடிக்கைகள் மூலம், உங்களது ஆன்லைன் கணக்குகளைப் பாதுகாத்து, இணைய வழி மோசடிகள் மற்றும் திருட்டுகளிலிருந்து உங்களைப் பாதுகாத்துக் கொள்ளலாம். இணையப் பாதுகாப்பில் எப்போதும் விழிப்புடன் இருப்பது மிகவும் அவசியம்.