புதிய வருமான வரி முறையில் உண்மையில் யாருக்கு எவ்வளவு லாபம்..? புட்டு புட்டு வைக்கும் கணக்கு..!

சமீபத்திய ஆண்டுகளில், இந்தியாவில் வருமான வரி ஸ்லாப்ளில் பல்வேறு மாற்றங்கள் கொண்டுவரப்பட்டுள்ளது. அந்த வகையில் வரி செலுத்துவோருக்கு பலவிதமான நன்மைகளை வழங்கும் திருத்தப்பட்ட புதிய வரி விதிப்பு முறையும் அமல்படுத்தப்பட்டது. இந்த புதிய வரி முறை தனிநபர்களுக்கு தங்கள் வரி கடமையிலிருந்து சற்று ஓய்வு பெற பெரிதும் உதவுகிறது.

இந்த பதிவில் திருத்தப்பட்ட புதிய வரிமுறையின் முக்கிய அம்சங்கள் என்ன? அதனால் தனிநபர்களுக்கு என்னென்ன நன்மைகள்? வழங்கப்படுகிறது என்பது குறித்து விரிவாக பார்ப்போம்.

புதிய வரிமுறையின் கீழ் ரூ. 12.75 லட்சம் வரை சம்பளம் வாங்குபவர்களுக்கும் வருமான வரியிலிருந்து முழுமையான விலக்கு அளிக்கப்பட்டுள்ளது. அதாவது ஆண்டு வருமானம் ரூ. 12.75 லட்சத்திற்குள் இருந்தால் எந்த ஒரு வரியும் செலுத்த வேண்டியதில்லை.

வருமானவரி அடுக்குகளில் மாற்றம் செய்ததன் மூலம் வரி செலுத்துவோருக்கு மேலும் சில சலுகைகளும் வழங்கப்பட்டுள்ளது. இதற்கு முன்னர் 30 சதவீத வரி ரூ.15 லட்சம் ஆண்டு வருமானத்திற்கே விதிக்கப்பட்டது. ஆனால் திருத்தப்பட்ட இந்த புதிய வரி விதிப்பு முறையில் 30 சதவீத வரி ரூ. 24 லட்சம் ஆண்டு வருமானம் வாங்குபவர்களுக்கு தான் விதிக்கப்படுகிறது. இப்படி பல நன்மைகள் இந்த புதிய வரி முறையில் மக்களுக்கு வழங்கப்பட்டுள்ளது.

இந்த திருத்தப்பட்ட வரி விதிப்பு முறை 2025 முதல் 2026-ஆம் நிதியாண்டில் ஈட்டப்படும் வருமானத்திற்கு மட்டுமே பொருந்தும். 2024 முதல் 2025-ஆம் நிதியாண்டைப் பொறுத்தவரையில் வரி செலுத்துவோர் முந்தைய வரி முறையின் படி தான் வரி செலுத்த வேண்டும். அது மட்டுமின்றி பழைய வரி விதிப்பு முறையை தேர்வு செய்தும் வரி செலுத்தலாம். இந்த திருத்தப்பட்ட புதிய வரி விதிப்பு முறையின் கீழ் வரி செலுத்துபவர்கள் ஒவ்வொரு மாதமும் வரியை சேமிக்க முடியும்.

திருத்தப்பட்ட வரி விதிப்பில் என்னென்ன மாற்றங்கள்?: ரூ. 4 லட்சம் வருமானம் வரை வரி செலுத்தத் தேவையில்லை. ரூ. 3 லட்சத்திற்கு பதிலாக ரூ. 4 லட்சத்திலிருந்து தான் தற்போது 5 சதவீத வரி ஸ்லாப் தொடங்குகிறது. அதேபோல இதற்கு முன்னர் இருந்து ரூ. 7 லட்சத்திலிருந்து, ரூ. 8 லட்சம் வருமானத்திலிருந்து தான் 10 சதவீத வரி ஸ்லாப் தொடங்குகிறது. இதற்கு முன்னர் ரூ.10 லட்சமாக இருந்த 15 சதவீத வரி வரம்பு இப்போது 12 லட்சமாக உயர்த்தப்பட்டுள்ளது.

ரூ. 8 லட்சம், ரூ. 12.80 லட்சம் மற்றும் ரூ.15.25 லட்சம் சம்பளம் பெறும் தனிநபர்கள் பழைய வரி முறை, புதிய வரி முறை மற்றும் திருத்தப்பட்ட புதிய வரி முறையின் கீழ் எவ்வளவு வரி சேமிக்க முடியும் என்பது குறித்து பார்ப்போம்.

ரூ. 8 லட்சம் வருமானம்: ஒருவர் ரூ. 8 லட்சம் வருமானம் பெறுகிறார் என்று வைத்துக்கொள்வோம். இவர் பழைய வரிமுறையை தேர்ந்தெடுத்திருந்தால்.. ஆண்டுக்கு 65,000 ரூபாய் வருமான வரி செலுத்த வேண்டும். ஆனால் புதிய வரி முறையில் இந்த விகிதம் சற்று குறைந்து ரூ.23,400-ஆக இருக்கும். அதுவே திருத்தப்பட்ட புதிய வரி முறையை தேர்ந்தெடுத்தால் எந்தவித வரியும் செலுத்த தேவையில்லை. ஆக திருத்தப்பட்ட புதிய வரி முறையின் கீழ் ஒருவர் 65,000 வரை அதிகபட்சமாக வரி சேமிக்க முடியும். இதனால் மாதத்திற்கு ரூ.5,417 மிச்சமாகும்.

ரூ. 12.80 லட்சம் வருமானம்: ஒருவர் ரூ. 12.80 லட்சம் வருமானம் பெறுகிறார் என்று வைத்துக்கொள்வோம். இவர் பழைய வரி முறையை தேர்ந்தெடுத்திருந்தால்.. ஆண்டுக்கு 1,88,760 ரூபாய் வருமான வரி செலுத்த வேண்டும். ஆனால் புதிய வரி முறையில் இந்த விகிதம் சற்று குறைந்து ரூ. 84,240- ஆக இருக்கும். அதுவே திருத்தப்பட்ட புதிய வரி முறையை தேர்ந்தெடுத்தால் ரூ. 5,200 செலுத்தினால் போதும். திருத்தப்பட்ட புதிய வரி முறையின் கீழ் ஒருவர் ரூ. 1,83,560 வரை அதிகபட்சமாக வரி சேமிக்க முடியும். இதனால் மாதத்திற்கு ரூ.15,297 மிச்சமாகும்.

ரூ. 15.25 லட்சம் வருமானம்: ஒருவர் ரூ. 15.25 லட்சம் வருமானம் பெறுகிறார் என்று வைத்துக்கொள்வோம். இவர் பழைய வரி முறையை தேர்ந்தெடுத்திருந்தால்.. ஆண்டுக்கு 2,65,200 ரூபாய் வருமான வரி செலுத்த வேண்டும். ஆனால் புதிய வரி முறையில் இந்த விகிதம் சற்று குறைந்து ரூ. 1,35,200- ஆக இருக்கும். அதுவே திருத்தப்பட்ட புதிய வரி முறையை தேர்ந்தெடுத்தால் ரூ. 1,01,400 செலுத்தினால் போதும். திருத்தப்பட்ட புதிய வரி முறையின் கீழ் ஒருவர் ரூ. 1,63,800 வரை அதிகபட்சமாக வரி சேமிக்க முடியும். இதனால் மாதத்திற்கு ரூ.13,650 மிச்சமாகும்.