லண்டனில் தொழிலதிபராக கலக்கி வரும் IPL லலித் மோடியின் மகள் ஆலியா..!

லண்டன்: இந்தியாவில் தற்போது ஐபிஎல் போட்டிகள் மிகப்பெரிய பொழுதுபோக்கு அம்சமாக உருவாகியுள்ளன. கோடிக்கணக்கில் பணம் புரளும் ஒரு நிகழ்வாகவும் ஐபிஎல் இருக்கிறது. ஐபிஎல் போட்டிகள் இந்த அளவுக்கு வளர்ச்சி அடைய காரணமானவர் லலித் மோடி. முன்னாள் ஐபிஎல் சேர்மன் லலித் மோடி இந்தியாவின் புகழ்பெற்ற தொழிலதிபரும் கூட.

லலித் மோடியின் மகள் ஆலியா மோடி தற்போது லண்டனில் தொழிலதிபராக வலம் வருகிறார். 1993 ஆம் ஆண்டு லலித் மோடி மற்றும் மினால் மோடி தம்பதிக்கு மகளாக பிறந்தவர் ஆலியா. இவருக்கு ருச்சிர் மோடி என ஒரு இளைய சகோதரனும் உண்டு.

ஆலியா பாஸ்டனில் உள்ள பிராண்டீஸ் பல்கலைக்கழகத்தில் அறிவியல் மற்றும் வரலாற்று பிரிவில் இளநிலை பட்டப்படிப்பு முடித்தார். இதனை அடுத்து லண்டனில் உள்ள ஒரு பல்கலைக்கழகத்தில் இன்டீரியர் டிசைன் குறித்த படிப்பினை முடித்தார்.

தற்போது இன்டீரியர் டிசைனிங் துறையில் இவர் மிகப்பெரிய நபராக உருவாகி இருக்கிறார். ஏஎம்ஆர்எம் இன்டர்நேஷனல் கன்சல்டன்ட்ஸ் நிறுவனத்தின் தலைமை செயல் அதிகாரியாக செயல்பட்டு வருகிறார். இதற்கு முன்பு அவர் லண்டன் மற்றும் ஹாங்காங்கில் உள்ள புகழ்பெற்ற கட்டடக் கலை நிறுவனங்கள் மற்றும் கட்டட வடிவமைப்பு துறை நிறுவனங்களில் பணியாற்றியுள்ளார்.

தற்போது ஆலியா மோடிக்கு சொந்தமான ஏஎம்ஆர்எம் கன்சல்டிங் நிறுவனம் 8.3 கோடி ரூபாய் மதிப்பு கொண்ட நிறுவனமாக இருக்கிறது. தந்தையைப் போலவே இவரும் மிகச் சிறந்த தொழிலதிபராக உருவாகி வருகிறார்.

2022 ஆம் ஆண்டு ஆலியா மோடி, ப்ரெட் பால்சன் என்பவரை இத்தாலியில் திருமணம் செய்து கொண்டார். மிகப் பிரம்மாண்டமான முறையில் இவரது திருமண நிகழ்வுகள் நடைபெற்றன.

இவரது சகோதரன் ருச்சிர் மோடி இந்தியாவின் மிகச்சிறந்த தொழில் முனைவோராக வளர்ந்து வருகிறார். இவர், காட்ஃபிரே பிலிப்ஸ் இந்தியா லிமிடெட் (Godfrey Phillips India Ltd), மோடி எண்டர்பிரைசஸ் (Modi Enterprises), கேகே மோடி குரூப்(KK Modi Group) மற்றும் மோடி கேர் (Modicare) ஆகிய நிறுவனங்களில் முக்கிய பதவிகளை வகித்து வருகிறார். இவர் மோடி வென்சர்ஸ் நிறுவனத்தின் தலைமை செயல் அதிகாரியாகவும் செயல்பட்டு வருகிறார்.

லலித் மோடியை பொறுத்தவரை அவரது சொத்து மதிப்பு 4,555 கோடி ஆகும். அவரது தொழில் குழுமமான மோடி எண்டர்பிரைசஸின் மதிப்பு மட்டுமே 23,450 கோடி ரூபாயாகும். லலித் மோடியை சுற்றி பல்வேறு சர்ச்சைகளும் விமர்சனங்களும் இருந்தாலும் அவருடைய சொத்து அவருடைய தொழிலும் அதனால் எந்த விதத்திலும் பாதிக்கப்படவில்லை.

Story written by: Devika