அப்பா கிரிக்கெட்டுல புலி.. பொண்ணு படிப்புல புலி.. 23 வயதிலேயே லட்சங்களில் சம்பாதிக்கும் கங்குலியின் மகள்

கொல்கத்தார்: வங்கப்புலி, தாதா, லிட்டில் மாஸ்டர் என பல்வேறு புனைப்பெயர்களால் இந்திய கிரிக்கெட் ரசிகர்கள் மனதில் நீங்கா இடம்பிடித்திருப்பவர் தான் சவுரவ் கங்குலி. 90ஸ் கிட்ஸுக்கு மிகவும் பிடித்த ஒரு கிரிக்கெட் ஜாம்பவான். இவருடைய விளையாட்டு குறித்து நாள் முழுவதும் பேசினாலும் போதாது. கிரிக்கெட் மட்டுமல்ல தனிப்பட்ட வாழ்க்கையிலும் ஒரு சிறந்த தந்தையும் ஜொலிக்கிறார் சவுரவ் கங்குலி.

சவுரவ் கங்குலி எப்படி கிரிக்கெட்டில் ஜாம்பவானோ அப்படி அவருடைய மகள் சனா கங்குலி படிப்பில் ஜாம்பவானாக இருக்கிறார். ஆம் இளம்வயதிலேயே லட்சங்களில் சம்பளம் பெற்று பொருளாதாரத்தில் தான் ஒரு புலி என நிரூபணம் செய்துள்ளார். 2001ஆம் ஆண்டு பிறந்த சனா கங்குலி சிறு வயதில் இருந்தே படிப்பில் சுட்டி. சனா கங்குலி கொல்கத்தாவில் உள்ள லொரெட்டோ ஹவுஸ் பள்ளியில் தன்னுடைய பள்ளிப்படிப்பை முடித்தார். 12ஆம் வகுப்பு தேர்வில் அவர் 98 சதவீதம் மதிப்பெண் எடுத்தார். அதன் பின்னர் வெளிநாடு சென்று பட்டப்படிப்பை தொடர்ந்தார்.

லண்டன் பல்கலைகழக கல்லூரியில் பொருளாதார பிரிவில் பட்டப்படிப்பை முடித்துள்ளார். ஆக்ஸ்போர்டு பல்கலைகழகத்தில் சில மாதங்கள் சான்றிதழ் படிப்பை முடித்தார். பொருளாதாரம், முதலீடு, நிதி மேலாண்மை ஆகியவற்றில் சிறப்பாக மதிப்பெண் பெற்றார். தன்னுடைய கல்லூரி படிப்பின் போதே பல்வேறு முன்னணி நிதி சார்ந்த நிறுவனங்களில் தொழில் பயிற்சியும் பெற்றார். HSBC, KPMG, Goldman Sachs, Barclays உள்ளிட்ட பெரிய நிறுவனங்கள் இதில் அடங்கும்.

ஜூன் 2022 முதல் உலகின் மிகப்பெரிய நிதி ஆலோசனை நிறுவனமான PwCஇல் இன்டர்னாக பணிபுரிந்தார். அதன் பின்னர் Deloitte நிறுவனத்திலும் சிறிது காலம் பணிபுரிந்த அனுபவம் இவருக்கு உண்டு. இங்கெல்லாம் பயிற்சி நிலை ஊழியர்களுக்கே ஆண்டுக்கு 30 லட்சம் வரை சம்பளம் கிடைக்குமாம். தற்போது innoverv என்ற லண்டனை சேர்ந்த நிறுவனத்தில் அவர் பணிபுரிந்து வருகிறார். 23 வயதிலேயே ஆண்டுக்கு 50 லட்சம் ரூபாய் சம்பளத்தில் வேலை செய்து வருவதாக சொல்லப்படுகிறது.

பொதுவாக பெரிய பிரபலங்களில் வாரிசுகள் தந்தையின் தொழிலை பார்த்துக் கொண்டு இருப்பார்கள். ஆனால் சனா கங்குலி தனக்கென்று ஒரு பாதையை தேர்ந்தெடுத்துள்ளார். அதில் வெற்றி பெற்று தான் வங்கப்புலியின் மகள் என்பதை நிரூபணம் செய்துள்ளார். சனா கங்குலியின் தாயார் டோனா கங்குலி, ஒடிசி நடனக் கலைஞராகப் பயிற்சி பெற்றவர். அவரை போலவே சனாவும் சிறு வயதிலேயே நடன பயிற்சி பெற்றவராம்.

Story written: Devika