ஜீரோவில் ஆரம்பித்து ஹீரோவான வினோத் அகர்வால்.. நிலக்கரி துறையில் அசைக்க முடியாத நபரானது எப்படி?

மத்திய பிரதேசம்: 1947ஆம் ஆண்டு இந்தியா பாகிஸ்தான் பிரிவினையின் போது பலரும் தங்களுடைய உடைமைகளை இழந்தனர். அப்படி அனைத்தையும் இழந்து நின்ற தன்னுடைய குடும்பத்திற்கு உறுதுணையாக வேலைக்கு செல்ல தொடங்கி பல ஆயிரம் கோடி மதிப்புள்ள சாம்ராஜ்ஜியத்தை ஒருவர் உருவாக்கியுள்ளார்.

மத்திய பிரதேச மாநிலத்தை சேர்ந்த வினோத் அகர்வால் , அகர்வால் கோல் கார்ப்பரேஷன் எனப்படும் இந்தியாவின் முன்னணி நிலக்கரி நிறுவனத்தின் உரிமையாளர். இவருக்கு 15 வயதாக இருந்த போது தான் இந்தியா பாகிஸ்தான் பிரிவினை அதனை தொடர்ந்து ஏற்பட்ட வன்முறை ஆகியவை நிகழ்ந்தது. இதில் இவரது குடும்பம் அனைத்தையும் இழந்து நின்றது. 15 வயதான வினோத் அகர்வால் வேலைக்கு குடும்பத்தை காப்பாற்றும் நிலைக்கு தள்ளப்பட்டார். அதனை வாழ்க்கை பாடமாக எடுத்து வினோத் அகர்வால் படிப்படியாக நிலக்கரி தொழிலில் கால்பதித்தார். பெரிய அளவில் அலட்டிக்கொள்ளாமல் தனக்கென ஒரு சாம்ராஜ்யத்தை உருவாக்கி கிட்டத்தட்ட 40 ஆண்டுகளாக நிலக்கரித்துறையில் அசைக்க முடியாத ஒரு நபராக திகழ்ந்து வருகிறார்.

2024 ஆம் ஆண்டு ஹரன் பணக்காரர்கள் பட்டியலில் வினோத் அகர்வால் மற்றும் அவர்கள் குடும்பம் 394 ஆவது இடத்தை பிடித்திருந்தது . 1974 ஆம் ஆண்டு வினோத் அகர்வால் , அகர்வால் கோல் கார்ப்பரேஷன் என்ற நிலக்கரி நிறுவனத்தை தொடங்கினார் . குறிப்பிட்ட சில நபர்களால் மட்டுமே ஆதிக்கம் செலுத்தப்பட்டு வந்த நிலக்கரித்துறையில் ஒரு சாதாரண மனிதராக நுழைந்து மிகப்பெரிய அளவில் சாதனை படைத்திருக்கிறார்.

தற்போது உலகின் முன்னணி நிலக்கரி ஏற்றுமதி நிறுவனங்களில் ஒன்றாக அகர்வால் கோல் கார்ப்பரேஷன் இருக்கிறது. உலகம் முழுவதும் 1500 வாடிக்கையாளர்களுக்கு இந்த நிறுவனம் நிலக்கரி சப்ளை செய்கிறது . இந்தியாவில் ஆதித்யா பிர்லா , டாடா உள்ளிட்ட நிறுவனங்கள் தங்களுக்கு தேவையான நிலக்கரியை இந்த நிறுவனத்திடம் இருந்துதான் வாங்குகின்றன. இந்த நிறுவனம் ஒரு ஆண்டுக்கு 14 ஆயிரம் கோடி ரூபாயை வருமானமாக ஈட்டுகிறது என தகவல்கள் தெரிவிக்கின்றன.

இந்தியா மட்டுமில்லாமல் உலக முழுவதும் இருக்கும் நிலக்கரி நிறுவனங்களிடம் இருந்து நிலக்கரியை கொள்முதல் செய்து விற்பனை செய்கிறது இந்நிறுவனம்./ அகர்வால் குழுமபத்தை பொறுத்தவரை நிலக்கரி தொழில் மட்டும் இல்லாமல் மத்திய பிரதேச மாநிலத்தில் கல்வி குழுமம் ஒன்றை தொடங்கி 4500 மாணவர்களுக்கு கல்வி வழங்கி வருகிறது. அதுமட்டுமின்றி தொண்டு நிறுவனம் ஒன்றை உருவாக்கி ஏழ்மையில் இருக்கும் மாணவர்களின் கல்விக்காக உதவி வருகின்றனர். வினோத் அகர்வாலின் மகன் தபன் அகர்வால் தற்போது ரியல் எஸ்டேட் துறையிலும் கால்பதித்துள்ளார்.