Mercedes Benz-க்கே இந்த நிலையா? 38% சரிவில் விற்பனை!

இந்தியாவில் சொகுசு கார்களை விற்கும் முன்னணி கம்பெனியான மெர்சிடிஸ் பென்ஸ் (Mercedes Benz) நிறுவனத்தின் செப்டம்பர் 2020 காலாண்டு விற்பனை விவரங்கள் வெளியாகி இருக்கின்றன.

ஐரோப்பிய ஒன்றியத்தின் முக்கிய நாடுகளில் ஒன்றான ஜெர்மனியைச் சேர்ந்த சொகுசு கார் நிறுவனமான மெர்சிடிஸ் பென்ஸ் (Mercedes Benz), செப்டம்பர் காலாண்டில் (ஜூலை 2020 - செப்டம்பர் 2020) 2,058 வாகனங்களை விற்று இருக்கிறார்களாம்.

இது முந்தைய செப்டம்பர் 2019 காலாண்டில் செய்த விற்பனையை விட 38.64 சதவிகிதம் குறைவு என்பது குறிப்பிடத்தக்கது.

கொரோனா தாக்கம்

கடந்த செப்டம்பர் 2019 காலாண்டில் (ஜூலை 2019 முதல் செப்டம்பர் 2019) 3,354 வாகனங்களை மெர்சிடிஸ் பென்ஸ் (Mercedes Benz) விற்று இருந்தார்களாம். இப்போதைக்கு விற்பனை வீழ்ச்சி கண்டு இருந்தாலும், கொரோனா வைரஸ் தாக்கத்தில் இருந்து, மெர்சிடிஸ் பென்ஸ் (Mercedes Benz) விற்பனை மீண்டு வருவதாகச் சொல்லி இருக்கிறது கம்பெனி தரப்பு.

ஆன்லைன் விற்பனை

இந்த செப்டம்பர் காலாண்டில் விற்பனை ஆன மொத்த மெர்சிடிஸ் பென்ஸ் (Mercedes Benz) வாகனங்களில் சுமாராக 20 சதவிகித விற்பனை ஆன்லைன் புக்கிங் வழியாக வந்ததாம். 2025-ம் ஆண்டுக்குள் மெர்சிடிஸ் பென்ஸ் (Mercedes Benz) கம்பெனி இந்தியாவில் விற்கும் மொத்த கார்களில் ஒரு கணிசமான அளவு கார்கள், ஆன்லைன் வழியாக விற்கப்படும் எனவும் சொல்லி இருக்கிறது.

பண்டிகை கால விற்பனை

இந்தியாவில், அக்டோபர், நவம்பர் மாதங்களில் தசரா, தீபாவளி, நவராத்திரி என பல பண்டிகைகள் வரிசை கட்டி வர இருக்கின்றன. எனவே இந்த அக்டோபர் 2020 முதல் டிசம்பர் 2020 வரையான கால கட்டத்தில், அதாவது டிசம்பர் 2020 காலாண்டில் மெர்சிடிஸ் பென்ஸ் (Mercedes Benz)-ன் விற்பனை நன்றாக இருக்கும் என எதிர்பார்க்கிறார்களாம்.

ஒன்பது மாத விற்பனை

2020-ம் ஆண்டில் ஜனவரி முதல் செப்டம்பர் மாதம் வரையான ஒன்பது மாதங்களில் மெர்சிடிஸ் பென்ஸ் (Mercedes Benz) 5,007 வாகனங்களைத் தான் விற்று இருக்கிறார்களாம். ஆனால், கடந்த 2019-ம் ஆண்டில், ஜனவரி முதல் செப்டம்பர் மாதம் வரையான ஒன்பது மாதங்களில் 9,951 வாகனங்களை விற்று இருக்கிறார்களாம். இது 49.5 சதவிகிதம் விற்பனை சரிவு என்பது குறிப்பிடத்தக்கது.