திங்கட்கிழமை மெகா பணிநீக்கம்.. META அறிவிப்பால் டெக் ஊழியர்கள் கண்ணீர்..!

டெக் துறையில் 2023 முதல் துவங்கிய பணிநீக்கம், 2025லும் தொடர்கிறது. இந்த ஆண்டு அமேசான், மைக்ரோசாப்ட், கூகுள், சேல்ஸ்போர்ஸ் என பல நிறுவனங்கள் பணிநீக்கம் செய்து வரும் வேளையில் இந்த பட்டியலில் மெட்டாவும் இணைந்துள்ளது.

உலகின் மிகப்பெரிய சமுகவலைத்தளமான ஃபேஸ்புக், இன்ஸ்டாகிராம்-க்கு சேவைகளை நிர்வாகம் செய்யும் நிறுவனமான மெட்டா, இந்நிறுவனம் உலகளாவிய தனது ஊழியர்களை படையில் குறிப்பிட்ட எண்ணிக்கையை பணிநீக்கம் செய்யும் நடவடிக்கைகளை தொடங்க உள்ளது. இது குறித்த அறிவிப்பை நிறுவனத்தின் தலைமை மனிதவள அதிகாரி ஜனெல் கேல் வெளியிட்டுள்ளார்.

இந்த பணிநீக்கம் குறித்து மெட்டா நிர்வாகம் தனது ஊழியர்களுக்கு மெமோ வாயிலாக முன்னறிவிப்பு செய்துள்ளது. இந்த பணிநீக்கத்திற்கு பின்பு மெஷின் லேர்னிங் பிரிவில் அதிகப்டியான ஊழியர்களை தேர்வு செய்து பணியில் அமர்த்தப்படுவதாகவும் தெரிவிக்கப்பட்டு உள்ளது.

பெரும்பாலான நாடுகளில், உள்ளூர் நேரப்படி திங்கள்கிழமை அதிகாலை 5 மணி முதல் பணிநீக்க அறிவிப்புகள் மெட்டா ஊழியர்கலுக்கு வழங்கப்பட உள்ளன. அமெரிக்கா உள்ளிட்ட பல நாடுகளில் இந்த நடவடிக்கை நடைமுறைப்படுத்தப்படும்.

இருப்பினும், ஜெர்மனி, பிரான்ஸ், இத்தாலி மற்றும் நெதர்லாந்து உள்ளிட்ட பல ஐரோப்பிய நாடுகளில் உள்ள ஊழியர்கள் இந்த பணிநீக்கங்களிலிருந்து விலக்கு அளிக்கப்பட்டுள்ளனர். இதற்கு அந்தந்த நாடுகளின் தொழிலாளர் சட்டங்களின் காரணமாகும்.

ஐரோப்பா, ஆசியா மற்றும் ஆப்பிரிக்கா உள்ளிட்ட பிற நாடுகளில் உள்ள ஊழியர்களுக்கு பிப்ரவரி 11 முதல் 18 வரை பணிநீக்க அறிவிப்புகள் ஊழியரின் ஈமெயில் முகவரிக்கு அனுப்பப்படும் என தகவல் வெளியாகியுள்ளது. ஆனால் இந்த விவகாரம் குறித்து மெட்டா நிறுவனம் எந்தவித அதிகாரப்பூர்வமான கருத்தையும் வெளியிடவில்லை.

கடந்த மாதம், நிறுவனத்தின் பணியாளர்களில் சுமார் 5% பேரை பணிநீக்கம் செய்ய திட்டமிட்டுள்ளதாக மெட்டா அறிவித்திருந்தது. குறைந்த செயல்திறன் கொண்ட ஊழியர்கள் வெளியேற்றப்படுவார்கள் என்றும், சில துறைகளில் வேலைவாய்ப்புகளை அதிகரிக்க நடவடிக்கை எடுக்கப்படும் என்றும் தெரிவிக்கப்பட்டது.

மெட்டா நிர்வாகம் முன்பு செய்யப்பட்ட பணிநீக்கத்தை போல் அல்லாமல், இந்த பணிநீக்க சுற்றில் வெளியேற்றப்படும் பணியிடங்களில் மீண்டும் நிரப்ப முயற்சிக்கும் என தெரிவிக்கப்பட்டுள்ளது. இந்த பணிநீக்கம் முழுமையாக "செயல்திறன் அடிப்படையிலான பணிநீக்கமாக மட்டுமே இருக்கும் என்று தகவல் வெளியாகியுள்ளது.