கோயம்புத்தூர் மக்களே நவம்பர் 4 குறிச்சுவைச்சுக்கோங்க .. ஒரே நாளில் 2 மெகா திட்டம்.!!

தமிழ்நாடு முதலமைச்சர் மு.க.ஸ்டாலின் நவம்பர் 4 ஆம் தேதி கோயம்புத்தூர் எல்காட் ஐடி பார்க்கை திறந்து வைக்க உள்ளார். சுமார் ரூ. 114 கோடி செலவில் கட்டப்பட்ட இந்த ஆறு மாடி கட்டிடம் 2.66 லட்சம் சதுர அடி அலுவலக இடத்தை வழங்குகிறது. இந்த ஐடி பார்க் மூலம் சுமார் 14,000-க்கும் அதிகமானோர்-க்கு வேலைவாய்ப்புகள் உருவாகும் என எதிர்பார்க்கப்படுகிறது.

அதே நாளில், ஸ்டாலின் கலைஞர் நூற்றாண்டு நூலகம் மற்றும் அறிவியல் மையத்தின் கட்டுமானத்திற்கு அடிக்கல் நாட்ட உள்ளார். 6.98 ஏக்கர் பரப்பளவில் அமைய உள்ள இந்த பிரம்மாண்டமான திட்டம் ரூ. 300 கோடி செலவில் கட்டப்படும். ஏழு மாடி கட்டிடம் 1,98,000 சதுர அடி பரப்பளவில் அமைந்திருக்கும்.

இந்த இரண்டு திட்டங்களும் கோயம்புத்தூர்-க்கு மிகப்பெரிய பரிசாக பார்க்கப்படுகிறது. இது கோவையை ஒரு முக்கியமான ஐடி மையமாக மாற்றும். இந்திய அளவில் தொழில்நுட்பத் துறையில் குறிப்பாக ஐடி மற்றும் டெக் துறையில் வேகமாக வளர்ந்து வரும் 2ஆம் நிலை நகரங்களில் கோயம்புத்தூர் மிகவும் முக்கியமானது.

கோயம்புத்தூர் காலம்காலமாக உற்பத்தி மற்றும் டெக்ஸ்டைல் துறை அடிப்படையிலான பொருளாதாரத்தை கொண்டிருந்தாலும், தற்போது தகவல் தொழில்நுட்பத் துறையில் குறிப்பிடத்தக்க முன்னேற்றம் கண்டு வருகிறது. இதன் காரணமாக, நகரில் அலுவலக இடங்களுக்கான தேவை நாளுக்கு நாள் அதிகரித்து வருகிறது.

இந்தத் தேவையைப் பூர்த்தி செய்யும் வகையில், கோயம்புத்தூர் முழுவதும் பல ஐடி பார்க்குகள் மற்றும் டெக் பார்க்குகள் கட்டப்பட்டு வருகின்றன. குறிப்பாக, விளாங்குறிச்சியில் அமைந்துள்ள இந்த எல்காட் சிறப்பு பொருளாதார மண்டலத்தில் கட்டி முடிக்கப்பட்ட ஐடி பார்க் தான் தற்போது கோயம்புத்தூர் ஐடி ஊழியர்களின் கவனத்தை ஈர்த்துள்ளது.

கோயம்புத்தூரில் ஐடி நிறுவனங்களின் வளர்ச்சிக்கு இந்த எல்காட் ஐடி பார்க் மிகவும் முக்கியமானதாக இருக்கும். ஏனெனில், தற்போது கோயம்புத்தூரில் சுமார் ஆறு முதல் ஏழு லட்சம் சதுர அடி அலுவலக இடங்களுக்கான தேவை உள்ளது. இந்த எல்காட் ஐடி பார்க் மட்டும் 2.66 லட்சம் சதுர அடி இடத்தை வழங்கும் என்பதால் இது பெரு மாற்றமாக இருக்கும்.

தமிழ்நாடு அரசின் எல்காட் அமைப்பு, மாநிலத்தில் தகவல் தொழில்நுட்ப உள்கட்டமைப்பை மேம்படுத்துவதில் முக்கிய பங்கு வகிக்கிறது. இந்த நிறுவனம் கோயம்புத்தூரில் இரண்டாவது ஐடி பார்க்கை அமைப்பதன் மூலம், நகரின் தகவல் தொழில்நுட்பத் துறையில் புதிய மற்றும் அதிகப்படியான முதலீட்டை ஈர்க்கும்.