மோடி 3.0: சிறப்பு கொண்டாட்டத்திற்கு ரெடியாகும் BJP; குடியரசு தலைவர் செயலகம் வெளியிட்ட டெண்டர்..!!

வெள்ளிக்கிழமை எக்சிட் போல் வெளியானதில் இருந்து பங்குச்சந்தை முதலீட்டாளர்கள் பெரும் திட்டம் தீட்டத் துவங்கியுள்ளனர். எக்சிட் போல் முடிவுகளுக்கு பின் மும்பை பங்குச்சந்தையின் ரியாக்ஷனை பார்க்க முதலீட்டாளர்கள் மிகவும் ஆர்வமாக உள்ளனர். இதேவேளையில் பிஜேபி பெரிய கொண்டாட்டத்திற்குத் தயாராகி வருகிறது.

ஜூன் 1 ஆம் தேதி இறுதிக்கட்ட வாக்குப்பதிவு முடிந்த பின்பு வெளியான எக்சிட் போல் முடிவுகள் தற்போதும் ஆளும் கட்சியான பிஜேபி தலைமையிலான என்.டி.ஏ கூட்டணிக்குப் பெரிய அளவில் ஆதரவாக உள்ளது. பெரும்பாலான முடிவுகளில் NDA கூட்டணி குறைந்தது 300 சீட்டுகளுக்கு அதிகமாக வெற்றிபெறும் எனக் கணித்துள்ளது.

இதனால் மோடி 3.0 ஆட்சி அமைவது என்பது கிட்டத்தட்ட உறுதியாகியுள்ளதாகவே நம்புகின்றனர். மூன்றாவது முறையாக ஆட்சிக்கு வரும் வெற்றியை கொண்டாட பாரதிய ஜனதா கட்சி (பாஜக) பாரத மண்டபம் அல்லது கர்தவ்யா பாதையில் ஒரு பெரிய "அரசியல்" நிகழ்ச்சியை நடத்த திட்டமிட்டுள்ளது.

ஜூன் 4 ஆம் தேதி தேர்தல் முடிவுகள் வெளியாக உள்ள நிலையில் அதன் பின்பு பெரிய விழா நடத்த திட்டமிட்டுள்ள பிஜேபி. இந்த வார இறுதியில் திட்டமிடப்பட்டிருக்கும் இந்த சிறப்பு விழாவில் 8,000-10,000 அதிகமான பிஜேபி கட்சி உறுப்பினர்கள் கலந்துகொள்வார்கள் என்று எதிர்பார்க்கப்படுகிறது.

மறுபுறம், லோக்சபா தேர்தல் 2024 முடிவுகளுக்கு முன்னதாகவே மே 28 அன்று, ராஷ்டிரபதி பவனில் பிரதமர் மற்றும் பிற அமைச்சர்களின் பதவியேற்பு விழாவிற்கு, உட்புற மற்றும் வெளிப்புற அலங்காரங்களுக்கான டெண்டரை குடியரசு தலைவர் செயலகம் வெளியிட்டு உள்ளது என தகவல் வெளியாகியுள்ளது.

குடியரசு தலைவர் செயலகம் வெளியிட்டுள்ள இந்த டெண்டர் மதிப்பு 21.97 லட்சம் ரூபாயாகும். இந்த டெண்டர் ஜூன் 3 திங்கட்கிழமை திறக்கப்படுகிறது. ஆர்டரை முடிக்க ஒப்பந்ததாரருக்கு ஐந்து நாட்கள் அவகாசம் வழங்கப்படும்.

இந்த தேர்தலில் தேர்ந்தெடுக்கப்பட்ட நாடாளுமன்ற உறுப்பினர்களின் பயணம் மற்றும் தங்கும் தேவைகளையும், செலவுகளை லோக் சபா செயலகம் கையாண்டு வருவதால், குடியரசுத் தலைவர் செயலகம் உட்புற மற்றும் வெளிப்புற அலங்காரங்களுக்கான செலவுகளை ஏற்கிறது.

2024 மக்களவைத் தேர்தலின் எக்சிட் போல் விபரத்தின் படி பாஜக மாபெரும் வெற்றி அடைவதாகக் கூறினாலும், அதே நேரத்தில் எதிர்க்கட்சியான காங்கிரஸ் தலைமையிலான INDIA கூட்டணி தலைவர்கள் குறைந்தபட்சம் 295 இடங்களில் வெற்றி பெற்று மத்தியில் ஆட்சி அமைக்கப் போவதாகக் கூறி எக்சிட் போல் முடிவுகளை மறுத்துவிட்டனர்.