MS தோனி செய்த புதிய முதலீடு.. எதிர்காலம் நம் கையில்..!

புனே: பிரபல கிரிக்கெட் வீரரும் இந்தியா முழுவதும் பெரும் ரசிகர் பட்டாளத்தை கொண்டிருப்பவருமான மகேந்திர சிங் தோனி, மின்சார வாகன உற்பத்தியில் ஈடுபட்டிருக்கும் நிறுவனத்தில் முதலீடு செய்திருப்பது தெரியவந்துள்ளது.

மகேந்திர சிங் தோனி பல்வேறு துறைகளில் முதலீடு செய்துள்ளார் மற்றும் சில நிறுவனங்களையும் நடத்தி வருகிறார் . தன்னுடைய முதலீட்டின் ஒரு பகுதியாக அவர் புனேவை தலைமை இடமாக கொண்டு செயல்படக்கூடிய மின்சார வாகன ஸ்டார்ட் அப் நிறுவனத்தில் முதலீடு செய்துள்ளார்.

புனேவை தலைமையிடமாகக் கொண்டிருக்கும் ஈமோட்டாராடு (EMotorad) என்று நிறுவனத்துடன் மகேந்திர சிங் தோனி கூட்டமைத்துள்ளார். இந்த நிறுவனத்தில் கணிசமான தொகையை அவர் முதலீடு செய்துள்ளார்.

அதுமட்டுமின்றி இந்த நிறுவனத்தின் விளம்பர தூதராகவும் மகேந்திர சிங் தோனி செயல்பட போவதாக அறிவிக்கப்பட்டுள்ளது. இது குறித்து பேசி இருக்கும் மகேந்திர சிங் தோனி, “எதிர்காலம் நம் கையில் இருக்கிறது , புதுப்புது கண்டுபிடிப்புகள் தான் சுற்றுச்சூழல் சார்ந்த பிரச்னைகளுக்கு நிலையான தீர்வினை அளிக்கின்றன. இதுபோன்ற புதிய கண்டுபிடிப்புகளின் பெரிய ரசிகன் நான்” என கூறியுள்ளார்.

மின்சார வாகன தயாரிப்பில் ஈடுபடும் நிறுவனத்தில் முதலீடு செய்வது தனக்கு உற்சாகம் தருவதாகவும் அவர் கூறியுள்ளார். மகேந்திர சிங் தோனி கிரிக்கெட் மட்டுமல்லாது ஸ்டார்ட்அப் முதலீடுகளிலும் சிறந்தவராக திகழ்ந்து வருகிறார்.

இவர் ஏற்கனவே 7 என்ற பெயரில் ஒரு ஆடை பிராண்டை நடத்தி வருகிறார். ராஞ்சியில் மகி ரெசிடென்சி என்ற பெயரில் ஹோட்டல், பெங்களூருவில் மைக்ரோசாப்ட் நிறுவனத்தோடு இணைந்து எம்எஸ் தோனி குளோபல் ஸ்கூல் என்ற ஒரு பள்ளியையும் நடத்துகிறார். இது தவிர தோனி என்டர்டெயின்மென்ட் லிமிடெட் என்ற பெயரில் இவர் படத் தயாரிப்பிலும் ஈடுபட்டிருக்கிறார்.

கடந்த 2020 ஆம் ஆண்டு ரஜிப் கங்காபாத்யாய், குணால் குப்தா, ஆதித்யா மற்றும் சுமித் பட்டேவர் ஆகியோரால் தொடங்கப்பட்ட நிறுவனம் தான் ஈ மோட்டாராடு. இந்த நிறுவனம் இந்தியாவின் மின்சார வாகன சந்தையில் முக்கிய இடத்தை பிடிக்கும் நோக்கில் செயல்பட்டு வருகிறது.

தற்போது இந்த நிறுவனத்தில் மகேந்திர சிங் தோனியும் இணைந்திருக்கிறார். இது தொடர்பாக பெருமிதம் தெரிவித்துள்ள நிறுவனத்தின் தலைமை செயல் அதிகாரியான குணால் குப்தா, தங்கள் நிறுவனத்தின் அடிப்படை மதிப்பீடுகளுக்கும், மகேந்திர சிங் தோனிக்கும் பெருமளவில் ஒற்றுமை இருக்கிறது எனக் கூறுகிறார்.