பங்குச்சந்தை ஏற்றம்.. ஒரே வாரத்தில் 39,000 கோடியை சம்பாதித்த முகேஷ் அம்பானி..

இந்திய பங்குச்சந்தைகள் சரிவு பாதையில் இருந்து மீண்டு வளர்ச்சி பாதையை நோக்கி திரும்பியுள்ளன. இதனால் ரிலையன்ஸ் நிறுவனத்தின் பங்கு மதிப்புகள் மற்றும் சந்தை மூலதன மதிப்பு உயர்ந்துள்ளது. இதன் காரணமாக கடந்த ஐந்து நாட்களில் மட்டும் முகேஷ் அம்பானியின் சொத்து மதிப்பில் 39 ஆயிரம் கோடி ரூபாய் சேர்ந்து இருக்கிறது.

ரிலையன்ஸ் இண்டஸ்ட்ரீஸ் நிறுவனம் இந்தியாவிலேயே அதிக மூலதன மதிப்பு கொண்ட ஒரு நிறுவனம் என்ற பெருமையை பெற்றுள்ளது. இதற்கு அடுத்தபடியாக ஹெச்டிஎஃப்சி வங்கியும், மூன்றாவது இடத்தில் டிசிஎஸ் நிறுவனமும், நான்காவது இடத்தில் ஏர்டெல் நிறுவனமும் இருக்கின்றன. இந்திய பங்குச் சந்தைகள் கடந்த ஆறு மாதங்களாக சரிவுப் பாதையில் இருந்த நிலையில் கடந்த ஒரு வார காலமாக மீண்டும் வளர்ச்சி பாதையை நோக்கி திரும்பி உள்ளன.

இதன் காரணமாக இந்திய பங்குச்சந்தையில் பட்டியலிடப்பட்டிருக்கும் நிறுவனங்களின் பங்கு மதிப்பும் படிப்படியாக அதிகரித்து வருகிறது. அந்த வகையில் இந்தியாவில் கடந்த ஒரு வார காலத்தில் மட்டும் முக்கியமான பத்து நிறுவனங்களின் சந்தை மூலதன மதிப்பில் 3 லட்சம் கோடி ரூபாய் சேர்ந்திருக்கிறது. இதில் ஐசிஐசிஐ வங்கி மற்றும் பாரதி ஏர்டெல் நிறுவனங்களின் பங்கு மதிப்புகள் கணிசமான அளவு உயர்ந்து பெரிய பங்களிப்பை தந்துள்ளன.

பங்குச்சந்தை தொடர்பாக வெளியாகியுள்ள தரவுகளின் படி பார்க்கும்போது கடந்த ஒரு வார காலத்தில் மும்பை பங்குச்சந்தை குறியீட்டு எண்ணான சென்செக்ஸ் 4.16 சதவீதம் உயர்ந்திருக்கிறது. அதேவேளையில் தேசிய பங்கு சந்தை குறியீட்டு எண் நிப்டி 4.25% உயர்ந்திருக்கிறது. ரிலையன்ஸ் இண்டஸ்ட்ரீஸ் லிமிடெட் நிறுவனத்தை பொருத்தவரை கடந்த ஒரு வார காலத்தில் 66 , 988 கோடி ரூபாய் கூடுதலாக சேர்ந்து அதன் மொத்த சந்தை மூலதன மதிப்பு 16 ,90,000 ஆயிரம் கோடியாக அதிகரித்திருக்கிறது.

ஒட்டுமொத்தமாக பங்குச்சந்தை மதிப்பு உயர்வதற்கு இந்த நிறுவனத்தின் பங்களிப்பு அதிகமாக இருப்பதாக சொல்லப்படுகிறது. முகேஷ் அம்பானியை பொருத்தவரை ரிலையன்ஸின் பங்கு மதிப்பு உயர்ந்ததால் அவருடைய சொத்து மதிப்பில் 39,000 கோடி ரூபாய் சேர்ந்து மார்ச் 23ஆம் தேதி நிலவரப்படி அவருடைய சொத்து மதிப்பு 95 பில்லியன் டாலர்கள் என்ற நிலையில் இருக்கிறது. இதன் மூலம் இந்தியாவின் நம்பர் ஒன் பணக்காரராகவும் உலக அளவில் 18ஆவது பணக்காரராகவும் அவர் தொடர்ந்து தன்னுடைய இடத்தை தக்க வைத்திருக்கிறார்.

மார்ச் 24ஆம் தேதி நிலவரப்படி ரிலையன்ஸ் இன்டஸ்ட்ரீஸ் நிறுவனத்தின் பங்கு மதிப்பு 1302 ரூபாய் என்ற வர்த்தகமானது. கடந்த 5 நாட்களில் ரிலையன்ஸ் நிறுவனத்தின் பங்கு மதிப்பு 4.90 சதவீதம் உயர்வு கண்டுள்ளது.