சின்டெக்ஸ்.. முகேஷ் அம்பானி ஷாப்பிங் லிஸ்ட்-ல் சேர்ந்த அடுத்த நிறுவனம்..!

இந்தியாவில் கொரோனா தொற்றுக் காலத்தில் பல முன்னணி டெக்ஸ்டைல் நிறுவனங்கள் அதிகளவிலான வர்த்தகப் பாதிப்பை எதிர்கொண்ட நிலையில், சில நிறுவனங்களால் வாங்கிய கடனை திருப்பிச் செலுத்த முடியாமல் திவால் ஆனது. அப்படித் திவாலான நிறுவனம் தான் சின்டெக்ஸ் இண்டஸ்ட்ரீஸ்.

பொதுவாக முகேஷ் அம்பானி திவாலான நிறுவனத்தைக் கைப்பற்றுவதில் விருப்பம் காட்டுவது இல்லை, ஆனால் சமீபத்தில் டெக்ஸ்டைல் மற்றும் பிற முக்கியமான துறையில் நிறுவனத்தை வேகமாக விரிவாக்கம் செய்து வரும் காரணத்தால் குறைந்த விலையில் கிடைக்கும் நிறுவனத்தைக் கைப்பற்றுவதில் ஆர்வம் காட்டி வருகிறார்.

இதன் வாயிலாகத் திவாலான சின்டெக்ஸ் இண்டஸ்ட்ரீஸ் நிறுவனத்தைக் கைப்பற்ற முகேஷ் அம்பானியின் ரிலையன்ஸ் இண்டஸ்ட்ரீஸ் விருப்பம் தெரிவித்துள்ளது.

ரிலையன்ஸ் இண்டஸ்ட்ரீஸ்

டெக்ஸ்டைல் துறை வர்த்தகத்தை அதிரடியாக விரிவாக்கம் செய்து வரும் ரிலையன்ஸ் இண்டஸ்ட்ரீஸ் திவாலான சின்டெக்ஸ் இண்டஸ்ட்ரீஸ் நிறுவனத்தைக் கைப்பற்ற வேண்டும் என்பதற்காகத் தனியாக ரிஸ்க் எடுக்காமல் ACRE நிறுவனத்துடன் சேர்ந்து விருப்ப விண்ணப்பம் கொடுத்துள்ளது.

16 நிறுவனங்கள் விருப்பம்

சின்டெக்ஸ் இண்டஸ்ட்ரீஸ் நிறுவனத்தைக் கைப்பற்ற ரிலையன்ஸ் கூட்டணி மட்டும் அல்லாமல் ஆதித்யா பிர்லா-வின் வர்தே கேபிடல், வெல்ஸ்பன், வெளிநாட்டு முதலீட்டு நிறுவனமான கார்வால் முதலீட்டாளர்கள், Edelweiss, ப்ரூடென்ட் ஏஆர்சி, டிரைடென்ட் என மொத்தம் 16 நிறுவனங்கள் இந்நிறுவனத்தைக் கைப்பற்ற விருப்ப விண்ணப்பம் கொடுத்துள்ளது.

சின்டெக்ஸ் இண்டஸ்ட்ரீஸ்

அப்படி சின்டெக்ஸ் இண்டஸ்ட்ரீஸ் நிறுவனத்தில் என்ன ஸ்பெஷல். சின்டெக்ஸ் இண்டஸ்ட்ரீஸ் மிகவும் வேகமாக வளர்ந்து வந்த முக்கியமான டெக்ஸ்டைல் மற்றும் யார்ன் நிறுவனம். குறிப்பாக இந்நிறுவனத்திடம் அர்மானி, ஹூகோ பாஸ், டீசல், பர்பரி போன்ற முன்னணி பிராண்டுகளுடன் டீலிங் உள்ளது.

அலோக் இண்ட்ஸ்ட்ரீஸ்

திவாலான நிறுவனத்தைக் கைப்பற்ற விரும்பாத ரிலையன்ஸ் இண்டஸ்ட்ரீஸ் சமீபத்தில் அலோக் இண்ட்ஸ்ட்ரீஸ் நிறுவனத்தை ஜேஎம் பைனான்சியல் நிறுவனத்துடன் இணைந்து கைப்பற்றியது. தற்போது சின்டெக்ஸ் இண்டஸ்ட்ரீஸ் நிறுவனத்தைக் கைப்பற்ற வேண்டும் என்பதற்காகத் தனியாக ரிஸ்க் எடுக்காமல் ரிலையன்ஸ் இண்டஸ்ட்ரீஸ் ACRE நிறுவனத்துடன் சேர்ந்து விருப்ப விண்ணப்பம் கொடுத்துள்ளது.

சின்டெக்ஸ் இண்டஸ்ட்ரீஸ்

குஜராத்-ல் தலைமையாகக் கொண்டு வர்த்தகம் செய்யும் சின்டெக்ஸ் இண்டஸ்ட்ரீஸ் தனது முக்கிய முதலீட்டாளரான இன்வெஸ்கோ சொத்து மேலாண்மை நிறுவனத்திற்கு அளிக்க வேண்டிய 15.4 கோடி ரூபாய் பேமெண்ட்-ஐ செலுத்தாத காரணத்தால் அகமதாபாத் NCLT நீதிமன்றத்தில் வழக்குத் தொடுக்கப்பட்டது.

7,534.6 கோடி ரூபாய்க் கடன்

இந்நிலையில் சின்டெக்ஸ் இண்டஸ்ட்ரீஸ் சுமார் 27 நிதி நிறுவனங்களுக்குக் கொடுக்க வேண்டிய 7,534.6 கோடி ரூபாய் அளவிலான கடனை கருத்தில் கொண்டு ஏப்ரல் 2021ல் இந்நிறுவனத்தைத் திவாலாக அறிவிக்கப்பட்டு, தீர்வுக்கான நடவடிக்கை எடுக்கப்பட்டது.

வெல்ஸ்பன் நிறுவனம்

இதைத்தொடர்ந்து வெல்ஸ்பன் நிறுவனம் சின்டெக்ஸ் இண்டஸ்ட்ரீஸ் நிறுவனத்தை மொத்தமாக 1,950 கோடி ரூபாய் தொகைக்குக் கைப்பற்றுவதாக அறிவித்த நிலையில், இந்நிறுவனத்திற்குக் கடன் கொடுத்த 27 நிதி நிறுவனங்களும் மறுப்புத் தெரிவித்தது.

விருப்ப விண்ணப்பங்கள்

இந்நிலையில் தற்போது சின்டெக்ஸ் இண்டஸ்ட்ரீஸ் நிறுவனத்தைக் கைப்பற்ற விருப்ப விண்ணப்பத்தைப் பெற துவங்கியுள்ளது 27 நிதி நிறுவனங்கள் தலைமையிலான குழு. சின்டெக்ஸ் இண்டஸ்ட்ரீஸ்-ஐ ரிலையன்ஸ் கைப்பற்ற அதிக வாய்ப்பு உள்ளது.

சின்டெக்ஸ் டேங்க்

சின்டெக்ஸ் இண்டஸ்ட்ரீஸ், இந்தியாவில் மிகவும் பிரபலமான வாட்டர் டாங்க் தயாரிக்கும் பிராண்டு தான். ஆனால் 2017ல் வாட்டர் டாங்க் தயாரிக்கும் வர்த்தகம் மற்றும் அனைத்து சொத்துக்களையும் சின்டெக்ஸ் பிளாஸ்டிக் டெக்னாலஜி லிமிடெட் நிறுவனத்திற்குத் தனியாகப் பிரிக்கப்பட்டது. இதன் மூலம் சின்டெக்ஸ் இண்டஸ்ட்ரீஸ் நிறுவனத்தில் தற்போது டெக்ஸ்டைல்ஸ் மற்றும் யார்ன் (நூல்) தயாரிப்பு வர்த்தகம் மட்டுமே உள்ளது.