பண மழை.. வெறும் 5 நாளில் 70000 கோடி.. முகேஷ் அம்பானி சுக்கிரன் உச்சம்..!

முகேஷ் அம்பானி-யின் ரிலையன்ஸ் இண்டஸ்ட்ரீஸ் சாம்ராஜ்ஜியம் தனது முதலீட்டாளர்களுக்கு மிகப்பெரிய முதலீட்டு வாய்ப்பை கொடுத்துள்ளது. ஜூலை 20 ஆம் தேதி இந்திய பங்குச்சந்தையில் இரண்டாவதாக ஒரு ரிலையன்ஸ் இண்டஸ்ட்ரீஸ் நிறுவனம் பட்டியலிடப்பட உள்ளதால் கடந்த ஒரு வாரத்தில் ரிலையன்ஸ் இண்டஸ்ட்ரீஸ் பங்குகள் மீது அதிகப்படியான முதலீடுகள் குவிந்தது.

ரிலையன்ஸ் இண்டஸ்ட்ரீஸ் குழுமத்தில் இருக்கும் ரிலையன்ஸ் ஸ்ட்ராடஜிக் இன்வெஸ்ட்மென்ட்ஸ் என்னும் நிதி சேவை பிரிவை ஜூலை 20 ஆம் தேதி தனியாக பிரித்து அதை மும்பை பங்குச்சந்தையில் பட்டியலிட உள்ளது. இதன் மூலம் முகேஷ் அம்பானியின் நீண்ட நாள் ஐபிஓ கனவு நினைவாகிறது.

மொத்த குழுமத்தில் இருந்து தனியாக பிரிக்கப்படும் காரணத்தால் ரிலையன்ஸ் பங்குகளை வைத்திருக்கும் அனைத்து முதலீட்டாளர்களுக்கும் 1:1 என்ற கணக்கில் ரிலையன்ஸ் ஸ்ட்ராடஜிக் இன்வெஸ்ட்மென்ட்ஸ் என்னும் ஜியோ பைனான்சியல் சர்வீசஸ் பங்குகள் அளிக்கப்பட உள்ளது. அதாவது யாரெல்லாம் எத்தனை ரிலையன்ஸ் இண்டஸ்ட்ரீஸ் பங்குகள் வைத்துள்ளார்களோ, அவர்களுக்கு இதே எண்ணிக்கையில் ஜியோ பைனான்சியல் சர்வீசஸ் பங்குகள் அளிக்கப்பட உள்ளது.

இது கிட்டத்தட்ட ஐபிஓ-வுக்க இணையான ஒரு முதலீட்டு வாய்ப்பு என்பதால் ரீடைல் முதலீட்டாளர்கள் முதல் தனியார் பங்கு முதலீட்டாளர்கள் வரையில் பெரும் தொகையை ரிலையன்ஸ் பங்குகளில் முதலீடு செய்து வருகின்றனர். இது ரிலையன்ஸ் இண்ட்ஸ்ட்ரீஸ் மீது அதிகப்படியான முதலீட்டு நம்பிக்கை வைத்திருக்கும் அனைவருக்கும் முக்கிய வாய்ப்பாக உள்ளது.

இதன் வாயிலாக கடந்த ஒரு வாரத்தில் மட்டும் ரிலையன்ஸ் இண்டஸ்ட்ரீஸ் குழுமத்தின் சந்தை மதிப்பு சுமார் 69,990.57 கோடி ரூபாய் அதிகரித்துள்ளது, இதனால் ரிலையன்ஸ் சாம்ரஜ்ஜியத்தின் மொத்த மதிப்பு 18.53 லட்சம் கோடி ரூபாயாக உயர்ந்துள்ளது.

இதுகுறித்து ஜெப்ரீஸ் வெளியிட்டுள்ள அறிக்கையில் ஜியோ பைனான்சியல் சர்வீசஸ் நிறுவனம் 90000 முதல் 15000 கோடி ரூபாய் அளவில் மதிப்பிடப்பட்டு உள்ளது. இதன் மூலம் ஒரு பங்கு விலை 134 முதல் 224 ரூபாய் வரையில் மதிப்பிடப்பட்டு உள்ளது. இதன் மூலம் ஜியோ பைனான்சியல் சர்வீசஸ் நிறுவனம் நாட்டின் 5வது பெரிய நிதி சேவை நிறுவனமாக உள்ளது.