7,000 வீடுகளுக்கு சமமான மின்நுகர்வு.. அம்பானியின் அன்டிலியா பங்களாவின் மின்கட்டணம் எவ்வளவு தெரியுமா?

இந்தியாவின் மிகப் பெரிய தொழிலதிபரும், ஆசியாவின் பணக்காரர்களில் ஒருவருமான முகேஷ் அம்பானி, அவரது மனைவி நிதா அம்பானி மற்றும் குடும்பத்தினருடன் வசிக்கும் மாளிகைதான் 'அன்டிலியா' (Antilia). மும்பையின் முக்கியமான பகுதியான கும்பாலா ஹில்லில் 27 தளங்களில், சுமார் 1.120 ஏக்கர் பரப்பளவில் இந்த பிரம்மாண்டமான கட்டிடம் அமைந்துள்ளது. இந்த அரண்மனையின் ஆடம்பரம் ஒருபுறம் இருக்க, அது பயன்படுத்தும் மின்சாரத்தின் அளவும், அதற்கான செலவும் நம்மை பிரமிக்க வைக்கிறது.

அன்டிலியா மாளிகையானது வெறும் குடியிருப்பு மட்டுமல்ல.. அது நவீன தொழில்நுட்பத்தின் அடையாளமாக உயர்ந்து நிற்கும் ஒரு வானுயர்ந்த கட்டிடம் ஆகும். இதில் 9 லிஃப்ட்கள், 3 ஹெலிபேடுகள், 160 கார்கள் நிறுத்தும் பிரம்மாண்ட கார் பார்க்கிங் எனப் பல வசதிகள் உள்ளன. இந்த மாளிகையைப் பராமரிப்பதற்கென்றே தோட்டக்காரர்கள், சமையல்காரர்கள், தொழில்நுட்ப ஊழியர்கள் என 600-க்கும் மேற்பட்டோர் பணியாற்றுகின்றனர். அனைத்து அறைகளிலும் உள்ள அதிநவீன கருவிகள் சீராக இயங்க, இந்த மாளிகைக்கு மிகப்பெரிய அளவில் மின்சாரம் தேவைப்படுகிறது.

சந்தை அறிக்கைகளின்படி, அன்டிலியாவில் உள்ள ஒவ்வொரு அறையும் தினமும் அல்லது ஒரு குறிப்பிட்ட கால வரம்பில் சராசரியாக 300 யூனிட் மின்சாரத்தைப் பயன்படுத்துகிறது. ஒட்டுமொத்த மாளிகையும் ஒரு மாதத்திற்கு சராசரியாக 6,37,240 யூனிட் மின்சாரத்தை நுகர்கிறது. இந்த அளவு மின்சாரம் என்பது, மும்பையில் இருக்கும் சராசரியாக 7,000 நடுத்தரக் குடும்பங்கள் ஒரு மாதத்திற்குப் பயன்படுத்தும் மொத்த மின்சாரத்திற்கு சமமாகும்.

மாதம் ரூ.70 லட்சம் பில் கட்டும் அம்பானி : இந்த மிகப்பெரிய மின்தேவையின் விளைவாக, முகேஷ் அம்பானியின் மாதாந்திர மின்சாரக் கட்டணம் பலரையும் வியப்பில் ஆழ்த்துகிறது. சமீபத்திய தகவல்களின்படி, அன்டிலியா மாளிகைக்கு அம்பானி செலுத்தும் மாதாந்திர மின்கட்டணம் சுமார் ரூ.70 லட்சம் ஆகும். இதில் ரூ.48,354 தள்ளுபடியாகக் கிடைப்பதாகவும் கூறப்படுகிறது. மாளிகையின் கீழ் தளத்தில் இருக்கும் ஏர் கண்டிஷனிங் செய்யப்பட்ட கார் பார்க்கிங் பகுதியும், அதிநவீன குளிர்சாதன அமைப்புகளும்தான் அதிக மின்சாரத்தை இழுத்து, இந்த மின்கட்டண உயர்வுக்கு முக்கிய காரணமாக இருக்கின்றன.

மாளிகையில் பணிபுரியும் ஊழியர்கள் சிலர் தெரிவித்த தகவலின்படி, காலப்போக்கில் பல உயர் தொழில்நுட்ப வசதிகளை மேம்படுத்தியதாலும், புதிய வசதிகளை நிறுவியதாலும்தான் மாளிகையின் மின்சாரச் செலவு இவ்வளவு அதிகமாக உயர்ந்துள்ளது.

உலகின் விலையுயர்ந்த இல்லம் : தகவலின்படி, சுமார் ரூ.15,000 கோடி மதிப்புடையதாக மதிப்பிடப்படும் அன்டிலியா, உலகின் மிக விலையுயர்ந்த தனியார் இல்லங்களில் ஒன்றாக திகழ்கிறது. இதில் உடற்பயிற்சிக் கூடம், தனிப்பட்ட ஸ்பா, தனிப்பட்ட திரைப்பட அரங்கம், நீச்சல் குளங்கள், கோவில், சுகாதார வசதிகள் எனப் பல உயர்ரக வசதிகள் உள்ளன. ஸ்பெயினில் உள்ள ஒரு தீவின் பெயரால் இதற்குப் பெயரிடப்பட்டது.

இந்த மாளிகையை வடிவமைத்த 'பெர்கின்ஸ் அண்ட் வில்' என்ற அமெரிக்க நிறுவனம், இதன் கட்டமைப்பில் அதிநவீன பூகம்ப எதிர்ப்பு அம்சங்களை இணைத்துள்ளது. அதாவது, ரிக்டர் அளவில் 8.0 வரை ஏற்படும் பூகம்பங்களைத் தாங்கும் திறன் கொண்டது இந்த அன்டிலியா மாளிகை. 27 தளங்களைக் கொண்ட இந்த மாளிகையின் பிரம்மாண்டத்தைப பார்ப்பவர்கள் ஆச்சரியப்படும் வகையில், இதன் ஒவ்வொரு தளமும் வேறுபட்ட வடிவம் மற்றும் வடிவமைப்பைக் கொண்டுள்ளது. மேலும், இதன் உட்புறங்கள் தாமரை மற்றும் சூரிய வடிவங்களால் அலங்கரிக்கப்பட்டு, கண்கவர் தோற்றத்தை அளிக்கின்றன.