நாக்பூர் நிதி நிறுவனத்தின் உரிமம் ரத்து.. ஆர்பிஐ அதிரடி நடவடிக்கை..!!

இந்திய ரிசர்வ் வங்கி (RBI) ஒழுங்குமுறை விதிமுறைகளை மீறியதற்காகவும், முறையற்ற வகையில் கடன் வழங்கிய காரணத்தாலும் நாக்பூர்-ஐ அடிப்படையிலான ஜாவ்ரான் பைனான்ஸ் நிறுவனத்தின் பதிவு சான்றிதழை ரத்து செய்துள்ளது. இதன் மூலம், இனி Zavron Finance நிதி நிறுவனமாகச் செயல்படத் தடை விதிக்கப்பட்டுள்ளது.

ரிசர்வ் வங்கியின் விசாரணையில், Zavron Finance கடன் மதிப்பீடு, கடன் வழங்கல், வட்டி விகித நிர்ணயம் மற்றும் KYC சரிபார்ப்பு உள்ளிட்ட முக்கிய முடிவு எடுக்கும் செயல்பாடுகளை மூன்றாம் தரப்பு சேவை வழங்குநர்களுக்கு ஒப்படைத்துள்ளது தெரியவந்துள்ளது. இது RBI விதிமுறைகளுக்கு முரணானது. இத்தகைய முக்கிய செயல்பாடுகள் நிறுவனத்தின் கட்டுப்பாட்டில் இருக்க வேண்டும் என்று விதிமுறைகள் கூறுகின்றன.

மேலும், இந்த மூன்றாம் தரப்பு சேவை வழங்குநர்களின் திறமை, பாதுகாப்பு நடவடிக்கைகள், உள் கட்டுப்பாடுகள் மற்றும் உரிமையாளர் கட்டமைப்பு ஆகியவற்றை மதிப்பிடுவதில் நிறுவனம் தவறிவிட்டது. கூடுதலாக, இந்த சேவை வழங்குநர்களால் செயல்படுத்தப்பட்ட பாதுகாப்பு நடைமுறைகள் மற்றும் கட்டுப்பாட்டுச் செயல்முறைகளைக் கண்காணித்து மதிப்பாய்வு செய்ய போதுமான கண்காணிப்பு வழிமுறைகளை ஜாவ்ரான் நிதி ஏற்படுத்தவில்லை. இதனால் வாடிக்கையாளர் தரவு பாதுகாப்பு அச்சுறுத்தலுக்கு உள்ளாகியுள்ளது.

மேலும், வாடிக்கையாளர்களுக்குக் கடன் ஒப்பந்தம் மற்றும் அனுமதி கடிதத்தை மொழிபெயர்ப்பு செய்து பிற மொழியில் வழங்கத் தவறியதால், நியாயமான நடைமுறை விதிமுறைகளை நிறுவனம் பின்பற்றவில்லை என்றும் RBI குறிப்பிட்டுள்ளது.

பதிவுச் சான்றிதழ் ரத்து செய்யப்பட்டதால், ஜாவ்ரான் பைனான்ஸ் எந்தவொரு NBFC தொடர்பான வர்த்தகத்தையும் இனி செய்ய முடியாது.

இந்த நிறுவனம் பைனன்ஸ் இன்ஃபர்மேஷன் டெக்னாலஜி, மைக்ரோகார்ட் இந்தியா டெக்னாலஜி கன்சல்டிங் சர்வீஸ், ட்ரூதிஃப் ஃபின்டெக், ஜேசிஃப்ளாஷ் டெக்னாலஜீஸ் (ஃப்ளாஷ் கேஷ்), கேஷ் புல் ஃபைனான்சியல் டெக்னாலஜி, அனிஞ் கிரெடிட் (கேஷ் மமா), கிரேசிரூபி மற்றும் ஜிங்காஷ் உள்ளிட்ட பல சேவை வழங்குநர்கள் மற்றும் மொபைல் ஆப்‌களுடன் இணைக்கப்பட்டுள்ளது.