வழிக்கு வந்த இன்ஃபோசிஸ் நாராயண மூர்த்தி.. 70 மணிநேரம் வேலை எல்லாம் தவறுதான்..!!

இந்தியாவின் 2வது பெரிய ஐடி சேவை நிறுவனமான இன்ஃபோசிஸ்-ன் இணை நிறுவனர் நாராயண மூர்த்தி, கடந்த ஆண்டு நாட்டில் உள்ள அனைத்து இளைஞர்களையும் வாரத்திற்கு 70 மணி நேர வேலை செய்ய வேண்டும் என பேசியது இப்போது வரையில் டிரெண்டிங் ஆக உள்ளது. குறிப்பாக சில நாட்களுக்கு முன் எல் அண்டு டி தலைவர் வாரத்திற்கு 90 மணிநேரம், ஞாயிற்றுக்கிழமையும் பணியாற்ற வேண்டும் என கூறிய பின்பு மீண்டும் நாராயண மூர்த்தி-யின் 70 மணிநேரம் பேச்சு வைரலானது.

இந்த நிலையில் நாராயண மூர்த்தி தனது கருத்து குறித்து தற்போது விளக்கம் கொடுத்துள்ளார். எந்தொரு நிறுவனமும் தங்களது ஊழியர்கள் மீது இத்தகைய 70 மணிநேர பணி நேரத்தை திணிக்க முடியாது என்று அவர் தெளிவுபடுத்தினார். IMC இன் கிலாசந்த் நினைவு சொற்பொழிவில் பேசிய அவர், தனது நிலைப்பாடு குறித்து விளக்கம் அளித்தார்.

"நீங்கள் இதைச் செய்ய வேண்டும், இதைச் செய்யக்கூடாது என்று யாரும் சொல்ல முடியாது" என்று திட்டவட்டமாக நாராயண மூர்த்தி கூறினார். இதை தொடர்ந்து அவர் பேசுகையில், இன்ஃபோசிஸை உருவாக்கும் ஆரம்ப ஆண்டுகளில் தனது சொந்த அனுபவத்தைப் பற்றியும் பகிர்ந்து கொண்டார்.

"நான் காலை 6:20 மணிக்கு அலுவலகத்திற்கு சென்று இரவு 8:30 மணிக்கு வெளியேறுவேன். நான் அதை 40 வருடங்களாக செய்திருக்கிறேன். இது உண்மை, எனவே யாரும் இதை தவறு என்று சொல்ல முடியாது." என தனது சொந்த அனுபவத்தை பகிர்ந்துகொண்டார்.

நாராயண மூர்த்தி கடைசியாக வேலை நேரத்தைப் பற்றிய முடிவுகள் மிகவும் தனிப்பட்டவை மற்றும் பொது விவாதத்திற்கு ஏற்றவை அல்ல என்றும் தெரிவித்து, தனது 70 மணிநேர பணியின் சர்ச்சைக்கு முற்றுப்புள்ளி வைத்தார்.

ஒவ்வொருவரும் தங்கள் தனிப்பட்ட சூழ்நிலைகள் மற்றும் முக்கியத்துவம் அடிப்படையில் வொர்க் லைப் பேலன்ஸ்-ஐ தீர்மானிக்க வேண்டும் என்று அவர் கூறினார். இதேபோன்ற கருத்தை தான் சமீபத்தில் மற்றொரு பெரும்புள்ளி தெரிவித்தார்.

இந்தியாவின் இரண்டாவது பெரும் பணக்காரரான கௌதம் அதானி, சமீபத்தில் ஒரு நேர்காணலில் வொர்க் - லைப் பேலன்ஸ் குறித்த தனது பார்வையைப் பகிர்ந்து கொண்டார்.

இதில் பேசிய கௌதம் அதானி "உங்கள் வொர்க் - லைப் பேலன்ஸ் பற்றிய கருத்து என் மீது திணிக்கப்படக்கூடாது, இதேபோல் எனது வொர்க் - லைப் பேலன்ஸ் நிலையை உங்கள் மீது நான் திணிக்கக்கூடாது." வொர்க் - லைப் பேலன்ஸ் என்பது நபருக்கு நபர் மாறுபடும் என தெரிவித்தார்.