Nayanthara: ரூ.200 கோடியை தாண்டிய நயன்தாராவின் சொத்து மதிப்பு.. சொகுசு பங்களா முதல் தனி விமானம் வரை!

இந்திய நடிகைகளிலேயே அதிக சம்பளம் வாங்கும் நட்சத்திரங்களில் ஒருவராக கருதப்படும் லேடி சூப்பர் ஸ்டார் நயன்தாரா, இன்று (நவம்பர் 18) தனது 41-வது பிறந்தநாளை கொண்டாடுகிறார். கிட்டத்தட்ட 20 வருடங்களாக தமிழ், தெலுங்கு, மலையாளம் மற்றும் இந்தி திரையுலகில் அவர் கோலோச்சி வருகிறார்.

நயன்தாராவின் சினிமாப் பயணம் மிகவும் சுவாரசியமானது. அவர் கல்லூரியில் படித்துக் கொண்டிருந்தபோது, மாடலாகப் பணியாற்றியிருக்கிறார். அப்போதுதான் இயக்குநர் சத்யன் அந்திக்காடு அவரை கவனித்து, தனது மலையாளப் படமான 'மனசினக்கரே' (2003)-இல் நடிக்க அழைத்தார். முதலில் நடிக்க மறுத்த நயன்தாரா, "ஒரே ஒரு படம் மட்டும்" செய்வதாகச் சம்மதித்தார். ஆனால், அவரது அபார நடிப்பு திறமையைக் கண்ட இயக்குநர்கள், அவரைத் தேடி வந்து வாய்ப்புகளைக் கொடுத்தனர். இதனால், 75-க்கும் மேற்பட்ட படங்களில் நடித்து, இன்று இந்திய சினிமாவின் தவிர்க்க முடியாத சக்தியாக அவர் உயர்ந்து நிற்கிறார்.

விருதுகளை குவித்த ஐகானிக் கதாபாத்திரங்கள் : நயன்தாரா வெறும் கவர்ச்சிக்காக மட்டும் அல்ல; அவரது திறமையான நடிப்புக்காகவே கொண்டாடப்பட்டவர். அவர் 5 ஃபிலிம்பேர் விருதுகள் உட்பட பல முக்கிய விருதுகளைப் பெற்றிருக்கிறார்.

சந்திரமுகி (2005), கஜினி (2005), பில்லா (2007), தனி ஒருவன் (2015) போன்ற பிளாக்பஸ்டர் படங்களில் நடித்திருந்தாலும், கதாநாயகிக்கு முக்கியத்துவம் உள்ள படங்களான ராஜா ராணி (2013), நானும் ரவுடிதான் (2015) மற்றும் சமூகப் பிரச்சனை பேசிய அறம் (2017) போன்ற படங்களின் மூலம் அவர் தனிப்பட்ட நடிகையாக நிலை பெற்றார்.

மாயா என்ற ஹாரர் படத்தில் அவர் ஏற்று நடித்த 'தனித் தாய்' கதாபாத்திரம், கோலமாவு கோகிலா படத்தில் அவர் நடித்த வித்யாசமான கதாபாத்திரம் ஆகியவை ரசிகர்கள் மத்தியில் பெரும் வரவேற்பைப் பெற்றன. அண்மையில், மாதவன் மற்றும் சித்தார்த்துடன் இணைந்து 'டெஸ்ட்' என்ற திரில்லர் படத்தில் அவர் நடித்திருந்தார்.

இந்திய சினிமாவில் அவரது தாக்கம் : நயன்தாரா பெண் கதாநாயகி மையப்படுத்தப்பட்ட (Female-Centric) படங்களை வெற்றிகரமாக ஓடவைத்தார். ஒரு பெரிய ஆண் சூப்பர் ஸ்டார் இல்லாமல், ஒரு பெண் நடிகை மட்டுமே தனது படத்தை தாங்கிப் பிடித்து, பெரிய வசூலை குவிக்க முடியும் என்பதை அவர் நிரூபித்தார். இந்தத் துணிச்சலான தேர்வுகள், புதிய நடிகைகளுக்கும், தயாரிப்பாளர்களுக்கும் தைரியத்தை கொடுத்து, சினிமாவின் மரபுகளை உடைக்க உதவியது. 2023-ஆம் ஆண்டில் ஷாருக்கானுடன் அவர் அறிமுகமான 'ஜவான்' திரைப்படம், இந்திய அளவில் அவரது புகழை மேலும் உயர்த்தியது.

நயன்தாராவின் சொத்து மதிப்பு எவ்வளவு..?:இன்று, நயன்தாரா ஒரு படத்திற்கு ரூ.5 கோடி முதல் ரூ.10 கோடி வரை சம்பளம் வாங்குவதாக கூறப்படுகிறது. அந்தவகையில், இவர் தென்னிந்தியாவின் அதிக சம்பளம் வாங்கும் நடிகையாக இருக்கிறார். அவருடைய மொத்த சொத்து மதிப்பு ரூ.200 கோடிக்கும் அதிகம் என்று மதிப்பிடப்பட்டுள்ளது. மும்பையில் ரூ.100 கோடி மதிப்புள்ள வீடு, பல சொகுசு கார்கள் மற்றும் ஒரு தனி விமானம் என தனது கணவர் விக்னேஷ் சிவன் மற்றும் இரண்டு குழந்தைகளுடன் அவர் ஆடம்பரமாக வாழ்ந்து வருகிறார்.