இந்தியாவின் வளர்ச்சி இம்புட்டு தான்.. புட்டு புட்டு வைக்கும் ஆய்வுகள்.. கவலையில் மத்திய அரசு..!

இந்தியா நிச்சயம் பாதிக்கப்படலாம்

இந்திய பொருளாதாரம் தற்போது தான் சற்றே துளிர் விடத் தொடங்கியுள்ள நிலையில், சீனாவில் நிலை கொண்டுள்ள கொரோனா வைரஸ் என்னும் அதி தீவிர வைரஸ் அலை தற்போது உலகம் முழுக்க பரவி வருகிறது. சொல்லப்போனால் உலக நாடுகள் அத்துணையும் பொருளாதார ரீதியாக பெரும் தாக்கத்தை எதிர்கொள்ளலாம் என்றும் கூறப்படுகிறது. அதிலும் சீனாவின் முக்கிய வர்த்தக பங்காளியான இந்தியாவில் வளர்ச்சி நிச்சயம் பாதிக்கப்படலாம் என்றும் கூறப்படுகிறது.

ஜிடிபி கணிப்பு

இந்த நிலையில் ஆராய்ச்சி நிறுவனங்கள் ஏற்கனவே பல முறை, இந்தியாவின் ஜிடிபி விகிதத்தினை குறைத்துள்ள நிலையில், இன்னும் குறைக்கலாமா? என்று ஆராய்ந்து வருகின்றன. இந்த நிலையில் தான் நேஷனல் கவுன்சில் ஆஃப் அப்ளைடு எக்னாமிக் ரிசர்ச் (என்சிஏஇஆர்) இந்தியாவின் பொருளாதார வளர்ச்சி 4.9% ஆக இருக்கும் என்றும் தெரிவித்துள்ளது.

 

முந்தைய கணிப்புகளை விட கணிப்பு

ஏற்கனவே நடப்பு நிதியாண்டின் முதல் இரண்டு காலாண்டுகளிலும் வளர்ச்சி ஆறு ஆண்டுகளில் இல்லாத அளவுக்கு வீழ்ச்சி கண்டுள்ள நிலையில், தற்போது முழு நிதியாண்டிற்கான வளர்ச்சி விகிதமே 4.9% என கொடுத்திருப்பது பெரும் கவலையை ஏற்படுத்தும் விதமாக உள்ளது. இதுவே என்எஸ்ஓ (NSO) அமைப்பாவது 5% ஆக இந்த வளர்ச்சி விகிதத்தினை கணித்திருந்தது. ஆனால் NCAER அதவிட குறைத்துள்ளது குறிப்பிடத்தக்கது.

வளர்ச்சி இம்புட்டு தான்

அதே போல் இந்தியப் பொருளாதாரம் கடந்த 2018 - 19ல் 6.1% வளர்ச்சி கண்டிருந்த நிலையில், நடப்பு நிதியாண்டில் அது 4.9% ஆக இருக்கும் என்றும், அதிலும் குறிப்பாக இந்த வளர்ச்சி மூன்றாவது காலாண்டில் 4.9% ஆகவும், நான்காவது காலாண்டில் 5.1% ஆகவும் காணப்படும் என்றும் மதிப்பிடப்பட்டுள்ளது. இருப்பினும் 2020 - 21ல் பொருளாதாரம் 5.6% வளர்ச்சி காணும் என்று NCAER தெரிவித்துள்ளது.

இதுவும் காரணமாக இருக்கலாம்

தேசிய புள்ளியியல் அலுவலகம் நடப்ப நிதியாண்டின் வளர்ச்சி 5% ஆக இருக்கும் என்று மதிப்பிட்டிருந்த நிலையில், NCAER அதைவிட குறைந்திருப்பது குறிப்பிடத்தக்கது. இதற்கு முக்கிய காரணம் நடப்பு நிதியாண்டின் இரண்டாவது மற்றும் மூன்றாவது காலாண்டுகளில் மூலதன பொருட்கள் மற்றும் நுகர்வோர் நீடித்த பொருட்களின் ஐஐபி குறைந்துள்ளது. நுகர்வோர் அல்லாத நீடித்த பொருட்களும் டிசம்பர் 2019ல் குறைந்து விட்டது. இந்த நிலையில் கடந்த சில வாரங்களாக ஏற்றுமதி இறக்குமதியும் வெகுவாக பாதிக்கப்பட்டுள்ளது. இந்த நிலையிலேயே இந்த வளர்ச்சி விகிதம் குறைவாக மதிப்பிடப்பட்டிருக்கலாம் என்றும் கூறப்படுகிறது.