PF பணத்தை விரைவாக எடுக்க வேண்டுமா? சீக்கிரம் கிடைக்க இதைச் செய்யுங்கள்!

நாட்டில் பெரும்பாலான சம்பளம் பெறும் ஊழியர்களுக்கு வருங்கால வைப்பு நிதி (PF) கணக்கு உள்ளது. ஊழியர்களின் எதிர்காலப் பாதுகாப்பிற்காகச் சம்பளத்தின் ஒரு பகுதி இந்தக் கணக்கில் சேமிக்கப்படுகிறது. ஆனால், எதிர்பாராத சூழ்நிலைகளில் அல்லது திடீரெனப் பணத்தேவை ஏற்படும்போது, பிஎஃப் கணக்கு ஒரு சிறந்த நிதி ஆதாரமாக அமைகிறது. முன்பு, பிஎஃப் பணத்தை எடுக்கும் செயல்முறை மிகவும் சிக்கலானதாகவும், அதிக நேரம் எடுப்பதாகவும் இருந்தது. ஆனால், இப்போது அந்த நிலை மாறிவிட்டது. சரியான வழிமுறைகளைப் பின்பற்றினால், சில மணிநேரங்களிலேயே பணத்தை உங்கள் வங்கிக் கணக்கில் பெற முடியும்.

பி.எஃப் கணக்கு: பி.எஃப் கணக்கு என்பது ஊழியர்களின் சம்பளத்தில் 12% தொகையையும், நிறுவனத்தின் பங்களிப்பில் அதே 12% தொகையையும் சேர்த்துச் சேமிக்கும் ஒரு பாதுகாப்பு நிதி ஆகும். இந்தக் கணக்கில் சேரும் தொகைக்கு வட்டியும் வழங்கப்படுகிறது. இந்த நிதி, அவசர மருத்துவச் செலவுகள், திருமணம், வீடுகட்ட எனப் பல்வேறு தேவைகளின் போது மிகவும் பயனுள்ளதாக இருக்கும். இனி, இந்தப் பணத்தைப் பெறுவது எப்படி என்பதை எளிமையான வழிமுறைகள் மூலம் காண்போம்.

ஆன்லைனில் பணம் எடுப்பதற்கான எளிமையான வழிமுறைகள்: பி.எஃப் கணக்கிலிருந்து பணத்தை எடுக்க, ஆன்லைனில் விண்ணப்பிப்பது மிகவும் எளிதானது. இதற்கான படிவத்தை (PM கோரிக்கை படிவம்) நிரப்ப, முதலில் https://unifiedportal-mem.epfindia.gov.in என்ற இணையதளத்திற்குச் செல்ல வேண்டும். அங்கே உங்கள் UAN (Universal Account Number) எண் மற்றும் கடவுச்சொல்லைப் பயன்படுத்தி உள்நுழையவும்.

பின்னர், 'ஆன்லைன் சேவைகள்' (Online Services) என்ற பிரிவுக்குச் சென்று, 'உரிமைகோரல் படிவம் (Form-31, 19, 10C & 10D)' என்ற விருப்பத்தைத் தேர்ந்தெடுக்க வேண்டும். அதன் பிறகு, உங்கள் வங்கிக் கணக்கு மற்றும் ஆதார் தகவல்கள் சரியாக இருக்கிறதா என்பதைச் சரிபார்த்து உறுதி செய்யவும். இறுதியாக, பணத்தை எடுக்க வேண்டிய காரணத்தைத் தேர்ந்தெடுத்து, தேவையான விவரங்களைப் பூர்த்தி செய்து, ஓ.டி.பி (OTP) சரிபார்ப்பிற்குப் பிறகு கோரிக்கையைச் சமர்ப்பிக்கலாம்.

பணத்தை வேகமாகப் பெறுவதற்கான நிபந்தனைகள்: உங்கள் பி.எஃப் பணம் சில மணிநேரங்களிலேயே கணக்கிற்கு வந்து சேர சில முக்கிய நிபந்தனைகள் உள்ளன. உங்கள் UAN எண், ஆதார், வங்கிக் கணக்கு விவரங்கள் மற்றும் KYC தகவல்கள் அனைத்தும் சரியாகப் புதுப்பிக்கப்பட்டு இணைக்கப்பட்டிருந்தால், உங்கள் கோரிக்கை மிக வேகமாகச் செயல்படுத்தப்படும். ஆன்லைன் கோரிக்கை படிவத்தில் எந்தத் தவறும் இல்லாமல், அனைத்து ஆவணங்களும் சரியாக இருந்தால், பெரும்பாலான சந்தர்ப்பங்களில் பணம் 72 மணி நேரத்திற்குள், அதாவது 3 நாட்களுக்குள், நேரடியாக உங்கள் வங்கிக் கணக்கிற்கு மாற்றப்பட்டுவிடும். இந்த விரைவான செயல்முறை, திடீர் நிதித் தேவையின் போது ஊழியர்களுக்கு ஒரு பெரும் உதவியாக அமைகிறது.