உங்கள் பேங்க் பேலன்ஸ் மைனஸ் பேலன்ஸ்ல இருக்கா? RBI விதிகளும் நீங்கள் செய்ய வேண்டியதும்!

வங்கிக் கணக்கில் குறைந்தபட்ச இருப்புத் தொகையைப் பராமரிக்கத் தவறியதற்காக அபராதக் கட்டணங்கள் விதிக்கப்படும் என்பது அனைவரும் தெரிந்த விசயம் தான். ஆனால், இந்த அபராதங்கள் காரணமாக உங்கள் சேமிப்புக் கணக்கின் பேலன்ஸ் மைனஸ் ஆக (Negative) மாறும் எனச் சிலர் நினைத்து பீதி அடைகிறார்கள். இது உண்மை என நம்பி, அந்த மைனஸ் பேலன்ஸை சரிசெய்ய ஆயிரக்கணக்கான ரூபாய்களைச் செலுத்துபவர்களும் இருக்கிறார்கள். இந்த விழிப்புணர்வின்மை காரணமாக ஒவ்வொரு ஆண்டும் லட்சக்கணக்கான இந்தியர்கள் பணத்தை இழக்கிறார்கள்.

ஆர்பிஐ-ன் முக்கிய விதிமுறை என்ன?: இது குறித்து ஆர்பிஐ வெளியிட்ட வழிகாட்டுதல்கள் ஒரு மிக முக்கியமான உண்மையை தெளிவுபடுத்துகின்றன. ஆர்பிஐ-யின் விதிகளின்படி, அபராதக் கட்டணங்கள் காரணமாக வங்கிகள் உங்கள் சேமிப்புக் கணக்கை மைனஸ் ஆக மாற்ற முடியாது. அதாவது, உங்கள் கணக்கில் இருப்புத்தொகை ரூ.0 ஆக இருந்தால், அந்த நிலை அப்படியேதான் இருக்க வேண்டும். கணக்கின் இருப்பு ரூ.0-க்குக் கீழே சென்று, நீங்கள் வங்கிக்குக் கடன்பட்டிருப்பது போன்ற ஒரு நிலை ஒருபோதும் ஏற்படாது. அப்படியொரு நிலைமை இருப்பது போல் வங்கி உங்களுக்குத் தகவல் அனுப்பினால், அது தவறான தகவலாகும்.

மைனஸ் பேலன்ஸ் இருந்தால் என்ன செய்வது?: சில வங்கிகள், இந்த விதியைப் புறக்கணித்து, அபராதக் கட்டணங்களைச் சேமிப்புக் கணக்கில் சேர்த்து, இருப்புத்தொகையை மைனஸ் ஆக காட்ட வாய்ப்புள்ளது. அப்படியானால், நீங்கள் என்ன செய்ய வேண்டும்? பயப்படாமல், உடனடியாகச் சில முக்கிய நடவடிக்கைகளை எடுக்க வேண்டும்.

ஆர்பிஐ சி.எம்.எஸ் போர்ட்டலில் புகார்: முதலில், நீங்கள் இந்திய ரிசர்வ் வங்கியின் குறைதீர்க்கும் மேலாண்மை அமைப்பு (Complaint Management System - CMS) போர்ட்டலில் உங்கள் புகார் பற்றிப் பதிவு செய்யலாம். இது வங்கிகளுக்கு எதிரான புகார்களைச் சமாளிக்க உருவாக்கப்பட்ட அதிகாரப்பூர்வ தளமாகும்.

வங்கி குறைதீர்ப்பாளரை அணுகுதல்: சி.எம்.எஸ் போர்ட்டலில் புகார் அளித்தும் தீர்வு கிடைக்கவில்லை என்றால், உங்கள் வங்கியின் குறைதீர்ப்பாளரை அணுகலாம். வங்கியின் சேவைகளில் ஏற்படும் குறைகளைத் தீர்க்க இவர் உதவுவார்.

வங்கியின் குறை தீர்க்கும் அதிகாரியைத் தொடர்பு கொள்ளவும்: வங்கியின் உள் புகார் தீர்மான அமைப்பின் மூலம் உங்கள் பிரச்னைக்குத் தீர்வு காண நீங்கள் முதலில் உங்கள் வங்கியின் குறை தீர்க்கும் அதிகாரியை அணுகி, நிலைமையை விளக்கலாம்.

இந்த முக்கியமான விஷயத்தைப் பற்றித் தெரியாததால், ஆயிரக்கணக்கான இந்தியர்கள் ஒவ்வொரு ஆண்டும் பணத்தை இழக்கிறார்கள். இந்தத் தகவலைப் பகிர்வதன் மூலம் உங்கள் குடும்பத்தினர் மற்றும் நண்பர்களின் பணத்தைக் காப்பாற்றலாம். இனிமேல், தவறான தகவலால் பயந்து பணத்தை இழக்காதீர்கள்.