ஒரு நம்பர் வாங்க ரூ.45.99 லட்சம் செலவு! - எர்ணாகுளம் ஆர்டிஓவில் 0007 எண்ணுக்கு பரபரப்பான ஏலம்!

இன்றைய உலகில், விரும்பிய வாகனம் வாங்கினால் மட்டும் போதாது என்று நினைத்து, ஆடம்பர வாழ்க்கையை விரும்புவோரின் எண்ணிக்கை அதிகரித்து வருகிறது. வாகன எண்களும் அந்த வாழ்க்கை முறையின் ஒரு பகுதியாக மாறிவிட்டன. தனிப்பட்ட அடையாளம், பெருமை மற்றும் ஆறுதலைக் காட்டும் ஃபேன்ஸி எண்கள் சாதாரண எண்களை விட மக்களிடையே பிரபலமாகி வருகின்றன.

இதற்கான ஒரு சிறந்த எடுத்துக்காட்டு கேரள மாநிலம் எர்ணாகுளம் ஆர்டிஓ அலுவலகத்தில் நடந்த மிகப்பெரிய பேன்சி எண் ஏலம். வெறும் வாகன பதிவு எண் "0007"க்கு ரூ.45.99 லட்சம் கொடுத்து ஒரு தனியார் நிறுவனம் வாங்கிய தகவல் அனைவருடைய கவனத்தையும் ஈர்த்து வருகிறது. இது கேரளாவில் இதுவரை ஒரு பேன்சி எண்ணுக்கு கொடுக்கப்பட்ட மிக உயர்ந்த விலை என்ற சாதனையாகும். இது போல நம்ப முடியாத அளவுக்கு பணம் செலுத்தி ஒரு எண்னை வாங்கும் விருப்பம் இன்று பலரை ஆச்சரியத்தில் ஆழ்த்தி இருக்கிறது.

ஏலத்தின் விவரங்கள்:இந்த 0007 பதிவு எண் ஏலம் கடந்த ஏப்ரல் 7 ஆம் தேதி நடைபெற்றது. முன்பதிவு விலை வெறும் ரூ.25,000 மட்டுமே இருந்தது. ஆனால் இந்த எண்ணுக்காக ஐந்து நபர்கள் போட்டியிட்டனர். அவர்களில் மூன்று பேர் ஏல விலை உயர்ந்ததால் வெளியேறினர். இறுதியில் இருவர் இடையே கடும் போட்டி உருவானது.

இறுதியாக ஒரு தனியார் நிறுவனம் இந்த எண்ணை ரூ.45.99 லட்சம் கொடுத்து வாங்கியது. இந்த எண்ணை லம்போர்கினி உருஸ் என்ற ஆடம்பர காருக்கு பதிவு செய்ய திட்டமிட்டுள்ளனர். இதற்கு முன்பு கேரளாவில் அதிகபட்சமாக ரூ.31 லட்சத்திற்கு பேன்சி எண் ஏலம் எடுக்கப்பட்டிருப்பது குறிப்பிடத்தக்கது.

மக்கள் மனநிலையும், ஆடம்பர எண்ணுக்கான விருப்பமும்: மிகவும் பிரபலமான 0007 போன்ற எண்கள் திரைப்படங்களில் ஹீரோக்கள் பயன்படுத்துவதால் பொதுமக்களிடம் பிரபலமாகிவிட்டது. தனிச்சிறப்பை அடையாளமாக்கும் எண்ணாக இது பார்க்கப்படுகிறது. மேலும், சிலர் மத சம்மந்தப்பட்ட நம்பிக்கைகளால் அல்லது சொந்த பங்களிப்பாக நினைத்து இதுபோன்ற எண்களை விரும்புகின்றனர். சிலர் வணிக ரீதியான காரணங்களால் பிரபல எண்ணை விரும்புவர்.

அரசு அறிவித்த அடிப்படை விலை விவரங்கள்: கேரளா அரசு மற்றும் மத்திய அரசு ஃபேன்சி எண்களுக்கு அடிப்படை விலைகளை தீர்மானித்துள்ளது, அவை எண் 1 - ரூ.1 லட்சம், எண் 0001 - அதிகபட்ச விலை, எண் 0007 - சிறப்பு விருப்பம், எட்டு எண்கள் கொண்ட தொகுதி - ரூ.50,000, 16 எண்கள் தொகுதி - ரூ.25,000, 29 எண்கள் தொகுதி - ரூ.10,000, 66 எண்கள் தொகுதி - ரூ.5,000, மற்ற எண்கள் - ரூ.3,000 ஆகும்.

ஆன்லைன் மூலம் எளிதாக பங்கேற்கும் வசதி: இந்த பேன்சி எண்கள் ஆன்லைன் மூலம் parivahan.gov.in என்ற அரசுத் தளத்தில் பதிவு செய்யலாம். ஏலம் திங்கள் முதல் சனிக்கிழமை வரை நடைபெறுகிறது. வாகன உரிமையாளர்கள் அடிப்படை தொகையை செலுத்தி போட்டியில் பங்கேற்கலாம். ஏலம் நடத்தும் போது குறைந்தபட்சம் ரூ.1,000 அதிகரிப்புடன் போட்டி நடத்தப்படுகிறது.

வருவாய் ஈட்டும் வாய்ப்பு: 2017 முதல் 2022 வரை ஐந்தாண்டுகளில் கேரளா அரசு பேன்சி எண்கள் ஏலம் மூலம் ரூ.11.84 கோடியை மாநில வருவாயாக பெற்றுள்ளது. இது அரசுக்கு ஒரு சிறந்த வருவாய் மூலமாகவும் மாறியுள்ளது. மற்ற மாநிலங்களும் இதே மாதிரி பேன்சி எண்கள் ஏலம் மூலம் லாபம் சம்பாதிக்க முயற்சிக்கிறார்கள். ஒரு பதிவு எண் வாங்க இந்த அளவிற்கு பணம் செலவழிப்பது குறித்து மக்கள் வியப்பும் விமர்சனமும் தெரிவிக்கின்றனர்.

சாதாரணமாக ஒரு குடும்பம் வாழ ஒரு வருட சம்பளம் கூட சில பேர் ஒரு பதிவு எண்ணுக்காக செலவிடுகின்றனர் என்று விமர்சித்துள்ளனர். ஆனால் தனிநபர் விருப்பம் என்பது தனி உரிமை என்பதால் அரசு இதனை வருமான வாய்ப்பாக பயன்படுத்தி வருகிறது. அதே நேரத்தில் இது சமூக வித்தியாசங்களை பெரிதும் காட்டும் உதாரணமாகவும் பார்க்கப்படுகிறது.