நஷ்டத்தில் சிக்கித் தவிக்கும் நிசான்.. 630 மில்லியன் டாலருக்கு டீல்.. கைவிட்டு போகிறதா தலைமையகம்..?

பிரபலமான ஜப்பானிய கார் தயாரிப்பு நிறுவனமான நிசான் (Nissan), கடும் பணப் பிரச்சனையால் சிக்கித் தவித்து வருகிறது. இந்த சிக்கலை சமாளித்து, மீண்டும் லாபம் ஈட்டும் நிலைக்குத் திரும்புவதற்காக, யோகோஹாமாவில் உள்ள தனது மிகப் பெரிய தலைமையக கட்டிடத்தை விற்க முடிவெடுத்துள்ளது.

ரூ.5,200 கோடிக்கு விற்பனை : இந்த கட்டிடம் 97 பில்லியன் யென் (சுமார் 630 மில்லியன் டாலர், அதாவது இந்திய மதிப்பில் சுமார் ரூ.5,200 கோடி) தொகைக்கு பில்டிங் விற்பனையாகியுள்ளது. தலைமையகத்தைக் கட்டணம் கொடுத்து வாங்கியது டோக்கியோவை சேர்ந்த ஒரு ரியல் எஸ்டேட் நிறுவனம். இந்தக் கட்டிடம், உலகின் பெரிய கார் உதிரிபாகங்கள் தயாரிக்கும் நிறுவனமான மின்ட் குழுமத்தின் (Minth Group) ஒரு பிரிவுக்கு சொந்தமாகிறது.

ரூ.4,000 கோடி லாபம் : இங்கே ஒரு சுவாரசியமான விஷயம் என்னவென்றால், நிசான் நிறுவனம் கட்டிடத்தை விற்றுவிட்டாலும், அங்கிருந்து வெளியேறவில்லை. அதே கட்டிடத்தை, புதிய உரிமையாளர்களிடம் இருந்து குத்தகைக்கு எடுத்து, தொடர்ந்து தங்கள் தலைமையகமாக பயன்படுத்திக் கொள்ளும். இந்த விற்பனையின் மூலம், நிசான் நிறுவனத்திற்கு கணக்கில் ரூ.4,000 கோடிக்கும் மேல் லாபமாக கிடைத்துள்ளது.

கட்டிடத்தை விற்க முக்கிய காரணம் என்ன..?: கடந்த நிதியாண்டில் நிசான் நிறுவனத்திற்கு கிட்டத்தட்ட ரூ.36,000 கோடிக்கும் மேல் மிகப் பெரிய நஷ்டம் ஏற்பட்டுள்ளது. இந்த நஷ்டத்தில் இருந்து மீண்டு வரவும், மீண்டும் போட்டியிடவும், நிறுவனம் பல மாற்றங்களை செய்து வருகிறது.

"சவாலான இந்த நேரத்தில், கிரிக்கெட் அணி போன்ற முக்கியமில்லாத சொத்துகளை விற்றுப் பணம் திரட்டி, அதை நிறுவனத்தை முன்னேற்றப் பயன்படுத்துவது ஒரு நல்ல திட்டம்" என்று நிசான் தெரிவித்துள்ளது. இந்த முடிவால் கிடைத்த பணத்தை, தலைமையகத்தில் உள்ள பழைய கணினி மற்றும் தகவல் அமைப்புகளை நவீனப்படுத்தப் பயன்படுத்த நிசான் திட்டமிட்டுள்ளது. முக்கியமாக, எதிர்காலத்தில் முன்னேற, செயற்கை நுண்ணறிவு (AI) தொழில்நுட்பத்தை நிறுவனத்தின் பல துறைகளிலும் வேகமாக புகுத்தவும் முடிவு செய்யப்பட்டுள்ளது.

நிசான் ஏற்கனவே சிக்கன நடவடிக்கையாக, உலகம் முழுவதும் சுமார் 20,000 ஊழியர்களை (மொத்த ஊழியர்களில் 15%) வேலையில் இருந்து குறைப்பதாகவும், அத்துடன் ஜப்பானில் உள்ள முக்கிய தொழிற்சாலைகளில் ஒன்றையும் மூடுவதாகவும் அறிவித்திருந்தது.

புதிய தலைமைச் செயல் அதிகாரியான இவான் எஸ்பினோசா பொறுப்பேற்ற பிறகு, நிசான் நிறுவனம் கடுமையான முயற்சிகளை எடுத்து வருகிறது என்பதையே தலைமையக விற்பனை காட்டுகிறது. இந்த விற்பனை மூலம் கிடைத்த பணத்தைப் பயன்படுத்தி, நிசான் நிறுவனம் நவீன தொழில்நுட்பத்தில் முதலீடு செய்து, மீண்டும் கார் சந்தையில் வலுவாகத் திரும்புவதற்குப் போராடத் தொடங்கியுள்ளது.