நீதா அம்பானி வெட்டிய 6 அடுக்கு கேக்.. Jio World Plaza-வில் நடந்த முதல் விழா.. வைரலான வீடியோ..!!

இந்தியாவின் பெரும் பணக்காரரான முகேஷ் அம்பானி குடும்பம் நவம்பர் 1 ஆம் தேதி இந்தியாவே வியக்கும் வகையில் ஆடம்பர பிராண்டுகளுக்காகப் பிரத்தியேகமாக Jio World Plaza என்னும் பிரம்மாண்டமான மால்-ஐ திறந்தது.

இதேநாளில் முகேஷ் அம்பானியின் மனைவி நீதா அம்பானியின் பிறந்த நாளும் வந்தது, Jio World Plaza மால் திறப்பு மற்றும் முதல் நாளில் மால்-க்கு வந்த பிரபலங்கள் என அதைச் சார்ந்த விஷயங்கள் சமுக வலைத்தளத்தில் நிறைந்திருந்தது.

இந்த நிலையில் Jio World Plaza திறப்பு விழாவிற்குப் பின்பு நடந்த நீதா அம்பானியின் பிறந்த நாள் கொண்டாட்ட வீடியோ இப்போது தான் வெளியாகியுள்ளது. இன்ஸ்டாகிராமில் அம்பானி குடும்பத்தின் பேன் பேஜ் ரகசியமாக எடுக்கப்பட்ட வீடியோக்களை இணைத்து பதிவிட்ட நிலையில் தற்போது இந்தி வீடியோ வைரலாகியுள்ளது.

ரிலையன்ஸ் இண்டஸ்ட்ரீஸ் தலைவரும் நிர்வாக இயக்குனருமான முகேஷ் அம்பானியின் மனைவியும், அம்பானி குடும்பத்தின் தலைவியுமான நீதா அம்பானி, சமீபத்தில் தனது 60வது பிறந்தநாளைத் தனது மகன்கள் அனந்த் அம்பானி, ஆகாஷ் அம்பானி, மகள் இஷா அம்பானி, மருமகள் ஷ்லோகா மேத்தா மற்றும் ராதிகா மெர்ச்சன்ட் உள்ளிட்ட குடும்பத்தினருடன் கொண்டாடினார். இவர்களோடு நீதா அம்பானியை அவரது அம்மா மற்றும் மாமியார் கோகிலாபென் அம்பானி உட்பட அவரது முழுக் குடும்பமும் இருந்தனர்.

இப்போது, பிறந்தநாள் கொண்டாட்டத்தின் வீடியோ வைரலாகி வருகிறது, அதில் நீதா அம்பானி தனது மூத்த மருமகள் ஷ்லோகா மேத்தா மற்றும் இளைய மருமகள் ராதிகா மெர்ச்சன்ட் ஆகியோருடன் தனது பிறந்தநாள் கேக்கை வெட்டும் காட்சி வீடியோவில் உள்ளது.

நீதா அம்பானி தனது 60 வது பிறந்தநாளை 6 அடுக்கு கேக் வெட்டி கொண்டாடினார், இதில் முக்கியமான விஷயம் என்னவென்றால் Jio World Plaza-வில் நடக்கும் முதல் விழா இது தான். இந்தக் கேக் வெட்டும் நிகழ்வு Jio World Plaza-வின் பார்ட்டி ஹால் அல்லது தியேட்டரில் நடத்திருக்கும் எனத் தெரிகிறது.

நீதா அம்பானி தனது 60 வது பிறந்தநாளை 6 அடுக்கு கேக் வெட்டி கொண்டாடியது மட்டும் அல்லாமல் ஒரு சிறிய இசை நிகழ்ச்சியும் நடந்துள்ளது. இந்தக் கொண்டாட்டம் அனைத்தும் அக்டோபர் 31 ஆம் தேதி இரவு ஜியோ மால் திறப்பு விழாவின் முடிவில் நடந்தது.

இதையடுத்து நவம்பர் 1 ஆம் தேதி ரிலையன்ஸ் அறக்கட்டளையின் தலைவராக இருக்கும் நீதா அம்பானி புதன்கிழமை தனது 60வது பிறந்தநாளை மும்பையில் உள்ள 'அண்ணா சேவை'யில் 3,000 ஆதரவற்ற குழந்தைகளுக்குத் தனிப்பட்ட முறையில் உணவளித்துக் கொண்டாடினார். மேலும் பள்ளி செல்லும் குழந்தைகளுக்கு மாலையில் பொழுது போக்கு மற்றும் பரிசுகளை வழங்கினார் நீதா அம்பானி.