டாப் 10ல் இடமில்லை! இனி எப்படி இருக்கும் இந்திய பொருளாதாரம்?. நிலையான பொருளாதார நாடுகள் இதுதான்!

உலகப் பொருளாதாரத் தரவரிசையில் அமெரிக்கா முதலிடத்தில் உள்ளது. அதிக மக்கள் தொகை கொண்டிருக்கும் இந்தியா 5வது இடத்தில் உள்ளது. அதேபோல், நிலையான பொருளாதாரங்களின் பட்டியலில் முதல் 10 இடங்களில் கூட இந்தியா இடம்பிடிக்கவில்லை என்பது கவலையளிக்கிறது.

மொத்த உள்நாட்டு உற்பத்தி (GDP) என்பது ஒரு குறிப்பிட்ட காலத்தில் உற்பத்தி செய்யப்படும் அனைத்து பொருட்கள் மற்றும் சேவைகளின் மொத்த சந்தை மதிப்பை அளவிடுகிறது. இது பொருளாதார ஆரோக்கியத்தின் நிலையை குறிக்கும். தேசிய செல்வத்தை துல்லியமாக அளவிடவும், பணவீக்கத்திற்கான ஏற்ற இறக்கத்தை காணவும் இந்த GDP பயன்படுகிறது. அந்தவகையில், உலகின் மிகப்பெரிய பொருளாதார நாடாக அமெரிக்காவும், இரண்டாவது இடத்தில் சீனாவும் உள்ளன. அதேபோல், இந்தியா உலகின் ஐந்தாவது பெரிய பொருளாதாரமாகும். இருப்பினும், உலகின் முதல் 10 நிலையான பொருளாதாரங்களின் பட்டியலில் இந்த நாடுகளின் பெயர்கள் இடம்பெறவில்லை.

ஜெர்மனியும் ஜப்பானும் முதல் 10 இடங்களைப் பிடித்துள்ளன. ஜெர்மனி ஐரோப்பாவின் மிகப்பெரிய பொருளாதாரம் மட்டுமல்ல, உலகின் மூன்றாவது பெரிய பொருளாதாரமாகவும் விளங்கி வருகிறது. அதேபோல், ஜப்பான் உலகின் நான்காவது பெரிய பொருளாதாரமாகும். இருப்பினும், இந்தப் பட்டியலில் முதலிடத்தில் ஐக்கிய அரபு அமீரகம் உள்ளது. சிறந்த முதலீட்டு கொள்கைகள் மற்றும் சிறந்த உள்கட்டமைப்பு காரணமாக, ஐக்கிய அரபு அமீரகம் முதலிடத்தில் திகழ்கிறது.

அதாவது, சமீபத்திய ஆண்டுகளில், சுற்றுலா மற்றும் வணிகத்தின் நோக்கம் அதிகரித்துள்ள நிலையில், எண்ணெய் மற்றும் எரிவாயு தேவைகள் குறைந்துள்ளது. அதன்படி, உலகின் மிகவும் நிலையான பொருளாதாரங்களின் பட்டியலில் சுவிட்சர்லாந்து இரண்டாவது இடத்தில் உள்ளது. ஐரோப்பாவின் விளையாட்டு மைதானம் என்று அழைக்கப்படும் இந்த நாடு, அதன் ஸ்கை ரிசார்ட்டுகள் மற்றும் மலையேற்றத்திற்கு பிரபலமானது. உலகம் முழுவதிலுமிருந்து சுற்றுலாப் பயணிகள் இந்த நாட்டிற்கு வருகை தருகின்றனர். சுவிட்சர்லாந்தில் வங்கி மற்றும் நிதித் துறை வலுவாக உள்ளது.

சுவிட்சர்லாந்தைத் தொடர்ந்து ஜெர்மனி, கனடா, ஜப்பான், ஆஸ்திரேலியா, ஸ்வீடன், டென்மார்க், நெதர்லாந்து மற்றும் சவுதி அரேபியா ஆகியவை அடுத்தடுத்த இடங்களில் உள்ளன. ஆனால் இந்தப் பட்டியலில் அமெரிக்கா 13வது இடத்திலும், இங்கிலாந்து 16வது இடத்திலும், சீனா 19வது இடத்திலும், பிரான்ஸ் 20வது இடத்திலும் உள்ளன. தென் கொரியா 23வது இடத்திலும், ஸ்பெயின் 25வது இடத்திலும், இத்தாலி 28வது இடத்திலும், போலந்து 30வது இடத்திலும், ரஷ்யா 31வது இடத்திலும், துருக்கி 44வது இடத்திலும் உள்ளன. இந்தப் பட்டியலில் இந்தியா 47வது இடத்தில் உள்ளது. பிரேசில், எகிப்து, இந்தோனேசியா, மெக்சிகோ, அர்ஜென்டினா, தென்னாப்பிரிக்கா, ஈரான், பங்களாதேஷ் மற்றும் உக்ரைன் ஆகியவை இந்தப் பட்டியலில் இந்தியாவை விடக் கீழே உள்ளன.