நவம்பர் 1ஆம் தேதி முதல் வங்கிகளில் அதிரடி மாற்றம்.. வாடிக்கையாளர்களே இதை நோட் பண்ணுங்க..!!

வங்கிகளில் வரும் நவம்பர் 1ஆம் தேதி முதல் முக்கிய விதிகளில் மாற்றங்கள் வரவுள்ளன. இந்தப் புதிய மாற்றங்கள், வங்கிக் கணக்கு மற்றும் லாக்கர் பயன்படுத்துபவர்களை நேரடியாகப் பாதிப்பதுடன், வங்கி அமைப்பை மேலும் வெளிப்படையானதாகவும், பாதுகாப்பானதாகவும், வாடிக்கையாளர்களுக்கு சாதகமானதாகவும் மாற்றும் நோக்குடன் உருவாக்கப்பட்டுள்ளன.

நாமினிகள் எண்ணிக்கை அதிகரிப்பு : இந்த மாற்றங்களில் மிக முக்கியமானது, இனி வாடிக்கையாளர்கள் தங்கள் வங்கிக் கணக்குகளுக்கு 4 நபர்கள் வரை நாமினிகளாக நியமிக்கலாம். இதுநாள் வரை இருந்த அதிகபட்ச வரம்பு 2 நபர்களாக மட்டுமே இருந்தது குறிப்பிடத்தக்கது.

நாமினிகளின் தொடர்பு விவரங்கள் கட்டாயம் : புதிய விதிகளின்படி, வங்கிகள் இனி ஒவ்வொரு நாமினியின் மின்னஞ்சல் முகவரி மற்றும் கைபேசி எண்ணை கண்டிப்பாகப் பதிவு செய்ய வேண்டும். இந்த நடவடிக்கை, உரிமைகோரல் செயல்முறையை விரைவானதாகவும், துல்லியமானதாகவும், கண்காணிக்க எளிதாகவும் மாற்றும் நோக்கத்துடன் எடுக்கப்பட்டுள்ளது.

முன்னர், கணக்கு வைத்திருப்பவர் இல்லாத நிலையில், நாமினியை தேடுவதிலும், சரிபார்ப்பதிலும் வங்கிகள் சிரமத்தை சந்தித்தன. இப்போது, சரிபார்க்கப்பட்ட தொடர்பு விவரங்கள் இருப்பதால், வங்கிகள் அவசர காலங்களில் நாமினிகளுக்கு உடனடியாக தகவல் தெரிவிக்க முடியும். இது தாமதங்களை குறைப்பதுடன், நிதி சரியான பயனாளிகளை உரிய நேரத்தில் சென்றடைவதை உறுதி செய்யும்.

அதிக நாமினிகளை அனுமதிப்பதன் மூலமும், அவர்களின் விவரங்களைக் கட்டாயமாக்குவதன் மூலமும் நிதி பரிமாற்றம் மற்றும் பரம்பரை சட்ட செயல்முறைகள் எளிமையாகும் என்று ரிசர்வ் வங்கி தெரிவித்துள்ளது. மேலும், அங்கீகரிக்கப்படாத உரிமைகோரல்கள் அல்லது தகராறுகளை தடுக்க முடியும். சரியான உரிமைகோருபவர்களுக்கு உரிய நேரத்தில் பணம் கிடைப்பதை உறுதி செய்ய முடியும். வங்கிகளுக்கும் வாடிக்கையாளர்களுக்கும் இடையேயான தகவல் தொடர்பை மேம்படுத்த முடியும் என்று தெரிவிக்கப்பட்டுள்ளது.

புதிய விதிகளின்படி, வாடிக்கையாளர்கள் தங்கள் குடும்ப உறுப்பினர்கள், நண்பர்கள் அல்லது நம்பிக்கைக்குரிய எந்தவொரு தனிநபரை வேண்டுமானாலும் நாமினியாக நியமிக்கலாம். பல்வேறு வங்கிகளில் பல கணக்குகள் அல்லது பெரிய வைப்புத் தொகைகள் வைத்திருப்பவர்களுக்கு இது மிகவும் உதவியாக இருக்கும்.

சட்ட சிக்கல்கள் ஏற்படும் பட்சத்தில், 4 நாமினிகள் வரை பதிவு செய்யப்பட்டிருப்பதால், உண்மையான உரிமையாளரை சரிபார்த்து, சட்ட சிக்கல்கள் இல்லாமல் நிதியை விடுவிப்பது வங்கிகளுக்கு எளிதாகிறது. மேலும், வாடிக்கையாளர்கள் நாமினிகளுக்கு இடையே தொகையை எவ்வாறு பிரித்துக் கொடுக்க வேண்டும் என்பதையும் குறிப்பிடலாம்.

இந்த புதிய விதிகள் அமலுக்கு வருவதால், வங்கிகள் தங்கள் கணக்கு தொடங்கும் மற்றும் புதுப்பிக்கும் நடைமுறைகளை மாற்றியமைக்கலாம். எனவே, வாடிக்கையாளர்கள் அனைவரும் எதிர்கால சிக்கல்களை தவிர்க்க, தங்கள் நாமினி விவரங்களை உடனடியாக சரிபார்த்து புதுப்பிக்குமாறு அறிவுறுத்தப்படுகிறார்கள்.