வாடிக்கையாளர்களே.. இந்த தேதிகளில் வங்கிக்கு போகாதீங்க.. நவம்பர் மாதம் 11 நாட்கள் விடுமுறை..!!

புதிதாக பிறக்கும் ஒவ்வொரு மாதமும், வாடிக்கையாளர்களின் வசதிக்காக அந்த மாதத்துக்கான வங்கி விடுமுறைப் பட்டியலை இந்திய ரிசர்வ் வங்கி (RBI) வெளியிடுவது வழக்கம். அந்த வகையில், நவம்பர் மாதத்திற்கான விடுமுறைப் பட்டியல் வெளியிடப்பட்டுள்ளது. வங்கி வாடிக்கையாளர்கள் இந்தப் பட்டியலைக் கட்டாயம் அறிந்துகொள்வது அவசியம். ஏனெனில், இதைப் பொறுத்தே வங்கி தொடர்பான முக்கியமான தங்கள் வேலைகளைத் திட்டமிட்டுக் கொள்ள முடியும்.

அக்டோபர் மாதம் முடிந்து நவம்பர் மாதம் தொடங்கியுள்ள நிலையில், இம்மாதத்தில் வங்கிப் பணிகளை முடிக்கத் திட்டமிட்டுள்ள வாடிக்கையாளர்கள், விடுமுறை நாட்களை குறித்து வைத்துக் கொள்வது மிகவும் நல்லது. அக்டோபருடன் ஒப்பிடுகையில் நவம்பரில் விடுமுறை நாட்கள் சற்று குறைவாகவே இருந்தாலும், நாடு முழுவதும் வாராந்திர விடுமுறைகள், மாதத்தின் இரண்டாவது மற்றும் நான்காவது சனிக்கிழமைகள் மற்றும் சில மாநில அளவிலான பண்டிகைகள் என சேர்த்து வங்கிகள் மொத்தம் 11 நாட்கள் மூடப்பட்டிருக்கும் என ரிசர்வ் வங்கி தெரிவித்துள்ளது.

இந்திய ரிசர்வ் வங்கி வெளியிட்டுள்ள விடுமுறை நாள்காட்டியின்படி, நவம்பர் மாதம் பண்டிகைகள் காரணமாக பல இடங்களில் வங்கிகள் செயல்படாது. உள்ளூர் விடுமுறைகளை தவிர, மற்ற மாநிலங்களில் வங்கிகள் வழக்கம் போல் செயல்படும்.

நவம்பர் 1 (சனிக்கிழமை): கர்நாடகாவில் கன்னட ராஜ்யோத்சவம் (1956 இல் கன்னடம் பேசும் பகுதிகள் இணைந்த நாள்) காரணமாக அனைத்து வங்கிகளும் மூடப்பட்டிருக்கும். இதேபோல், உத்தரகாண்ட் மாநிலம் டேராடூனிலும் இகாஸ்-பக்வால் (புத்தி தீபாவளி) காரணமாக வங்கிகள் மூடப்பட்டிருக்கும்.

நவம்பர் 5 (புதன்கிழமை): குருநானக் ஜெயந்தி, கார்த்திக் பூர்ணிமா மற்றும் ரஹாஸ் பூர்ணிமா ஆகிய பண்டிகைகளை முன்னிட்டு, சென்னை உட்பட ஐஸ்வால், போபால், சண்டிகர், ஹைதராபாத், டெல்லி, கொல்கத்தா, மும்பை, லக்னோ உள்ளிட்ட பெரும்பாலான முக்கிய நகரங்களில் வங்கிகள் இயங்காது.

நவம்பர் 6 (வியாழக்கிழமை): மேகாலயாவின் ஷில்லாங்கில் நொங்க்க்ரெம் நடனம் காரணமாக விடுமுறை.

நவம்பர் 7 (வெள்ளிக்கிழமை): மேகாலயாவின் ஷில்லாங்கில் வாங்காலா விழா காரணமாகவும் வங்கிகள் மூடப்பட்டிருக்கும்.

நவம்பர் 8 (சனிக்கிழமை): பெங்களூருவில் கவிஞர் மற்றும் சமூக சீர்திருத்தவாதியான கனகதாசர் ஜெயந்தி கொண்டாடப்படுவதால் வங்கிகள் மூடப்பட்டிருக்கும்.

நவம்பர் 11 (செவ்வாய்க்கிழமை): சிக்கிம் மாநிலத்தில் புத்த பண்டிகையான ல்ஹாபாப் டுச்சென் காரணமாக விடுமுறை அறிவிக்கப்பட்டுள்ளது.

வாராந்திர விடுமுறை நாட்கள் : மேலே குறிப்பிடப்பட்ட பண்டிகை விடுமுறைகள் தவிர, நாடு முழுவதும் அனைத்து வங்கிகளும் கீழ்க்கண்ட நாட்களில் வார விடுமுறைக்காக மூடப்பட்டிருக்கும்

நவம்பர் 2 (ஞாயிறு)

நவம்பர் 8 (இரண்டாம் சனிக்கிழமை)

நவம்பர் 9 (ஞாயிறு)

நவம்பர் 16 (ஞாயிறு)

நவம்பர் 22 (நான்காம் சனிக்கிழமை)

நவம்பர் 23 (ஞாயிறு)

நவம்பர் 30 (ஞாயிறு)

டிஜிட்டல் சேவைகள் தொடரும் : வங்கி கிளைகள் மூடப்பட்டாலும் நெட் பேங்கிங், மொபைல் பேங்கிங், யுபிஐ (UPI), மற்றும் ஏடிஎம் (ATM) போன்ற டிஜிட்டல் சேவைகள் வழக்கம்போல் செயல்படும். இதன் மூலம் பணப் பரிவர்த்தனை, கட்டணம் செலுத்துதல், இருப்புச் சரிபார்ப்பு போன்ற அனைத்துச் சேவைகளையும் வாடிக்கையாளர்கள் தடையின்றிப் பயன்படுத்தலாம்.