NPS வாத்சல்யா Vs சுகன்யா சம்ரித்தி யோஜனா.. உங்கள் குழந்தைக்கு ஏற்ற முதலீட்டு திட்டம் எது?

NPS வாத்சல்யா திட்டம் கடந்த ஜூலை 23-ஆம் தேதியன்று தாக்கல் செய்யப்பட்ட பட்ஜெட்டில் அறிமுகப்படுத்தப்பட்டது. இதற்கான இணையதளத்தை சமீபத்தில் நிதியமைச்சர் நிர்மலா சீதாராமன் தொடங்கி வைத்தார். இந்நிலையில் தற்போது பெற்றோர்களுக்கு NPS வாத்சல்யா திட்டத்தை தேர்ந்தெடுப்பதா? அல்லது சுகன்யா சம்ரித்தி யோஜனா திட்டத்தை தேர்ந்தெடுப்பதா என்ற குழப்பத்தில் உள்ளனர். இந்தப் பதிவில் இவற்றை ஒப்பிட்டு பார்த்து அவற்றின் நன்மைகள் குறித்து பார்ப்போம்.

NPS வத்சல்யா: NPS வத்சல்யா என்பது குழந்தைகளுக்காக வடிவமைக்கப்பட்ட தேசிய ஓய்வூதிய அமைப்பின் (NPS) கீழ் இயங்கும் முதலீட்டுத் திட்டமாகும். பாரம்பரிய நிலையான வருமானத் திட்டங்களைப் போலன்றி, பங்குகள், அரசாங்கப் பத்திரங்கள் மற்றும் கார்ப்பரேட் பத்திரங்கள் ஆகியவற்றின் செயல்திறனைப் பொறுத்து இதன் வருமானம் மாறுபடும். இதன் காரணமாக NPS வத்சல்யா திட்டம் அதிக வருமானத்தையும் வழங்கலாம். இதற்கான வட்டி விகிதம் 10% முதல் 12% வரை இருக்கலாம்.

சுகன்யா சம்ரித்தி யோஜனா: சுகன்யா சம்ரித்தி யோஜனா திட்டம் (SSY) என்பது பெண் குழந்தைகளுக்காக வடிவமைக்கப்பட்ட அரசாங்க சேமிப்புத் திட்டமாகும். இது தற்போது ஆண்டுக்கு 8.2% வட்டி விகிதத்தை வழங்குகிறது. இந்த வட்டி விகிதம் காலாண்டுக்கு ஒருமுறை மாறுபடும். இது நிலையான மற்றும் பாதுகாப்பான வருமானத்தை வழங்குகிறது.

முதலீட்டு காலம்: இந்த 2 திட்டங்களையும் ஒப்பிட்டுப் பார்க்க ஒவ்வொரு திட்டத்திலும் ஆண்டுக்கு 10,000 ரூபாய் முதலீடு செய்யப்படுகிறது என்று வைத்துக்கொள்வோம்.

NPS வத்சல்யா: 11% ஆண்டு வட்டியில் 10 வருட முதலீட்டு காலத்திற்கு NPS வாத்சல்யா திட்டத்தில் 10,000 ரூபாயை முதலீடு செய்தால் மொத்த கார்பஸ் 1.86 லட்சம் ரூபாயாக இருக்கும்.

சுகன்யா சம்ரித்தி யோஜனா: தற்போதைய 8.2 சதவீத வட்டி விகிதத்தில் 10 தொடர்ந்து ஒரு ஆண்டுக்கு 10,000 ரூபாயை முதலீடு செய்தால் சுகன்யா சம்ரித்தி யோஜனா திட்டத்தில் 1.58 லட்சம் கார்பஸ் கிடைக்கும்.

மேலே கூறப்பட்டுள்ள உதாரணத்தில் 10 ஆண்டுகளை எடுத்துக்கொண்டோம். ஆனால் சுகன்யா சம்ரித்தி யோஜனா திட்டத்தின் முதிர்வு காலம் 21 ஆண்டுகள். ஆனால் அதற்கு 15 ஆண்டுகள் முதலீடு செய்ய வேண்டும். பத்து ஆண்டுகளுக்கு எது அதிக அளவில் வருமானம் தருகிறது என்று பார்க்கும்போது NPS வாத்சல்யா திட்டம் முன்னிலை வகிக்கிறது. இதற்கு முக்கிய காரணம் சந்தையோடு தொடர்புடைய முதலீட்டு திட்டமாக இருப்பதால்தான்.

சுகன்யா சம்ரித்தி யோஜனா: SSY முதிர்வு காலத்திற்கிடையில் சீராக வளரும். அதே வேளையில், குழந்தைக்கு 18 வயது ஆன பிறகு கூடுதல் பங்களிப்புகள் இல்லாமல் ஆறு வருட கூடுதல் வட்டியை வழங்குகிறது. இந்த அம்சம் இறுதி முதிர்வுத் தொகையை அதிகரிக்கலாம்.

NPS வாத்சல்யா: குழந்தை 18 வயதை எட்டியதும், கணக்கு நிலையான NPS கணக்கிற்கு மாறுகிறது. இந்த மாற்றம் 60 ஆண்டுகள் வரை தொடர்ந்து முதலீடு செய்ய அனுமதிக்கிறது. இது குழந்தையின் சேமிப்பை இன்னும் குறிப்பிடத்தக்க வளர்ச்சிக்கான சாத்தியத்தை வழங்குகிறது.

NPS வாத்சல்யா மற்றும் சுகன்யா சம்ரித்தி யோஜனா ஆகியவற்றுக்கு இடையே தேர்வு செய்வது குழந்தையின் வயது, உங்கள் முதலீட்டு இலக்குகள் மற்றும் உங்களின் அபாயத்தைத் தாங்கும் திறன் உள்ளிட்ட பல்வேறு காரணிகளைப் பொறுத்தது. நீங்கள் அதிக வருமானத்தை எதிர்பார்க்கிறீர்கள் மற்றும் சந்தையுடன் இணைக்கப்பட்ட முதலீடுகளுடன் வசதியாக இருந்தால், NPS வாத்சல்யா மிகவும் பொருத்தமான விருப்பமாக இருக்கலாம். மாறாக, ஒரு பெண் குழந்தைக்கு குறிப்பாகப் பயனளிக்கும் பாதுகாப்பான, அரசாங்க ஆதரவுடைய திட்டத்தை நீங்கள் விரும்பினால், SSY சிறந்த தேர்வாக இருக்கும்.