சென்னை ஆபீஸ் ரியல் எஸ்டேட் தாறுமாறான வளர்ச்சி.. பெங்களூர் நிலைமை ரொம்ப மோசம்..!!

இந்தியாவின் மிக முக்கியமான அலுவலக ரியல் எஸ்டேட் சந்தையான பெங்களூரில் ஜூலை-செப்டம்பர் காலாண்டில் மிகவும் மந்தமான வர்த்தகத்தைப் பதிவு செய்துள்ளது. இந்தியாவின் சிலிக்கான் வேலியாகப் பார்க்கப்படும் பெங்களூரில் அலுவலக இடங்களின் மொத்த குத்தகை வருடாந்திர அடிப்படையில் 28 சதவீதம் குறைந்துள்ளது.

அதே நேரத்தில் புதிய அலுவலக இடங்கள் சந்தைக்கு வரும் அளவீடும் 25 சதவீதம் குறைந்துள்ளது என்று வெஸ்டியன் நிறுவனம் தனது ஆய்வறிக்கையில் தெரிவித்துள்ளது. ரியல் எஸ்டேட் ஆலோசக நிறுவனமான வெஸ்டியன், பெரிய ஐடி நிறுவனங்கள் தங்கள் ஊழியர்களை மீண்டும் அலுவலகத்திற்கு அழைப்பதன் மூலம் பெங்களூரில் அலுவலகத் தேவை இனி வரும் காலத்தில் அதிகரிக்கும் என்று எதிர்பார்க்கிறது.

இந்தக் காலண்டர் ஆண்டின் மூன்றாவது காலாண்டிற்கான அலுவலகச் சந்தை அறிக்கையை வெஸ்டியன் வெளியிட்டது, இதில் நாட்டின் டாப் ஏழு நகரங்களில் அலுவலகக் குத்தகையில் 21 சதவீத வளர்ச்சியையும், புதிய அலுவலக இட விநியோகத்தில் 26 சதவீத வளர்ச்சியையும் எதிர்கொண்டு உள்ளது.

இதன் மூலம் ஜூலை-செப்டம்பர் காலப்பகுதியில் மட்டும் சுமார் 15.9 மில்லியன் சதுர அடி அலுவலக இடத்தை நாட்டின் ஏழு முக்கிய நகரங்களான பெங்களூரு, ஹைதராபாத், சென்னை, மும்பை, புனே, டெல்லி-என்சிஆர் மற்றும் கொல்கத்தா ஆகிய பகுதிகளில் குத்தகை விடப்பட்டு உள்ளது.

இந்த ஏழு நகரங்களில் செப்டம்பர் காலாண்டில் புதிய அலுவலக இடங்கள் 26 சதவீதம் அதிகரித்து 13.4 மில்லியன் சதுர அடி அலுவலக இடம் சந்தைக்கு வந்துள்ளது என வெஸ்டியன் தரவுகள் கூறுகிறது. வெஸ்டியன் தலைமை நிர்வாக அதிகாரி ஸ்ரீனிவாஸ் ராவ் கூறுகையில், செப்டம்பர் காலாண்டில் இந்திய அலுவலகத் ரியல் எஸ்டேட் செயல்பாடுகளை அதிகரித்தது தொற்றுநோய் காலகட்டத்திற்கு அதிகப்படியான அலுவலக இடத்திற்குக் குத்தகை ஒப்பந்தம் செய்யப்பட்டு உள்ளது.

பெங்களூர், டெல்லி என்சிஆர் பகுதியில் அலுவலகக் குத்தகை ஒப்பந்தம் 28 சதவீதம், 14 சதவீதம் சரிந்த நிலையில், சென்னையில் அலுவலகக் குத்தகை ஒப்பந்தம் செய்யப்பட்ட இடவசதி 82 சதவீதமும் அதிகரித்துள்ளது, இதேபோல் சந்தைக்குப் புதிதாக வந்த இடவசதிகள் அளவும் 71 சதவீதம் அதிகரித்துள்ளது.

இதேபோல் ஹைதராபாத்தில் அலுவலகக் குத்தகை ஒப்பந்தம் செய்யப்பட்ட இடவசதி 270 சதவீதமும் அதிகரித்துள்ளது, சந்தைக்குப் புதிதாக வந்த இடவசதிகள் அளவும் 175 சதவீதம் அதிகரித்துள்ளது குறிப்பிடத்தக்கது.