பெங்களூரில் சிக்கிய அமிதாப், அமீர் கானின் ரோல்ஸ் ராயஸ்-கள்.. 38 லட்சம் அபராதம்.. யார் இந்த KGF பாபு..?

பிரபல பாலிவுட் நடிகர்கள் அமிதாப் பச்சன் மற்றும் அமீர் கானின் பெயரில் உள்ள ரோல்ஸ் ராய்ஸ் கார்களுக்கு மொத்தம் ரூ.38 லட்சம் அபராதம் விதிக்கப்பட்டுள்ளது. இந்த கார்களுக்கு விதிக்கப்பட்ட அபராதம் பல்வேறு போக்குவரத்து விதிமீறல்களுக்கு காரணமாகும். ஆனால், இதில் சிக்கல் என்னவென்றால், இந்த கார்கள் தற்போது இந்த நடிகர்களுடையது அல்ல. அவர்கள் விற்பனை செய்த பின் புதிய உரிமையாளர்கள் தங்களது பெயரில் பதிவு செய்யாமல் அதை தொடர்ந்து பயன்படுத்தி வந்துள்ளனர். இதனால், அபராதங்கள் அனைத்தும் அமிதாப் பச்சன் மற்றும் அமீர் கானின் பெயரில் பதிவு செய்யப்பட்டுள்ளது.

இந்த சம்பவம் பெங்களூருவில் தான் நடந்துள்ளது. ட்ராஃபிக் சிக்னல் மீறல், தடை செய்யப்பட்ட பகுதிகளில் பயணம், கூடுதல் புகை வெளியீடு போன்ற காரணங்களால் ஒரு காருக்கு ரூ.18 லட்சமும், மற்றொரு காருக்கு ரூ.20 லட்சம் என மொத்தம் ரூ.38 லட்சம் அபராதம் விதிக்கப்பட்டுள்ளது. ஆனால், உண்மையிலேயே இந்த சொகுசு கார்கள் இரண்டும், KGF Babu என அறியப்படும் வியாபாரியும் அரசியல்வாதியுமான யூசுப் ஷரீஃபுக்கு சொந்தமானவை ஆகும்.

இந்த கார்கள் தற்போது யூசுப் ஷரீஃப் பயன்படுத்தி வந்தாலும், அவரின் பெயரில் இல்லை. இதனால், அரசு பதிவுகளில் அவை இன்னும் அமிதாப் மற்றும் அமீர் கானின் பெயரில் தான் இருக்கின்றன. 'KGF Babu' என அழைக்கப்படும் யூசுப் ஷரீஃப், அமிதாப் பச்சன் மற்றும் அமீர் கான் ஆகியோரிடம் இருந்து சில ஆண்டுகளுக்கு முன் ரோல்ஸ் ராய்ஸ் கார்களை வாங்கியுள்ளார். ஆனால், அதில் முக்கியமான தவறை ஒன்றை செய்து தற்போது சிக்கலில் மாட்டியுள்ளார். அதாவது, வாகன உரிமையாளரின் பெயரை தன்னுடைய பெயருக்கு மாற்றாமல் பயன்படுத்தி வந்தது தான் அவர் செய்த மிகப்பெரிய தவறு.

இந்த தவறு தற்போது சட்ட நடவடிக்கையாக எதிரொலிக்க தொடங்கியுள்ளது. வாகனங்களை வாங்கும் போது உரிமை மாற்றம் (RC Transfer) செய்வது என்பது ஒரு கட்டாயமான நடவடிக்கை ஆகும். மாற்றம் செய்யப்படவில்லை என்றால், புதிய உரிமையாளர் சொந்தமில்லை என்ற சட்டபூர்வ நிலை உருவாகிறது. இது போன்று அபராதம், வழக்குகள், காவல்துறை விசாரணைகள் போன்ற சிக்கல்களுக்கு இடமளிக்கவும் வாய்ப்புள்ளது.

இந்த இரண்டு கார்களும் மகராஷ்டிரா பதிவு எண்ணுடன் (Maharashtra registration) தொடர்ந்து பயன்படுத்தப்படுவது, பெங்களூரு மண்டல போக்குவரத்து அலுவலர் (RTO) விசாரணையில் தெரியவந்துள்ளது. வாகனத்தை மற்றொரு மாநிலத்திற்கு மாற்றினால் பதிவு மாற்றம், வழிகாட்டு வரி (road tax), உரிமை மாற்றம் ஆகியவை அவசியம் செய்யப்பட வேண்டும். இல்லையென்றால், சட்ட சிக்கல்கள் மற்றும் அபராதங்களை தவிர்க்க முடியாது.