440% விலை உயர்வா..? ஏழு மாதத்தில் முரட்டு ஏற்றம் கண்ட வெங்காயம்..?

வெங்காயத்தின் விலை குறித்து அதிக இண்ட்ரோ எல்லாம் தேவை இல்லை. அந்த அளவுக்கு மக்கள் வெங்காய விலையினால் அடித்து நொறுக்கப்பட்டு இருக்கிறார்கள்.

இந்தியா முழுக்க பரவலாக வெங்காயத்தின் விலை சுமாராக 120 ரூபாய் முதல் 200 ரூபாய் வரை விற்பனை ஆகி வருகின்றன. ஆனால் இந்த விலை ஏற்றத்துக்கு முன் ஒரு கிலோ வெங்காயம் எவ்வளவு ரூபாய்க்கு விற்கப்பட்டு வந்தது தெரியுமா..? இதோ பாஜக அரசே சொல்லி இருக்கிறதே பாருங்கள்.

இந்தியா முழுக்க சராசரியாக வெங்காயத்தின் விலை 440 சதவிகிதம் அதிகரித்து இருப்பதாக நுகர்வோர் விவகாரத் துறை அமைச்சர் ராம் விலாஸ் பாஸ்வானே நேற்று டிசம்பர் 10, 2019 மக்களவையில் சொல்லி இருக்கிறார்.

441 சதவிகிதம்

கடந்த மார்ச் 2019-ல், இந்தியா முழுக்க சராசரியாக, ஒரு கிலோ வெங்காயம் 15 ரூபாய்க்கு விற்கப்பட்டு வந்ததாம். ஆனால் டிசம்பர் 03, 2019 அன்று சராசரியாக இந்தியா முழுக்க சுமார் 81 ரூபாய்க்கு விற்பனை ஆகி வருகிறதாம். ஆக 441 சதவிகிதம் வெங்காயத்தின் விலை அதிகரித்து இருக்கிறது.

நகரம் விலை

ஒரு கிலோ வெங்காயத்தின் விலை டெல்லியில் 96 ரூபாய், கொல்கத்தாவில் 140 ரூபாய், மும்பையில் 102 ரூபாய், சென்னையில் 100 ரூபாய், திருவனந்தபுரத்தில் 150 ரூபாய், திருப்பதியில் 150 ரூபாய்-க்கு விற்கப்பட்டு வருவதாக இந்தியா டுடே செய்தி நிறுவனம் சொல்லி இருக்கிறது. ஆக, எப்படிப் பார்த்தாலும் தென் இந்திய மாநிலங்களில்தான் வெங்காயத்தின் விலை அதிகமாக இருப்பதைப் பார்க்க முடிகிறது.

வரத்து குறைவு

அளவுக்கு அதிகமான பருவ மழை காரணமாக, சந்தைக்கு வரும் வெங்காயத்தின் வரத்து கணிசமாக குறைந்தது. இதனால் ஒரு கிலோ வெங்காயத்தின் விலை 200 ரூபாயைத் தொட்டு, மேலும் விண்ணைத் தாண்டி வந்து கொண்டிருக்கிறது. இதுவரை வெங்காயத்தின் விலை பரவலாக இறக்கம் கண்டதாகத் தெரியவில்லை.

இறக்குமதி

வெங்காயத்தின் விலையைக் கட்டுப்படுத்த, மத்திய அரசு வெளிநாடுகளில் இருந்து வெங்காயத்தை இறக்குமதி செய்து இருக்கிறதாம். எனவே வெங்காய விலை விரைவில் இறக்கம் காணும் என்கிறார்கள் அரசு தரப்பினர்கள். மத்திய அரசின் கணிப்புப் படி வெங்காயத்தின் விலை குறைந்துவிட்டால் முதலில் சந்தோஷப்படுபவர்கள், மக்களாகத் தான் இருப்பார்கள். எத்தனை நாட்களுக்கு தான் வெங்காயம் இல்லாத அல்லது வெங்காயத்தை மிகக் குறைவாக பயன்படுத்தி சமைத்த உணவைச் சாப்பிடுவது.