வெங்காயம் விலையேற்றம் பிப்ரவரி வரை நீடிக்கலாம்.. பதறும் இல்லதரசிகள்..!

மும்பை: ஒவ்வொரு வீட்டு சமையலறையிலும், அதுவும் மாடி வீடு முதல் குடிசை வீடு வரை அத்தியாவசிய பொருளாக இருக்கக் கூடிய வெங்காயத்தின் விலை கடந்த சில வாரங்களாகவே விண்ணைத் தொட்டு வருகிறது.

அதிலும் தமிழகத்தில் குறிப்பாக சென்னை அதன் சுற்றுவட்டாரப் பகுதிகளில் சின்ன வெங்காயம் 150 ரூபாயை தொட்டது.

இது ஒரு புறம் இருப்பினும், மறுபுறம் வெங்காயம் விலையை குறைக்க அரசு பல இறக்குமதி சலுகைகளையும் அளித்து வருகிறது. இருப்பினும் இன்று வரை வெங்காயம் விலை குறைந்தபாடாக இல்லை.

சமையலறையில் அனுதினமும் தேவைப்படும் வெங்காயத்திற்கு தேவை எப்போதும் குறையாது என்பது ஒரு புறம் இருந்தாலும், மறுபுறம் முகூர்த்த தினங்களும் அதிகம் இருப்பதால், வெங்காயத்திற்கான தேவை இன்னும் அதிகரித்துக் கொண்டே தான் இருக்கிறது.

இந்த நிலையில் சின்ன வெங்காயம் 150 ரூபாய்க்கும், இதே பெரிய வெங்காயம் விலை 80 - 100 ரூபாய் வரை வர்த்தகமாகி வருகிறது. எனினும் வெங்காயத்தின் விலை என்ன தான் இறக்குமதியை அதிகரித்தாலும், பிப்ரவரி மாதம் வரையிலும் பெரியதாக குறைய வாய்ப்பில்லை என்றும் கூறப்படுகிறது.

சில்லறை சந்தைகளில் தான் இந்த விலை எனில் மொத்த சந்தையிலும் கிலோ வெங்காயத்தின் விலை, 70 - 80 ரூபாய் வரை வர்த்தகமாகி வருகிறதாம். இது குறித்து குல்டெக்கி மொத்த சந்தையில் வணிகர் ஒருவர் இது குறித்து கூறுகையில், சாதாரணமாக சந்தைக்கு 70 - 80 லாரிகள் வெங்காயம் அருகிலுள்ள மாவட்டங்களில் இருந்து வரும். அதே போல் கர்நாடகவில் இருந்து சில லாரிகள் வரும். ஆனால் கடந்த 10 - 15 நாட்களாகவே வெறும் 20 லாரிகள் மட்டுமே வருகின்றன. இது இங்கு மட்டும் அல்ல நாடு முழுவதும் இதே நிலை தான். சராசரி காலத்தை விட வெங்காயம் வரத்து வெகுவாக குறைந்துள்ளது.

இதற்கு முக்கிய காராணம் தீவிர மழையின் காரணமாக வெங்காயம் அதிகம் விளையும் மாவட்டங்களில் வெங்காயம் உற்பத்தி குறைவு, வெங்காயம் பயிர்கள் அழுகல், தாமதமான பயிர் இவற்றால் உற்பத்தி குறைந்துள்ளது. இதனாலேயே வெங்காய வரத்தும் குறைந்துள்ளது.

கடந்த ஆண்டு சரியான மழையின்மை காரணமாக சந்தைகளுக்கு வரத்து குறைந்தது. இதனால் வெங்காயம் இருப்பும் குறைந்துள்ளது. இதனால் பழைய வெங்காயம் என்பது அவ்வளவாக இல்லை. இதுவும் ஒரு முக்கிய காரணமாக அமைந்துள்ளது. எனினும் இந்த அளவு வெங்காயம் விலையேற்றம் கண்டாலும், விவசாயிகளுக்கு அதன் முழு பலன் கிடைத்ததா என்றால் இல்லை. அதன் முழுபலனும் மற்றவர்களுக்கு தான் கிடைக்கிறது என்றும் ஒரு புறம் குற்றச் சாட்டு எழுகிறது.

இந்தியாவில் மாதம் 15 லட்சம் மெட்ரிக் டன் வெங்காயம் தேவைப்படுகிறதாம். அதுவும் தினசரி 50 ஆயிரம் மெட்ரிக் டன் தேவை இருக்கிறது. இந்த நிலையில் சந்தைக்கு வரத்தோ 10 -12 சதவிகிதம் தான் இருக்கிறது. இதனால் வெங்காயம் விலை இப்படி ஒரு தாறுமாறான ஏற்றத்தை கண்டுள்ளது. எப்படி எனினும் தற்போதைக்கு வெங்காயம் விலை குறைய போவதாக தெரியவில்லை.