"அது ஒரு மிகப் பெரிய ரகசியம்".. ChatGPT-யின் வெற்றிப் பாதை குறித்து ஆல்ட்மேன் வெளியிட்ட தகவல்..!!

உலகப் புகழ் பெற்ற செயற்கை நுண்ணறிவு நிறுவனமான OpenAI-இன் தலைமைச் செயல் அதிகாரி (CEO) சாம் ஆல்ட்மேன், தங்கள் நிறுவனம் செயற்கை நுண்ணறிவு மொழியின் மாதிரிகளை உருவாக்குவதில் ஆரம்பத்தில் கண்டறிந்த சில முக்கிய விதிமுறைகள், "இனிமேல் கிடைப்பதற்கு வாய்ப்பில்லாத ஒரு மிகப் பெரிய விஞ்ஞான அதிர்ஷ்டம்" என்று அன்ட்ரீசன் ஹொரோவிட்ஸ் (a16z) உடனான ஒரு உரையாடலில் கூறியுள்ளார்.

இந்த a16z நிறுவனம் OpenAI-இல் முதலீடு செய்த முக்கிய நிறுவனங்களில் ஒன்றாகும். ஆல்ட்மேனின் இந்த உரை, ஒரு மாதம் பழமையானதாக இருந்தாலும், தற்போது இது மீண்டும் வெளியாகி தொழில்நுட்ப உலகில் கவனம் ஈர்த்துள்ளது.

ChatGPT வெற்றி ஒரு திருப்புமுனை ரகசியம் :சாம் ஆல்ட்மேன், ChatGPT சந்தையில் அறிமுகப்படுத்தப்பட்ட தருணத்தை, தங்கள் நிறுவனத்தின் ஒட்டுமொத்த உத்தியையும் மாற்றியமைத்த ஒரு மிக முக்கியமான கட்டம் என்று கூறியுள்ளார். அவர் மேலும் கூறுகையில், "நாங்கள் இந்தப் பெரிய ரகசியத்தை தற்செயலாக கண்டறிந்தோம். அது ஒரு நம்ப முடியாத வெற்றியாக உணர்ந்தோம். நாங்கள் யூகிக்கும் மாதிரியின் திருப்புமுனையைக் கண்டறிந்தபோது, இதுபோல வேறு எந்தப் பெரிய கண்டுபிடிப்பும் நமக்குக் கிடைக்கப் போவதில்லை என்றுதான் முதலில் நினைத்தேன். ஆனால், எங்கள் எதிர்பார்ப்புகளை மீறி, இந்த தொழில்நுட்பம் தொடர்ந்து சிறப்பாக செயல்பட்டு வருகிறது" என்று அவர் பெருமிதத்துடன் கூறியுள்ளார்.

சாம் ஆல்ட்மேன், OpenAI நிறுவனத்தின் அடுத்தகட்ட நகர்வு, அதன் செயற்கை நுண்ணறிவு கட்டமைப்பை மிகப் பெரிய அளவில் விரிவாக்குவதுதான் என்பதை தெளிவாக கூறியுள்ளார். இதற்காக, Foxconn, AMD, Nvidia மற்றும் Oracle போன்ற உலகத் தலை சிறந்த நிறுவனங்களுடன் இணைந்து அவர் செயல்பட்டு வருகிறார்.

நாங்கள் இப்போது, மிக தீவிரமான கட்டமைப்பு முதலீட்டை செய்ய வேண்டிய நேரம் வந்துவிட்டது என்று முடிவெடுத்துள்ளோம் என்று கூறியுள்ளார். எங்கள் ஆராய்ச்சியின் எதிர்காலம் குறித்தும், இந்த AI மாதிரிகளைப் பயன்படுத்துவதன் மூலம் கிடைக்கப்போகும் பொருளாதார மதிப்பு குறித்தும் எனக்கு அதிக நம்பிக்கை உள்ளது.

ஆனால், இவ்வளவு பெரிய அளவில் முதலீடு செய்ய, ஒட்டுமொத்த தொழில்துறையின் ஆதரவும் எங்களுக்கு தேவை என்று அவர் கூறினார். நிதிநிலை அறிக்கைகளின்படி, இந்த முக்கியமான ஒப்பந்தங்களின் மொத்த மதிப்பு 1 ட்ரில்லியன் டாலர் (சுமார் ரூ.83 லட்சம் கோடி) ஆக உயர்ந்துள்ளது. இது OpenAI-இன் தற்போதைய மதிப்பான 500 பில்லியன் டாலரை விட மிகப் பெரிய தொகையாகும்.

OpenAI இன் அணுகுமுறை ஆராய்ச்சி, தயாரிப்பு, கட்டமைப்பு என்ற அடுக்குகளை அடிப்படையாகக் கொண்டது என்று ஆல்ட்மேன் கூறியுள்ளார். அதாவது, சிறப்பான ஆய்வுதான் சிறந்த தயாரிப்புகளை உருவாக்குகிறது, மேலும் அந்தக் கட்டமைப்பு மேலும் சிறந்த ஆராய்ச்சிகளைச் செய்ய உதவுகிறது. தங்கள் நிறுவனத்தின் இறுதி இலக்கு, மக்கள் கட்டணம் செலுத்திப் பயன்படுத்தும் தனிப்பட்ட AI சந்தா சேவையாக மாறுவதுதான் என்று அவர் குறிப்பிட்டார்.

அவர் மேலும் கூறுகையில், "AI தொழில்நுட்பத்தின் எல்லைகள் நாம் இப்போது இருக்கும் இடத்தில் இருந்து வெகு தொலைவில் உள்ளன. மொழி மாதிரிகள் போதுமான அளவுக்கு முன்னேறினால், அவை ஒட்டுமொத்த OpenAI-ஐ விட சிறந்த ஆய்வுகளை மேற்கொள்ள முடியும்" என்று நம்பிக்கை தெரிவித்தார்.