உலகிலேயே சிறந்த நாணயம் எது தெரியுமா..? 'பாகிஸ்தான் ரூபாய்' அட நிஜமாதாங்க..!

உலகம் முழுவதும் பொருளாதார மந்த நிலை அதிகரித்து வரும் நிலையில் அமெரிக்க டாலருக்கு எதிரான ரூபாய் மதிப்பு மட்டும் அல்லாமல் அனைத்து முக்கிய நாணயங்களின் மதிப்பும் தொடர்ந்து சரிந்து வருகிறது, இதேவேளையில் டாலரின் ஆதிக்கம் பல வருட உச்சத்தில் உள்ளது.

இந்த நிலையில் பொருளாதார நெருக்கடியில் சிக்கித் தவிக்கும் பாகிஸ்தான் நாட்டின் ரூபாய் மதிப்பு யாரும் எதிர்பார்க்காத வகையில் வளர்ச்சி அடைந்துள்ளது.

மேலும் உலகிலேயே சிறந்து விளங்கும் நாணயம் என்ற அங்கீகாரத்தையும் பாகிஸ்தான் ரூபாய் பெற்றுள்ளது.

பாகிஸ்தான் ரூபாய்

அக்டோபர் 7 உடன் முடிந்த வாரத்தில் உலகளவில் பெரும்பாலான நாணயங்களின் மதிப்பு சரிந்த நிலையில், ஐஎம்எப் நிதியுதவி அளித்தும் இக்கட்டான சூழ்நிலையில் மாட்டிக்கொண்டு இருக்கும் பாகிஸ்தான் நாட்டின் ரூபாய் உலகிலேயே சிறந்து விளங்கும் நாணயம் என்ற அங்கீகாரத்தைப் பெற்றுள்ளது.

அக்டோபர் 7

பாகிஸ்தான் ரூபாய் மதிப்பு அக்டோபர் 7 ஆம் தேதி உடன் முடிந்த வாரத்தில் அமெரிக்க டாலருக்கு எதிராக 3.9 சதவீதம் அதிகரித்து 219.92 ஆக உயர்ந்துள்ளது. இந்தத் திடீர் உயர்வு அதிகப்படியான அன்னிய முதலீடுகள் குவிந்த காரணத்தால் ஏற்பட்டது எனத் தெரிய வந்துள்ளது.

புதிய நிதியமைச்சர்

பாகிஸ்தான் நாட்டின் பொருளாதாரம் மிகவும் மோசமாக இருக்கும் நிலையில் அந்நாட்டு அரசு செப்டம்பர் 28 ஆம் தேதி புதிய நிதியமைச்சராகப் பாகிஸ்தான் முஸ்லீம் லீக் - நவாஸ் கட்சியின் தலைவர் Ishaq Dar-ஐ புதிய நிதியமைச்சராக நியமிக்கப்பட்டார். இவர் வந்த பின்பும் அன்னிய முதலீட்டிலும், ரூபாய் மதிப்பு வளர்ச்சியிலும் எவ்விதமான மாற்றமும் இல்லை.

தொடர் வளர்ச்சி

வெள்ளிக்கிழமை வரையில் சுமார் 11 நாட்களாகப் பாகிஸ்தான் ரூபாய் மதிப்பு தொடர்ந்து வளர்ச்சி அடைந்து வருகிறது. Ishaq Dar நியமனத்திற்குப் பின்பு அமெரிக்க டாலருக்கு எதிராக ரூபாய் மதிப்பின் வீழ்ச்சியைக் கட்டுப்படுத்தும் பழைய கொள்கையை நடைமுறைப்படுத்தியுள்ளார்.

பாகிஸ்தான் பொருளாதாரம்

அமெரிக்க டாலருக்கு எதிராகப் பாகிஸ்தான் ரூபாய் மதிப்பு ஜூலை மாதம் 240 ரூராய் வரையில் சரிந்தது, கச்சா எண்ணெய் விலை அதிகரித்து வரும் நிலையில் பாகிஸ்தான் பொருளாதாரத்திற்கு அதிகப்படியான சவால்கள் காத்திருக்கிறது. Ishaq Dar நியமனத்திற்கு முன்பு 15 நாளில் 12 சதவீதம் வரையிலான சரிவு பதிவானது குறிப்பிடத்தக்கது.