4வது முறையாக வேலைநீக்கம் செய்த நிறுவனம்.. இம்முறை 500 ஊழியர்களின் வேலை காலி

உலகெங்கும் பொருளாதார மந்தநிலை மற்றும் பணவீக்கம் காரணமாக பெரிய நிறுவனங்களே தொடர்ந்து நஷ்டம் இல்லாமல் இயங்க போராடி வருகின்றன என்பதை பார்த்து வருகிறோம்.

அந்த வகையில் கூகுள், மைக்ரோசாப்ட் உள்பட பல முன்னணி நிறுவனங்கள் ஊழியர்களின் வேலை நீக்க நடவடிக்கை எடுத்தது என்பது குறிப்பிடத்தக்கது.

இந்த நிலையில் ஏற்கனவே 3 முறை ஊழியர்கள் குறைப்பு நடவடிக்கை எடுத்த பெலோட்டன் என்ற நிறுவனம் தற்போது 4வது முறையாக 500 ஊழியர்களை வேலை நீக்கம் செய்ய திட்டமிட்டுள்ளதாக வெளிவந்திருக்கும் தகவல் பெரும் அதிர்ச்சியை ஏற்படுத்தியுள்ளது.

பெலோட்டன் நிறுவனம்

அமெரிக்காவின் முன்னணி உடற்பயிற்சி கருவிகள் உற்பத்தி செய்யும் பெலோட்டன் நிறுவனம் தன்னுடைய வளர்ச்சியை தக்க வைத்துக்கொள்ள போராடி வருகிறது என்பதும் ஏற்கனவே மூன்று கட்டமாக செலவை குறைக்கும் வகையில் ஊழியர்களின் வேலை நீக்க நடவடிக்கையை எடுத்தது என்பது குறிப்பிடத்தக்கது.

500 ஊழியர்கள் வேலைநீக்கம்

இதுவரை இந்நிறுவனம் 3000க்கும் மேற்பட்ட ஊழியர்களை வேலை நீக்கம் செய்துள்ளதாக கூறப்பட்ட நிலையில் தற்போது மேலும் 500 ஊழியர்களை வேலை நீக்கம் செய்ய திட்டமிட்டுள்ளதாக செய்திகள் வெளியாகியுள்ளது.

செலவு குறைப்பு

பெலோட்டன் நிறுவனம் தொடர்ந்து நஷ்டமின்றி செயல்பட செலவை குறைக்க வேண்டியது மிகவும் அவசியம் என்றும் அதன் காரணமாக 500 ஊழியர்கள் வேலை நீக்கம் உள்ளிட்ட ஒரு சில நடவடிக்கைகள் எடுக்கப்பட்டுள்ளதாகவும் இந்நிறுவனத்தின் சிஇஓ தெரிவித்துள்ளார்.

நிறுவனத்தின் வளர்ச்சி

கொரோனா வைரஸ் பாதிப்புக்கு பின்னர் பெலோட்டன் நிறுவனம் பல சிக்கல்களை சந்தித்து வந்தது என்பதும் இதன் காரணமாக நிறுவனத்தின் வளர்ச்சிக்காக வேலைநீக்கம் உள்பட பல்வேறு அதிரடி நடவடிக்கைகளை தொடர்ந்து எடுக்கப்பட்டு வருகின்றன என்பது குறிப்பிடத்தக்கது.

நஷ்டம்

கடந்த இரண்டு ஆண்டுகளாக உலகெங்கிலும் உள்ள பொதுமக்கள் அத்தியாவசியம் இல்லாத வகையில் செலவு செய்வதை குறைத்துவிட்டதே பெலோட்டன் போன்ற நிறுவனங்களின் வளர்ச்சி குறைவுக்கு காரணம் என்று கூறப்படுகிறது. சமீபகாலத்தில் பெலோட்டன் மிகப்பெரிய அளவிலான வாடிக்கையாளர்களை இழந்து உள்ளதாகவும் அதனால் இந்நிறுவனத்திற்கு மிகப்பெரிய நஷ்டம் ஏற்பட்டுள்ளதாகவும் கூறப்படுகிறது.