கூகுளின் குரோமை வாங்க ஆர்வம் காட்டும் பெர்ப்ளெக்சிட்டி AI.. ரூ.2.88 லட்சம் கோடி கொடுக்க ரெடி.!!

டிஜிட்டல் உலகில் தேடல் மற்றும் பிரவுசிங் ஆதிக்கம் குறித்த போட்டி நாளுக்கு நாள் அதிகரித்துவரும் நிலையில், கூகுளுக்கு ஒரு பெரிய சவாலை ஏற்படுத்தும் விதமாக பெர்ப்ளெக்சிட்டி AI (Perplexity AI) நிறுவனம் ஒரு தைரியமான ஏலத்தை முன்வைத்துள்ளது. கூகுளின் பிரபல பிரவுசரான "குரோமை" வாங்க, $34.5 பில்லியன் அதாவது சுமார் ரூ.2.88 லட்சம் கோடி மதிப்பிலான முழு ரொக்க சலுகையை பெர்ப்ளெக்சிட்டி AI வழங்கியுள்ளது.

இந்த ஏலம், பெர்ப்ளெக்சிட்டியின் தற்போதைய சந்தை மதிப்பை விட மிக அதிகமாக இருந்தாலும், செயற்கை நுண்ணறிவு (AI) தேடல் சந்தையில் முன்னிலை பெற, மூன்று பில்லியனுக்கும் அதிகமான குரோம் பயனர்களைப் பயன்படுத்திக்கொள்ள இந்த நிறுவனம் திட்டமிடுகிறது.

பெர்ப்ளெக்சிட்டி AI உத்தி: அரவிந்த் ஸ்ரீனிவாஸ் தலைமையிலான பெர்ப்ளெக்சிட்டி, இதுபோன்று திடீர் சலுகைகளை வழங்குவதில் புதியதல்ல. கடந்த ஜனவரி மாதத்தில், அமெரிக்காவில் டிக்டாக்கின் எதிர்காலம் கேள்விக்குறியாக இருந்தபோது, அதன் சீன உரிமம் குறித்த கவலைகளைத் தீர்க்கும் விதமாக டிக்டாக் யு.எஸ். உடன் இணைந்து செயல்பட அது முன்வந்தது. இப்போது, பெர்ப்ளெக்சிட்டியின் குரோம் வாங்கும் முயற்சி, அதன் எதிர்கால வளர்ச்சிக்கு முக்கியத்துவம் வாய்ந்ததாக அமையும் என நம்புகிறது.

இந்த ஏலம் ஒருபுறம் இருக்க, ஆன்லைன் தேடலில் சட்டவிரோத ஏகபோக உரிமையைக் கொண்டிருந்ததாக கூகுள் நிறுவனம் கடந்த ஆண்டு அமெரிக்க நீதிமன்றத் தீர்ப்பின் மூலம் கண்டறியப்பட்டது. இந்த வழக்கின் தீர்வுகளின் ஒரு பகுதியாக, அமெரிக்க நீதித்துறை குரோம் பிரவுசரை விற்பனை செய்யக் கோரியுள்ளது. இந்த சூழ்நிலையை பெர்ப்ளெக்சிட்டி AI சாதகமாகப் பயன்படுத்திக் கொள்ள முயற்சிக்கிறது.

கூகுளின் நிலைப்பாடு மற்றும் சந்தை எதிர்பார்ப்புகள்: இந்தச் சலுகை குறித்து கூகுள் நிறுவனம் இதுவரை எந்த பதிலும் அளிக்கவில்லை. மேலும், கூகுள் தனது குரோம் பிரவுசரை விற்பனைக்கு வைக்கவில்லை என்றும், நீதிமன்றத் தீர்ப்பை எதிர்த்து மேல்முறையீடு செய்யத் திட்டமிட்டுள்ளதாகவும் கூறப்படுகிறது. ஏனெனில், கூகுளின் AI எதிர்காலத்திற்கு அதன் தேடல் மற்றும் குரோம் பிரவுசர் மிக முக்கியமான தூண்களாகும். தேடல் சந்தையில் தனது ஆதிக்கத்தைப் பாதுகாக்க, AI மூலம் உருவாக்கப்பட்ட சுருக்கங்கள் போன்ற பல அம்சங்களை கூகுள் அறிமுகப்படுத்தி வருகிறது.

மூன்று வருடங்களுக்கு முன்பு தொடங்கப்பட்ட பெர்ப்ளெக்சிட்டி, இதுவரை என்விடியா மற்றும் சாஃப்ட் பேங்க் போன்ற முதலீட்டாளர்களிடமிருந்து சுமார் $1 பில்லியன் நிதியைத் திரட்டியுள்ளது. இந்த ஒப்பந்தத்திற்கான முழு தொகையையும் நிதியளிக்க பல நிறுவனங்கள் முன்வந்துள்ளதாக, இந்த விஷயத்தை நன்கு அறிந்த வட்டாரங்கள் ராய்ட்டர்ஸிடம் தெரிவித்துள்ளன.

குரோம் பிரவுசரின் முக்கியத்துவம்: புதிய தலைமுறை இணையப் பயனர்கள், பதில்களுக்காக ChatGPT மற்றும் Perplexity போன்ற AI சாட்பாட்களை நோக்கித் திரும்புவதால், குரோம் போன்ற பிரவுசர்கள் மீண்டும் முக்கியத்துவம் பெறுகின்றன. குரோம், தேடல்களுக்கான முக்கிய நுழைவாயிலாக செயல்படுவதுடன், பயனர்களின் தரவுகளையும் சேகரிப்பதில் மையமாக உள்ளது. இந்தத் தரவுகள், பெரிய தொழில்நுட்ப நிறுவனங்களின் AI லட்சியங்களுக்கு அவசியமானவை.

பெர்ப்ளெக்சிட்டி ஏற்கனவே "காமெட்" (Comet) என்ற பெயரில் அதன் சொந்த AI உலாவியைக் கொண்டுள்ளது. குரோமை வாங்குவது, OpenAI போன்ற பெரிய போட்டியாளர்களுக்கு எதிராக வலுவான போட்டியைக் கொடுக்க உதவும். OpenAI நிறுவனமும் குரோம் வாங்குவதில் ஆர்வம் காட்டியதுடன், அதன் சொந்த AI உலாவியையும் உருவாக்கி வருகிறது. யாஹூ (Yahoo) மற்றும் தனியார் பங்கு நிறுவனமான அப்பல்லோ குளோபல் மேனேஜ்மெண்ட் (Apollo Global Management) ஆகியவையும் க்ரோம் மீது ஆர்வம் கொண்டுள்ளன.

பெர்ப்ளெக்சிட்டி தனது ஏலத்தில், குரோமின் அடிப்படையான குறியீடான குரோமியம் (Chromium) ஓப்பன் சோர்ஸ் ஆகவே இருக்கும் என்றும், அடுத்த இரண்டு ஆண்டுகளுக்கு அதன் இயல்புநிலை பிரவுசரில் எந்த மாற்றமும் செய்யப்படாது என்றும் உறுதியளித்துள்ளது. இருந்தபோதிலும், கூகுள் தனது குரோம் பிரவுசரை விற்க வாய்ப்பில்லை என்றும், அதைத் தடுக்க நீண்ட சட்டப் போராட்டத்தை மேற்கொள்ளும் என்றும் ஆய்வாளர்கள் கருதுகின்றனர்.