வாகன ஓட்டிகளுக்கு ஒரு ஹேப்பி நியூஸ்.. எல்லாம் இந்த கொரோனாவின் மாயம்..!

டெல்லி: பெட்ரோல் மற்றும் டீசல் விலை தொடர்ந்து நான்கு நாட்களாக விலை வீழ்ச்சி கண்டு கொண்டு இருக்கிறது.

கடந்த சில ஆண்டுகளுக்கு முன்பு வரை மாதத்தில் இருமுறை மட்டுமே பெட்ரோல் மற்றும் டீசல் விலை நிர்ணயிக்கும் செயல்முறை நடைமுறையில் இருந்தது.

அது சர்வதேச அளவில் விறபனையாகும் கச்சா எண்ணெய் விலையை பொறுத்து மாற்றம் செய்யும் முறை இருந்து வந்தது.

விலை நிர்ணயம்

ஆனால் இது பின்னர் அனுதினமும் விலையில் மாற்றம் செய்யும் நடைமுறை செயல்பாட்டிற்கு வந்தது. மேலும் இந்த எண்ணெய் விலை நிர்ணயம் எண்ணெய் நிறுவனங்களின் கையில் வந்தது. இந்த முறையில் பெட்ரோல் மற்றும் டீசல் விலையானது அதிரடியான மாற்றங்களை கண்டு வந்தது. அந்த வகையில் கடந்த நான்கு தினங்களாகவே விலை குறைந்து வருகிறது.

சென்னையில் விலை வீழ்ச்சி

குறிப்பாக சொல்லவேண்டுமானால் கடந்த சில வாரங்களாகவே பெட்ரோல் மற்றும் டீசல் விலை குறைந்து வருகிறது. குறிப்பாக சென்னையில் அனுதினமும் விலை அதிகளவில் குறையவில்லை என்றாலும் தினசரி குறைந்தபட்சம் 10 பைசாவாவது குறைந்துள்ளது.

சர்வதேச சந்தையில் விலை

குறிப்பாக கடந்த செப்டம்பர் 12, 2019ல் தேசிய தலைநகரில் பெட்ரோல் விலை 71 ரூபாயாக விற்பனை செய்யப்பட்டது. இதே டீசல் விலையானது ஜனவரி 12 முதல் ஒப்பிடும்போது மிகக் குறைந்த அளவை தொட்டுள்ளது. சர்வதேச சந்தையில் கச்சா எண்ணெய் விலை வீழ்ச்சி கண்டுள்ள நிலையில், அதன் எதிரொலியாக இங்கு எரிபொருள் சந்தையிலும் விலை வீழ்ச்சி கண்டுள்ளது.

இன்று விலை இப்படி தான்

இந்த நிலையில் இந்தியன் ஆயில் இணையத்தின் மூலம் டெல்லி, கொல்கத்தா, மும்பை மற்றும் சென்னை உள்ளிட்ட பகுதிகளில் முறையே ரூ.70.83, ரூ.73.51, ரூ.76.5, ரூ.73.58 ஆக உள்ளது. இதே டீசல் விலையானது முறையே ரூ.63.51, ரூ.65.84, ரூ.66.50, ரூ.67.10 ஆகவும் விற்பனை செய்யப்பட்டும் வருகிறது.

இது நல்ல விஷயம் தானே

பலவேறு நாடுகளுக்கு பரவி வரும் கொரோனா பயத்தினால் கச்சா எண்ணெய் விலையானது தொடர்ந்து வீழ்ச்சி கண்டு வருகிறது. இதன் தாக்கம் இந்திய சந்தையிலும் எதிரொலிக்க தொடங்கியுள்ளது. எது எப்படியோங்க இது வாகன ஓட்டிகளுக்கு நல்ல விஷயமே.